Op dësem Dënschdeg ass den US-amerikanesche Multimilliardär Jeff Bezos an der Rakéit New Shepard vu senger Firma Blue Origin an de Weltall geflunn.

Nom Richard Branson war et en Dënschdeg de Jeff Bezos, deen an de Weltall geflunn ass. De Grënner vun Amazon a räichste Mann op der Äerd ass mat enger Rakéit geflunn, déi vu senger anerer Firma Blue Origin entwéckelt gouf. Am Ganzen huet de Fluch eppes iwwer 10 Minutte gedauert, dovunner sinn de Milliardär a seng Begleeder fir ongeféier 4 Minutten am Weltall geschwieft.

Nieft dem Jeff Bezos sengem Brudder Mark waren och déi jéngst an déi eelste Persoun, déi bis elo am Weltall waren, mat u Bord. Dat sinn den 18 Joer ale Student Oliver Daemen, dee fir säin Ticket an den All bezuelt huet, an déi 82 Joer al Pilotin Wally Funk als Éieregaascht. En detailléierten Artikel zu de Passagéier a speziell zum hollännesche Student fannt Dir hei.

RTL

© Image by  Blue Origin / Twitter

De Start vun der Rakéit war fir 8 Auer moies geplangt (15 Auer eiser Zäit). Si ass an der texanescher Wüüst gestart a koum op eng Geschwindegkeet vun 3200 Kilometer an der Stonn.  No 2 Minutten a 45 Sekonnen huet d'Kapsel sech vun der Träger-Rakéit New Shepard geléist an ass weider bis zum héchste Punkt, 100 Kilometer iwwer dem Mieresspigel, geflunn. Nodeems de Bezos a seng Passagéier 4 Minutten am Weltall geschwieft sinn, koum d'Kapsel zréck an d'Äerdatmosphär, wou se vun dräi risege Fallschierm ofgebremst gouf an nees an der Wüüst gelant ass. De ganze Prozess leeft automatesch, e Pilot gouf net gebraucht.

De Jeff Bezos huet sech mat sengem Fluch e Liewensdram, wéi en an engem Instagram-Video verréit, erfëllt. D'Äerd vum Weltall aus ze gesinn, "verännert een. Et verännert d'Relatioun zu dësem Planéit an zur Mënschheet". Den Amazon-Grënner huet bei sengem Projet vun engem "Abenteuer, an et bedeit mir immens vill" geschwat.

Den 11. Juli war och de Britt Richard Branson mat sengem SpaceShipTwo schonn an den All geflunn, wouduerch hien d'Course vun de Milliardären an de Weltraum fir sech entscheede konnt. Am Géigesaz zum Richard Branson erreecht den Jeff Bezos mat senger Kapsel awer déi sougenannte Kármán-Linn op 100 Kilometer iwwer dem Mieresspigel, déi vu munchen Experten a vum US-Amerikaner selwer als Grenz zum Weltall ugesi gëtt. Fir d'Nasa verleeft dës Grenz awer just bei 80 Kilometer iwwer dem Mieresspigel, et kann een also driwwer streiden, wie lo schlussendlech den éischte Milliardär am Weltraum wäert sinn.