Gespaant gouf op den éischten ëffentlechen Optrëtt vum Baby Sussex gewaart. Elo ass och de Numm eraus, et heescht Archie Harrison Mountbatten-Windsor.

E Méindeg koum d'Nouvelle, dass de Puppelche vun der Herzogin Meghan a Prënz Harry gesond a monter um 5.26 Auer moies fréi an enger Luxus-Klinik op d'Welt komm ass. Ma eréischt am Nomëtteg gouf d'Gebuert vum klenge Prënz offiziell gemaach.

Dat war do schonn e klore Statement vun de frësch gebakenen Elteren: Anescht wéi de Prënz William a d'Catherine, déi scho kuerz no der Gebuert hir Kanner presentéiert hunn, hu si decidéiert, sech domat Zäit ze loossen. Dat hate si awer schonn am Virfeld annoncéiert.

Zwee Deeg no der Gebuert hunn de Prënz Harry a seng Fra Meghan hire klenge Bouf eng éischte Kéier der Ëffentlechkeet presentéiert. Eltere sinn, wär en „Dram“, sot d'Koppel e Mëttwoch an der Mëttegstonn op Schlass Windsor. De Prënz Harry hat de Puppelchen um Aarm.

Den Numm vum klenge Bouf gouf dann e Mëttwoch am fréien Owend bekannt ginn, de klenge Jong heescht Archie Harrison Mountbatten-Windsor. Den Titel "Prënz" sollt d'Kand awer net kréien, esou e Spriecher vum Buckingham-Palace zu der DPA.