E Samschdeg an e Sonndeg stoung Ettelbréck ganz am Zeeche vun de Feierlechkeeten vu 75 Joer Liberatioun.

No enger Usproch vum President Jos Tholl konnten d'Visiteuren e Samschdeg am Pensionat St. Anne déi éischt Fotoausstellung kucken. Duerno goung et weider duerch d'Foussgängerzon, wou vill Gefierer a Krichszeenen opgebaut waren. D'Leit an den Uniforme stounge Ried an Äntwert.

Am Gemengenhaus war och eng grouss Fotoausstellung, mat Bréiwer an originale Plakater. Och do souze Leit, déi de Visiteuren Erklärunge ginn hunn. An der Gemeng goufe Gadgeten a Bicher zum Thema Krich verkaf.
Annerhalleft Joer war een domadder beschäftegt, fir dëst Evenement op d'Been ze stellen.

Fir sou munch Awunner war et mat Sécherheet e komescht Gefill, fir Panzeren an de Stroosse vun der Heemecht ze gesinn. Déi Zeenen, déi de Samschdeg zu Ettelbréck duergestallt goufen, mussen an Erënnerung behale ginn, fir dass esou ee Krich net méi virkënnt.

Um Sonndeg

E Sonndeg de Moie sinn d'Invitéë vum Buergermeeschter empfaange ginn an uschléissend war eng reliéis Zeremonie an der Kierch zu Ettelbréck. Dem Generol Patton seng Enkelin war och hei an huet mam Amerikaneschen Ambassadeur eng Gedenktafel vum General Patton ageweit. Duerno goufe Blumme beim Monuments aux Morts néiergeluecht.

Um Sonndeg de Mëtteg goung et weider mat enger klenger Gedenkfeier beim Patton-Denkmal, ier um 15.30 de Cortège duerch Ettelbréck mat uschléissend engem Concert vun der US Army Band war.

Et war e ganz schéint Event an et krut een nëmme gutt Echoen. De Patton-Musée mam President Jos Tholl a senge vill fräie Mataarbechter haten eng super gutt Aarbecht geleescht. Vill Organisatioun war gefrot a vill Leit a Clibb hu matgemaach an d'Helene Patton, dem Generol Patton seng Enkelin, war sichtlech geréiert. Spéitstens elo gëtt nees vun der Befreiung geschwat, wat bewierkt, dass et net vergiess gëtt.