An der Emissioun "Kloertext" goung et en Donneschdeg den Owend ëm de Sondage vun TNS Ilres, deen RTL an d'Wort an Optrag ginn haten.

All d'Parteie ware vertrueden. Invitéiert war zum Beispill de grousse Gewënner, ma och déi gréisst Verléierin an déi beléiftste Politikerin. D'Dany Rasqué resuméiert hir Reaktiounen.

Resumé Kloertext / Reportage Dany Rasqué

D'LSAP-Gesondheetsministesch Paulette Lenert bleift mat 89 Prozent un der Spëtzt vum Kompetenz- a Sympathie- Ranking. D'Zoustëmmung fir si bleift grouss an et kléngt net esou, wéi wa si wëlles hätt, der Politik geschwënn de Réck ze dréinen.

"Ech wäert nach eng Zäitche bleiwen, esou wéi et ausgesäit. Et ass och nach an deem Domaine, wou ech schaffen, immens vill ze dinn, dat huet déi Kris mat sech bruecht, datt een net esou weider kënnt an der normaler Politik, wéi een dat wéilt. Et gëtt engem scho Loscht".

Am Verglach mam leschte Politmonitor hat d'Paulette Lenert domadder gerechent, datt hire Score géif e Stéck erofgoen, wat also net de Fall war, par conter ass genee dat bei hirer liberaler Kolleegin, der Familljeministesch Corinne Cahen geschitt.

"Et ass esou, datt ech déi leschte Kéier exzeptionell héich war par rapport zu mengen normale Wäerter, mä 8 vun 10 Leit aus den Top 10 sinn aus der Regierung. D'Leit sinn zefridde mat der Regierungsaarbecht an dat war jo och en Effort collectif".

D'Corinne Cahen selwer kënnt op déi 27. vu 35 Plazen.

Déi Gréng hu mat der Justizministesch Sam Tanson just eng Politikerin an den Top 10. Datt si de François Bausch op d'Plaz 11 gedréckt huet, ass fir de Vizepremier a Minister fir Mobilitéit an Infrastruktur kee Problem. Him ass bewosst, datt et un der Partei selwer läit, datt se ugeschloen ass.

"Mir kommen net dolaanscht, als Gréng festzestellen, datt e ganze Koup Saachen a Problemer, déi mer hunn, hausgemaach sinn. Wann een am Tal der Tränen ass, dann dauert et eng Zäit, ier een do eraus kënnt."

De François Bausch ënnersträicht, datt d'Legislaturperiod eréischt an der Hallschent ass an datt nach gutt zwee Joer bleiwen, fir ze schaffen.

Schaffe wëll och de Sven Clement vun de Piraten, hien hat net mat esou engem grousse Sprong gerechent. Hien ass jo mat engem Plus vun 11 Prozentpunkten op der Plaz 7 gelant a weess wat dat bedeit.

"Et ass e Vertrauensvirschoss an do muss een dann och dat entspriechend liwweren".

D'Gestioun vun den Altersheemer, de Logement, d'Inegalitéiten an d'Steieren, dat sinn alles Sujeten, iwwert déi am Kontext vun der éischter Hallschent vun der Legislaturperiod och Rieds goung.

Eis Invitéen

Paulette Lenert
LSAP-Gesondheetsministesch

Corinne Cahen
Familljeministesch an DP-Presidentin

François Bausch
Vizepremier a grénge Minister fir Mobilitéit an Infrastruktur

Claude Wiseler
CSV-President an Deputéierten

Sven Clement
Deputéierte vun de Piraten

Fernand Kartheiser
ADR-Deputéierten

Nathalie Oberweis
Deputéiert vun déi Lénk

Kloertext leeft am Prinzip all zweeten Donneschdeg um 20 Auer op RTL Télé Lëtzebuerg - direkt nom Journal. Op RTL.lu an iwwert d'App streame mir de ganze Programm vun RTL Télé Lëtzebuerg. Dir kënnt de Kloertext also och am Livestream suivéieren an dono am Replay an am RTL Play nach eemol kucken oder consultéieren, respektiv kommentéieren. (Et kann awer e bëssen daueren, bis d'Emissioun no der Diffusioun komplett fir den Internet konvertéiert ass. Merci fir Äert Versteesdemech.)