En Donneschdeg goung et an der Emissioun "Kloertext" ëm den neiste Politmonitor vun TNS Ilres, deen RTL zesumme mam Lëtzebuerger Wort an Optrag ginn hat.

Kommunizéiert d'Regierung net kloer genuch a wichtegen Dossieren, notamment an der Covidkris? A wéi léisst sech erkläerten, datt verschidde Regierungsmemberen am Politmonitor dach eng Rëtsch Punkten u Beléiftheet an Unerkennung verluer hunn? Dat waren e puer Sujete,  mat deenen d'Politiker sech am Kloertext en Donneschdeg den Owend ausernee gesat hunn.

An der Gestioun vun der Covidkris mécht d'Regierung Salamitaktik, an dat ass net gutt, fënnt d'Oppositioun. Den Impftaux wier mat 66 Prozent op d'ganz Populatioun par Rapport zu aneren europäesche Länner ze déif, seet de CSV- President Claude Wiseler: "Dat kënnt deelweis dovunner, datt net prezis mat Gruppe geschwat ginn ass, mat Altersgruppen, mat Beruffsgruppen, mat Nationalitéiten. Dann eng Kommunikatioun gemaach ginn ass, déi extrem positiv war, fir dann eng Politik gutt ze verkafen. Mä a Realitéit huet dat Wëllen, d'Politik gutt ze verkafen, d'Leit an eng Sécherheet bruecht, wou da vill soen: 'mä da brauch ech mech jo net impfen ze loossen.'"

Eng Politik gutt verkaaft, mä och de Politiker? Net all Regierungsmember konnt am Politmonitor bei der Bewäertung vun der Sympathie a Kompetenz vun der Kris profitéieren. Wéi eng Roll verschidden Affären oder d'Pandemie och fir eenzel Politiker gespillt huet, och doriwwer hunn d'Politiker an der Ronn diskutéiert.

Resumé vum Kloertext 18.11.2021 / Rep. Diana Hoffmann

De Premier huet zum Beispill mussen eng Partie Plomme loossen. Schold dorunner ass d'Plagiatsaffär, mengt de Coordinateur vun de Piraten de Marc Goergen: "Et ass ganz kloer. Déi Affär, ech mengen de Premier ass ugeschloen, d'Partei steet zwar nach hannert him, mä soulaang de Premier net iergendeng Reaktioun gëtt, wäert dat dote sech och net änneren. An et ass natierlech d'DP - et ass e bësse wéi e Futtballmatch - hire Stiermer huet e Bee gebrach a si ginn nach ëmmer spillen."

De Parteikolleeg an DP-Vizepresident Lex Delles spréngt dem Premier zur Säit a verweist op de schrëftleche Statement vun dësem. Och d'Corinne Cahen an d'Carole Dieschbourg hunn awer u Beléiftheet mussen abéissen. Den ADR-President Jean Schoos zum schlechte Score vum Corinne Cahen: "Fir mech ganz kloer d'Konsequenz aus der schlechter Covid-Gestioun an den Altersheemer, wou een och elo bei de Booster-Impfungen de selwechte Feeler gemaach huet. Et huet ee bei den ale Leit den Appell gemaach an de Rescht ronderëm, d'Ëmfeld, déi sinn all net an de 'Boost' erakomm a mir wësse jo, dass do e Problem ass."

Fir déi schlecht Wäerter vum Carole Dieschbourg mécht de Marc Goerens da politesch Skandaler verantwortlech. Den Co-President vun déi gréng, de Meris Sehovic betount, et wiere keng Skandaler gewiescht, mä politesch Ausenanersetzungen, a kritiséiert d'Pirate fir hir Attacken op de soziale Reseauen op d'Ministesch.

Ee vun de groussen Verléierer am Politmonitor ass dann awer och den CSV-President Claude Wiseler. Seng Erklärung ass, datt d'Volleksparteie grad a ganz Europa Schwieregkeeten hunn, datt an der Krisenzäit d'Oppositioun manner Visibilitéit hätt an doriwwer eraus géifen et och hausgemaache Problemer ginn, eben e Bild vun enger intern zerstriddener Partei no baussen.

Invitéiert waren:

Lex Delles
Vizepresident DP
Minister fir Mëttelstand an Tourismus

Tom Jungen
Generalsekretär LSAP
Buergermeeschter vu Réiser

Meris Sehovic
Co-President déi Gréng

Claude Wiseler
President CSV
Deputéierten

Carole Thoma
Co-Spriecherin déi Lenk

Jean Schoos
President ADR
Conseiller Bäerdref, Veterinär

Marc Goergen
Coordinateur Piraten
Deputéierten a Conseiller zu Péiteng

Kloertext leeft am Prinzip all zweeten Donneschdeg um 20 Auer op RTL Télé Lëtzebuerg - direkt nom Journal. Op RTL.lu an iwwert d'App streame mir de ganze Programm vun RTL Télé Lëtzebuerg. Dir kënnt de Kloertext also och am Livestream suivéieren an dono am Replay an am RTL Play nach eemol kucken oder consultéieren, respektiv kommentéieren. (Et kann awer e bëssen daueren, bis d'Emissioun no der Diffusioun komplett fir den Internet konvertéiert ass. Merci fir Äert Versteesdemech.)