En Donneschdeg goung et am "Kloertext" ëm déi russesch Invasioun an d'Ukrain a wat de Westen nach maache kann, fir d'Situatioun z'entschäerfen.

Besser kann een net weisen, dass Vëlkerrecht an UN-Charta engem egal sinn a just Logik vum Stäerkste gëllt: Just an deem Moment, wou den UN-Sécherheetsrot um Verhandlungsdësch awer nach friddlech Léisungen am Ukrain-Konflikt gesicht huet, si russesch Truppen op Uerder vum Wladimir Putin an de freie Moiesstonnen en Donneschdeg an dat 44-Milliounen-Awunner-Land amarschéiert, d'Attacke koume vum Bueden an aus der Loft.

Dëst heescht eis Welt ass zanter haut eng aner, well "an Europa ass nees Krich!"

Wéi wäit geet Russland? Wat dreift de Putin? Wat kann de Weste maachen, fir eng Eskalatioun a Bluttvergéissen ze verhënneren? Wéi soll d'EU an d'Nato richteg reagéieren? A wéi eng Optioune ginn et nach?

Ënnert anerem iwwert déi Froe hu mer um Donneschdeg en Owend am Kloertext geschwat.

An der Nuecht wakereg ginn a realiséieren, datt engem russesch Bommen op de Kapp falen. Deen Horrorzeenario gouf en Donneschdeg de Moie fir Milliounen Ukrainer Realitéit.

Ënnert hinnen och d'Famill vun eiser Kolleegin Valeria Wiwinius, déi an der Ukrain op d'Welt koum. Nieft dem Ausseminister Jean Asselborn, dem DP Europadeputéierte a fréiere Verdeedegungsminister Charel Goerens an dem RTL Journalist Petz Bartz, war d'Valeria Wiwinius en Donneschdeg den Owend Invité am Kloertext an huet do iwwert d'Situatioun vun de Mënschen an der Ukrain temoignéiert.

D'Valeria Wiwinuis huet Famill zu Odessa an zu Kiew. Si huet um Donneschde Moien mat hirer Schwëster telefonéiert, déi d'Attacken an der Nuecht matkritt huet: "Si ass géint dräi, véier Auer déi éischte Kéier erwächt, well se e bëssen onroueg war, kuerz dono ass se erausgaangen an huet d'Bomm explodéiere gesinn, respektiv hir war deen Ament och net wierklech kloer, wat dat war."

Datt de russesche President géif eescht maachen, domadder hätten d'Leit an der Ukrain net gerechent: "Ech weess, datt an den News iwwerall scho vill driwwer geschwat gouf, mä d'Leit sur place si vun enger russescher Provokatioun ausgaangen. Datt sech alles op diplomateschen Wee reegelt an datt näischt geschitt."

Et ass anescht komm. Éischt Alarmzeechen goufen et de Weekend, seet Petz Bartz, RTL Journalist fir international Aktualitéit. Hie schwätzt vun deenen 30.000 russeschen Zaldoten a Belaruss, nërdlech vu Kiew, déi nom Enn vun engem Manöver net wéi annoncéiert ofgezu goufen.

Truppen déi zousätzlech an der Regioun bliwwe sinn, nieft 150.000 Zaldoten op der direkter Grenz mat der Ukrain an enger Flott, déi am Mier zesumme gezu gouf: "Do hätt ee misse soen, si hunn am Fong d'Ukrain vun dräi Säiten an der Zaang. Dofir kann déi Invasioun net esou iwwerraschend gewiescht sinn, mä op der Front gouf op alle Fall net domadder gerechent."

An elo? Eng direkt Militärinterventioun fir der Ukrain, engem Land, dat net Member an der NATO ass, ze hëllefen hält de François Heisbourg, en international unerkannte Spezialist an der Geopolitik fir keng gutt Iddi.

En Asaz vun internationalen Truppen hätt dramatesch Konsequenzen, warnt och de Jean Asselborn: "Wann hei Amerikaner, Däitscher, Fransousen op Russe schéissen, da si mer an engem Zenario wou et kann esou klaken, datt effektiv esouguer kéint d'Atombomm agesat ginn."

Eng Defense an den EU-Memberlänner opbauen ass ee vun de Weeër, op déi een an den Aen vum François Heisbourg, dem Spezialist fir Geopolitik misst goen. Eng Iddi, déi och Ënnerstëtzung beim Liberale Europadeputéierte Charel Goerens fënnt: "Mir mussen oprüsten, och wann et eis net gefält. Et widderstrieft eis".

"Mir brauchen déi Suen fir aner Saachen", gëtt den Ausseminister Jean Asselborn ze bedenken. Natierlech, äntwert de Charel Goerens, mä heiansdo géifen d'Prioritéiten duerchernee gehäit an hei wiere mer an esou enger Situatioun.

Vum Ausseminister gëtt et e JO, MÄ. Europa wier net gebaut ginn, fir mat enger staarker Arméi ze funktionéieren.

E wichtegt Element sinn d'Sanktiounen vum Westen. Am beschte Fall iwwerzeegen déi de Wladimir Putin opzehalen, seet de François Heisbourg, perséinlech géif hien awer net dodru gleewen.

Den Ausseminister Jean Asselborn am RTL-Interview
Et wier eng Schan, dass Russland, onschëlleg Leit iwwerfält an an d'Ukrain amarschéiert ass.

Eis Invitéen:

Valeria Wiwinius
RTL-Journalistin
Ass an der Ukrain gebuer an huet Famill zu Odessa a Kiew

Petz Bartz
RTL-Journalist fir international Aktualitéit
War selwer nach uganks Februar an der Ukrain

Charles Goerens
EU-Deputéierten (DP)
Fréiere Verdeedegungs- a Kooperatiounsminister

Jean Asselborn
Déngschteelsten Ausseminister an der EU (LSAP)

Kloertext leeft am Prinzip all zweeten Donneschdeg um 20 Auer op RTL Télé Lëtzebuerg - direkt nom Journal. Op RTL.lu an iwwert d'App streame mir de ganze Programm vun RTL Télé Lëtzebuerg. Dir kënnt de Kloertext also och am Livestream suivéieren an dono am Replay an am RTL Play nach eemol kucken oder consultéieren, respektiv kommentéieren. (Et kann awer e bëssen daueren, bis d'Emissioun no der Diffusioun komplett fir den Internet konvertéiert ass. Merci fir Äert Versteesdemech.)