En Donneschdeg goung et am "Kloertext" ëm déi russesch Invasioun an d'Ukrain an d'Fro zu de Flüchtlingen a wéi hinne ka gehollef ginn.

"Wat de Krich méi séier op en Enn kënnt, wat d'Blessuren déi bleiwen, méi geréng sinn." Dat huet de Jean-Claude Juncker um Donneschden Owend am Kloertext op der Tëlee ënnerstrach. De fréieren EU-Kommissiounspresident a fréiere Lëtzebuerger Premier warnt virun de Konsequenze vun de russeschen Attacken.

"Mat all Schoss entsteet neien Haass, mat all Bomm an all Granat entsteet nach méi Haass. Wann ee Mënsche verléiert, mat deenen ee frou ass (...), wann déi Leit alleguer bewosst ëmbruecht ginn, da leet dat d'Wuerzel fir nei Konflikter, déi vläicht eréischt an 20 oder 30 Joer kënne lass goen. Mir hu jo am eegene Land an an eiser Géigend erlieft, nom Krich a wärend dem Krich, wéi vill Péng a Méi dass et kascht huet, fir eis erëm um Rimm ze rappen."

Wat de Krich, d'Bombardementer an d'Verletzunge vun de Mënscherechter méi laang géifen unhalen, wat d'Zuel vun de Mënschen, déi musse fortlafen, méi grouss géif ginn.

Zu Lëtzebuerg, an och a villen anere Länner ass d'Solidaritéit an de Wëlle fir de Leit aus der Ukrain ze hëllefe grouss. Mat Donen, mä et sinn och vill Leit déi proposéiert hu Mënsche bei sech doheem opzehuelen.

Dat gëtt natierlech begréisst, mä, seet de Marc Crochet vun der Caritas, et muss ee wëssen op wat ee sech aléisst. "Doheem ass ee gewinnt, mat senger Famill ze wunnen, mat sengem Hausdéier ze wunnen, mat senge Gewunnechten an eiser Kultur. Et gëtt e Kulturschock op deenen zwou Säiten, wann een en anere Mënsch bei sech invitéiert an et sinn traumatiséiert Mënschen an et komme Chargen op een duer."

En anere Wee fir ze hëllefen si finanziell Donen an dat maachen den Ament och ganz vill Leit. D'Caritas an d'Rout Kräiz hu bis elo hei am Land jee ronn eng Millioun Euro kritt. Mat deene Sue kënnen d'Organisatiounen op der Plaz hëllefen. Mat Saachspenden, déi immens gutt gemengt wieren, wier et ganz schwéier ëmzegoen, seet de Luc Scheer vum Roude Kräiz.

"Et ass immens schwéier d'Hëllef an d'Ukrain ze kréien, et ass och net liicht d'Hëllef an den Nopeschlänner ze geréieren an dat muss mat enger immens duerchorganiséierter Logistik passéieren. Mir hunn zum Beispill op enger Lëscht, déi zu Genève geféiert gëtt eng Millioun Decken drop stoen. Dat ass ee Modell vun Decken, déi brennen net, déi dréchne séier an se kaschte 4 Schwäizer Frang d'Stéck."

Et ass net nëmme komplizéiert fir d'Organisatiounen Hëllef an d'Ukrain ze kréien, et ass och komplizéiert, fir d'Mënschen, déi musse fortlafen, a Sécherheet ze bréngen. Op ville Grenzposte gi si kujenéiert. Eng Erfarung, déi och d'RTL Journalistin Annick Goerens déi lescht Woch gemaach huet. Si war mat engem Bus mat an d'Ukrain, dee Flüchtlinge mat zeréck op Lëtzebuerg bruecht huet. Ganz komplizéiert war et notamment fir vun Ungarn a Rumänien ze kommen.

"Et ass dat, wat mech am meeschten un där Saach genervt huet, ech ginn aus engem EU-Land an en anert EU-Land. Ech gi just aus dem Schengenraum eraus, mä trotzdeem sinn ech nach an der EU an ech gi behandelt, wéi wann ech e Krichsverbriecher wier, quasi."

Dat ass eng batter Erfarung, déi Milliounen Ukrainer den Ament maachen.

De Jean-Claude Juncker sot et géif hien "echt rose" maachen ze gesinn, datt Mënschen, déi aus der Ukrain musse fortlafen, ënnerschiddlech behandelt ginn.

Eis Invitéen:

Jean-Claude Juncker
Fréieren EU-Kommissiounspresident
Fréiere Lëtzebuerger Staatsminister

Luc Scheer
Rout Kräiz
Member vum Direktiounskomitee

Marc Crochet
Generaldirekter Caritas
War 2015 an der Ukrain

Annick Goerens
RTL-Journalistin
War mat engem Bus, dee Flüchtlingen opgegraff huet, un der ukrainescher Grenz

RTL

Jean-Claude Juncker am Interview

De fréiere Premier an EU-Kommissiounspresident Jean-Claude Juncker begréisst zwar d'Solidaritéit mat de Flüchtlingen, mä ech mengen, d'Solidaritéit hält méi laang, mä ech maache mir keng Illusiounen, si hält net ëmmer. Et brauch ee Solidaritéit mat jidderengem, deen aus der Ukrain kënnt, net just mat de wäisse Chrëschten, déi fortlafen.

En anert Thema mam fréiere Kommissiounspresident ware natierlech déi lo schonn héich Energiepräisser an d'Fro vun engem Stopp vun de russeschen Gas an Uelegliwwerungen, wéi se jo och schonn den Ausseminister Asselborn gefuerdert hat. Jo, ech denken doriwwer no, ier ech mech duerzou äusseren. Et huet grouss Konsequenzen, mir kommen dann an eng déif Rezessioun an Europa eran, Ueleg- a Gas-Präisser klamme jo elo schonn. Mir lafe Gefor, wann dat esou virugeet an och och wa mir Leitungen zouspären, op en Uelegpräis vun 700 bis 800 Dollar de Barrel ze kommen. Dat huet op der Pompel exzessive a grouss Konsequenzen. Do muss een also oppassen, wat ee mécht. Ech weess natierlech, datt mir moralesch dozou invitéiert sinn, datt ze maachen.  Ob et et an alle Varianten intelligent ass, et direkt ze maachen, woen ech ze bezweiwelen. D'Amerikaner sinn an enger anerer Situatioun, si sinn net ofhängeg vu russeschen Energieimporter, d'Europäer dogéint zum ganz groussen Deel. 

Op d'Fro, ob dëst dann déi lescht Cartouche ass, äntwert de Jean-Claude Juncker: Ech hu mech mat mir selwer op de Saz verstännegt, dass all Léisungen um Dësch leien. Mä ech hätt awer gären, dass een all Léisung 10, 12 Mol diebelt an dréint, ier een zougräift.

Aner Themen am Interview sinn déi geopolitesch Lag och mat China, wat de Putin stoppe kéint, wat wier, wann de Krich weidergeet oder och nach d'Roll vun Europa an deem ganze Konflikt.

Kloertext leeft am Prinzip all zweeten Donneschdeg um 20 Auer op RTL Télé Lëtzebuerg - direkt nom Journal. Op RTL.lu an iwwert d'App streame mir de ganze Programm vun RTL Télé Lëtzebuerg. Dir kënnt de Kloertext also och am Livestream suivéieren an dono am Replay an am RTL Play nach eemol kucken oder consultéieren, respektiv kommentéieren. (Et kann awer e bëssen daueren, bis d'Emissioun no der Diffusioun komplett fir den Internet konvertéiert ass. Merci fir Äert Versteesdemech.)