Dat war de Sujet e Mëttwoch den Owend beim Caroline Mart op RTL Télé Lëtzebuerg. D'Emissioun elo am Replay op RTL.lu.

Konkret Konsequenzen hat onse laange Reportage de leschte Mëttwoch, 29. Mee mam Temoignage vum Christian Faber, deen als Kand an engem kathouleschen Internat mëssbraucht gouf. De Generalvikar Leo Wagener sot am Kloertext, wou d'Thema kontrovers diskutéiert gouf, dass et doropshin nach zu weidere Kierchenaustrëtter komm ass, iwwerdeems sech zwee weider Affer beim Christian Faber gemellt hunn.

D'Invitéen

- Christian Faber, Affer
- Leo Wagener, Generalvikar
- Gilbert Pregno, Psycholog
- Albert Rodesch, Affekot
- Marie-Laure Rolland, Journalistin

Viru enger Woch konnt Dir op der Télé e laangen Temoignage gesi vum Christian Faber, deen als Kand mëssbraucht gouf an engem kathouleschen Internat. E Mëttwoch den Owend souz hien am Kloertext dem Generalvikar Leo Wagener vis-à-vis, fir Äntwerten ze kréien. Nach an der Ronn waren de Psycholog Gilbert Pregno, den Affekot Albert Rodesch an d'Journalistin Marie-Laure Rolland.

Si all hunn diskutéier, wat och déi méi déif Ursaache sinn, déi grad an der Kierch zu Mëssbräich féieren, woubäi et net just ëm dat nach ëmmer schwieregt Verhältnis zur Sexualitéit geet, mä grad esou ëm Muecht a Muechtmëssbrauch. Wat geännert huet, dat ass, dass d'Kierch sech der Debatt muss stellen an dat och aktiv mécht, de Leo Wagener ass do ganz lucide:

AUDIO: De Generalvikar Leo Wagener

"Et gëtt méi Causen, net just eng. 't kann einfach eng Veranlagung Pedophilie sinn, 't ka sinn, dass een e bestëmmte Moment sech dechargéiert bei engem Affer. Et kann awer och sinn, dass ee sech iwwer Joren net der Wierklechkeet vun der eegener Sexualitéit gestallt huet. Et ka sinn, dass ee Muecht mëssbraucht, dass ee wierklech ee Klerikalismus auslieft, e perverst Verhältnis huet zu der Muecht. An natierlech muss eng Institutioun wéi d'Kierch sech da Froen stellen, wéi vigilant si mir op all deene Punkten."

VIDEO: Am Kloertext: Gilbert Pregno tëscht Konfrontatioun a Wonsch
Eng Ausso vum fréiere Generalvikar Mathias Schiltz iwwer e Fall vu Mëssbrauch mécht de Psycholog bis haut rosen. Hien hofft, datt sech eppes ännert.

De Resumé

Um Enn vum Debat war de Christian Faber net iwwerzeegt, dass sech am Fong eppes geännert huet: "Ech géif mech gären eppes Bessere beléieren loosse, mä ech gleewen dat doen nach alles net, et leeft erëm alles no bannen, et ass keng Definitioun vu Sanktiounen, et gëtt kee Procès public, et si keng Laiquen derbäi, on tourne dans sa sauce wéi fréier."

Natierlech gëtt et net just Mëssbrauch an der Kierch, mä e weit nach méi schwéier vun deenen, déi dach solle sech ëm d'Séile suergen, esou den Affekot Albert Rodesch, an de Psycholog Gilbert Pregno sot, et misst een nach vill méi genee kucken, wat d'Ursaache sinn: "Mir hunn hei mat enger Situatioun ze dinn, 't ass eng strukturell Gewalt, et huet mat der Struktur Kierch ze dinn, dat misst Der am Fong och uschneiden. 't ass dat, wat ech esou problematesch fannen, et gëtt kee Fortgang, wat mir haut diskutéieren war scho virun 10 Joer."

Reaktioun Wagener: "Ech kann dermat net d'accord sinn. Also ech kann dat net op mir sëtze loossen, well ech selwer aktiv dru schaffen dës Woch mat de Schwëstere-Kongrégatiounen zesummen, fir de Silence ze briechen. Mir mussen dat doten Thema opgräifen." Esou de Leo Wagener, deen och sot, dass haut vill méi oppen an der Kierch iwwer Sexualitéit geschwat gëtt: "Dat ass dat Neit. Ech ka vu mir aus den Zölibat ofschafen. Wat ech mir scho géif virstellen, ass, dass de Flicht-Zölibat ofgeschaf gëtt, dat heescht, dass et fräigestallt gëtt, ob een als Geeschtleche wëll am Mariage liewen oder net. Ech mengen, dass dat och iergendwann kennt."

An och wat Frae betrefft, misst een d'Diskussioun net scheien, esou de Generalvikar: "D'Ordinatioun vu Fraen, wat mir do am meeschte leeddeet, dat ass, dass de Jean-Paul II. gesot huet, dat ass eng Fro, iwwer déi mol net méi kann theologesch nogeduecht ginn. Ech mengen net, dass mir an der Kierch se einfach nëmmen an der Kategorie vun der Gläichberechtegung denken, mir mussen dat theologesch ugoen, ech erwaarde mir, dass mir do eng Kéier en offenen theologeschen débat driwwer kréien, mee do si mir awer nach wäit ewech."

De Reportage vum 29. Mee 2019

VIDEO: De Reportage: Sexuelle Mëssbrauch a kathoulescher Kierch
An engem oppenen Temoignage beschreift de Christian Faber, Affer vu sexuellem Mëssbrauch, säi Leidenswee a seng Liewensgeschicht.

De Kloertext leeft am Prinzip all zweete Mëttwoch um 20 Auer op RTL Télé Lëtzebuerg - direkt nom Journal. Op RTL.lu an iwwert d'App streame mir de ganze Programm vun RTL Télé Lëtzebuerg. Dir kënnt de Kloertext also och am Livestream suivéieren an dono am Replay nach eemol kucken oder consultéieren respektiv kommentéieren. (Et kann awer e bëssen daueren, bis d'Emissioun no der Diffusioun komplett fir den Internet konvertéiert ass. Merci fir Äert Versteesdemech.)