No joerzéngtelaangen heftegen Diskussiounen, läit eng grouss Reform vir, déi de Jugendschutz an d'Jugendstrofrecht vuneneen trenne soll.

D'Jugendschutzreform war en Donneschdeg Sujet am Kloertext mat 4 Invitéen. Jugendschutz a Strofrecht solle jo kloer getrennt ginn, esou wëll een den internationale Standarden entspriechen an de Jonke méi kloer Rechter garantéieren. Eng komplex Reform, déi deels schaarf kritiséiert gëtt.

Kritik kënnt virop vun der Justiz, se wier net genuch mat agebonne ginn. De Charel Schmit, Ombudsman fir Kanner a Jugendlecher, schéngt genervt vun där Diskussioun.

"Dat Lamentéieren, wie wéi vill gelauschtert gouf, kann ech net méi héieren. Wien déi lescht 25 Joer nämlech net gehéiert gouf, sinn d'concernéiert Kanner a Famillen."

Eng weider Kritik. De Mindeststrofalter gouf op 14 Joer festgeluecht. D'Justizministesch Sam Tanson huet erkläert firwat: "Virdrun ass et schwéier fir e Kand, d'Konsequenzen anzeschätzen. Et gëtt och nach eng grouss Impulsivitéit. Déi meescht Etüde soen, datt d'Kanner dat alles eréischt vu 14 Joer u verstinn."

Eng weider Suerg vun der Justiz: den Office National de l'Enfance géif ze vill Pouvoir kréien, den ONE-Direkter Gilles Dahmen léisst dat awer net gëllen.

"An der Justizprozedur am Jugendschutz ass nach ëmmer d'Geriicht, dat decidéiert, wat mam Kand geschitt. Wat bei den ONE eriwwergeet, ass d'Representatioun vum Staat viru Geriicht an an der Prozedur."

D'Reform wier en éischte Schratt an déi richteg Richtung, mengt och de Strofrechtsprofesser Stefan Braum vun der Uni Lëtzebuerg.

"Et ass déi éischte Kéier, datt Jugendlecher a Kanner Grondrechter hunn. Dat ass nei zu Lëtzebuerg."

Ma duerno misst gekuckt ginn, wéi d'Texter gräifen an dofir bräicht een awer och méi genee Donnéeën iwwer d'Jugendkriminalitéit.

D'Reform vum Jugendschutz soll nach dës Legislaturperiod kënnen ëmgesat ginn, hofft d'Justizministesch. Wann net wier dat dramatesch, well et wier elo schonn den drëtten Ulaf, esou nach d'Sam Tanson.

Eis Invitéeë sinn

Sam Tanson
Justizministesch vun déi Gréng

RTL

Gilles Dhamen

1er Conseilléier am Educatiounsministère

RTL

Charel Schmit

Ombudsmann fir Kanner a Jugendlecher (OKaJu)

RTL

Stefan Braum

Professer fir Strofrecht op der Universitéit Lëtzebuerg
Vun 2012 bis 2017 Doyen Droits- Fakultéit

RTL

Kloertext leeft am Prinzip all zweeten Donneschdeg um 20 Auer op RTL Télé Lëtzebuerg - direkt nom Journal. Op RTL.lu an iwwert d'App streame mir de ganze Programm vun RTL Télé Lëtzebuerg. Dir kënnt de Kloertext also och am Livestream suivéieren an dono am Replay an am RTL Play nach eemol kucken oder consultéieren, respektiv kommentéieren. (Et kann awer e bëssen daueren, bis d'Emissioun no der Diffusioun komplett fir den Internet konvertéiert ass. Merci fir Äert Versteesdemech.)