De Premier Xavier Bettel ass iwwerwältegt iwwert d'Solidaritéit ënnert de Lëtzebuerger, dobäi awer och erschreckt iwwert d'Bild vu Verwüstung nom Tornado.

E Samschdeg de Moien géint 9.30 Auer war eng Pressekonferenz mat ë.a. dem Aarbechtsminister Dan Kersch an dem Direkter vum CGDIS dem Paul Schroeder.

Um Samschdeg den Owend um 20 Auer koum de Regierungsrot ënnert dem Premier Xavier Bettel zesummen, fir iwwer weider Moossnamen an Hëllefen ze diskutéieren. Dono gouf et Informatiounen op enger Pressekonferenz.

VIDEO: Tornado zu Péiteng a Käerjeng: Pressekonferenz am Replay
Kuckt hei déi ganz Pressekonferenz am Replay.

Eng vun den éischten Informatiounen, déi een op der Pressekonferenz gewuer gouf, war, datt d'Regierung eng Versammlung fir d'Bierger vu Käerjeng a Péiteng organiséiert gëtt. Dat Ganzt zu Péiteng an déi Betraffe vu Käerjeng gi mat Busser eriwwer transportéiert. Dann huet de Minister Dan Kersch nach den Asaz vun all de Leit, déi um Freideg gehollef hunn, gelueft.

Weider huet hie präziséiert, datt d'Inneministesch Taina Bofferding esou wéi de Premier Xavier Bettel hir Vakanz ofgebrach hunn an um Wee zeréck op Lëtzebuerg sinn. De Grand-Duc Henri, de Premier an d'Inneministesch waren um Samschdeg de Mëtteg dann och op der Plaz an hu sech en éischten Iwwerbléck verschaaft. Virdrun hu si déi Blesséiert am Centre Hospitalier Emile Mayrisch besicht.

VIDEO: De Grand-Duc Henri huet sech déi betraffe Regioun ugekuckt
VIDEO: De Xavier Bettel ass erschreckt iwwert den Zoustand
VIDEO: Inneministesch Taina Bofferding mat éischten Impressiounen

19 Leit goufen um Freideg den Owend blesséiert, 2 Persoune koumen an d'Spidol. Eng Persoun ass nach am kriteschen Zoustand, nodeem si en Häerzinfarkt gemaach huet.

A béide Gemenge sinn zesummegezielt eng 80 bis 100 Haiser aktuell net bewunnbar. Um Freideg den Owend waren eng 200 Pompjeeë a 40 Policebeamten an der betraffener Regioun am Asaz. 60 Leit hu bis elo misste relogéiert ginn, 20 Persounen aus der Péitenger Gemeng, 40 vu Käerjeng. Sollten Haiser als onbewunnbar deklaréiert ginn, mussen d'Gemenge Solutioune fir dës Leit fannen.

Da gëtt et an der Regioun Problemer mat den Héichspannungsleitungen. 4 Maste sinn ëmgeknéckst. Hei ass e Geforepunkt, well d'Stroumleitungen erofhänken. Aus deem Grond sinn dann och d'Geschäfter an der Géigend zou. D'Firma Sotel ass aktuell am Gaangen, fir alles ofzesécheren. Dohier bleift och de Rondpoint Biff zou, well et ze geféierlech ass. Och tëscht Lénger a Käerjeng bleift weider gespaart.

Och d'Botze vun de Stroosse kann daueren. Als éischt géif een elo emol déi wichteg Stroosse raumen a botzen, dono dann all déi aner. D'Arméi gouf mobiliséiert, fir a béide Gemengen ze hëllefen. An enger éischter Phase war rieds vun 20 Mann, déi awer nach opgestockt sollte ginn. Vun e Samschdeg de Moien 9 Auer u ware se am Asaz. 40 Mann waren um Samschdeg de Mëtteg zu Péiteng an zu Käerjeng fir ze hëllefen. Et ass geplangt, fir d'Zaldoten direkt e puer Deeg an den Uertschaften ze loossen, fir hei d'Leit an déi lokal Autoritéiten z'ënnerstëtzten.

VIDEO: D'Arméi ass als Appui vum CGDIS am Asaz

Och d'Gemengenaarbechter an d'Pompjeeë sinn nach ëmmer am Asaz. Eng 50 Leit vun der Péitenger Gemeng géifen aktuell hëllefen, esou de Pierre Melina. Och hien huet d'Noperen, déi gehollef hunn, gelueft an huet hinne Merci fir hiren Asaz gesot. De Stuerm hätt zu Rodange ugefaangen a wier iwwer Rolleng op Péiteng gezunn. D'Awunner aus der Grenzgemeng sinn an Hoteler relogéiert, d'Sportshal Bim Diederich gouf net gebraucht.

De Vertrieder vun der Käerjenger Gemeng Fränk Pirrotte huet da präziséiert, datt et zu Käerjeng ronderëm d'Biff grouss Problemer gëtt. Hei sinn d'Haiser net méi bewunnbar. 40 Leit goufe relogéiert, de Gros vun hinnen an Hoteller. Bis den 19. August bleiwe mol sécher 25 Leit an den Hoteller, 15 weider betraffe Persoune konnte bei Familljemember ënnerkommen. Hie präziséiert dann och nach, datt scho weider Gemengen hir Hëllef an Ënnerstëtzung ugebueden hunn.

D'Gemeng Käerjeng huet dann och eng Helpline ageriicht, wou d'Leit sech kënne mellen, wa si Problemer wéinst dem Tornado hunn. Och sollen d'Awunner dohinner uruffen, wa si wëssen, datt hiren Noper an der Vakanz ass, ma säin Haus beschiedegt gouf. D'Nummer wier hei de 621 455 717 respektiv geet et och via Mail op helpline@kaerjeng.lu

VIDEO: Grousse Schued zu Käerjeng an zu Péiteng

De Groussherzog huet sech dann och wéi annoncéiert, e Bild vun der Situatioun gemaach.

Vill Leit hu sech da gefrot, wisou de Gouv-Alerte net ausgeléist gouf. Hei sot de Minister Dan Kersch, datt et fir dës Situatioun net méiglech gewiescht wier. En Tornado wier net virauszegesinn an et wier alles esou kuerzfristeg a séier passéiert, datt een d'Leit net am Virfeld konnt warnen. D'Applikatioun géif awer elo fir aner Saachen, notamment fir d'Leit z'informéieren, genotzt ginn.

AUDIO: Den Dan Kersch iwwer GouvAlert

Reaktioune vun der Pressekonferenz

VIDEO: Den Dan Kersch zitt Bilan
No der Pressekonferenz iwwert den Tornado zu Péiteng a Käerjeng huet de Minister Bilan gezunn.
VIDEO: De Paul Schroeder zitt Bilan
Den Direkter vum CGDIS iwwert d'Situatioun nom Tornado.