A Presenz vum Xavier Bettel huet sech d'Kontrollkommissioun vum Srel e Freideg eng 2. Kéier mam méiglechen Dateleak beim Geheimdéngscht beschäftegt.

Eppes méi wéi eng Stonn en Donneschdeg, eppes méi wéi annerhallef e Freideg an nach eng Sëtzung e Freideg: De méiglechen Dateleak beim Geheimdéngscht, vun deem mer Iech de 6. November geschwat haten, dierft d'parlamentaresch Kontrollkommissioun vum Srel um Enn an 3 Sëtzunge beschäftegt hunn.

E Freideg war och de Xavier Bettel an d'Reunioun beim Geheimdéngscht komm. No der Reunioun huet de Premier zwar keng Ausso gemaach, dofir awer d'Kommissiounspresidentin.

Fir d'Martine Hansen géif een alles maachen, fir d'Leit ze schützen, déi beim Geheimdéngscht schaffen: „...an och alles maachen, fir ze evitéieren, dass se iergendwéi a Gefor geroden. Mir sinn awer och nach haut [Freideg] net grad fäerdeg ginn. Mir hunn den nächste Freideg [20. November] eng nächst Versammlung, déi souwisou aberuff gi war. Do wäerte mer dëse Sujet nach eng Kéier um Ordre du jour hunn, fir hei de Suivi ze maachen.“

D'CSV-Fraktiounscheffin wollt och festhalen, dass et keen Dateleak war: „Et ass u sech ee Problem oder eng Faille wéinst dem informatesche System, well u sech do den SRE änlech gehandhaabt gëtt wéi all déi aner Verwaltungen.“

De Staatsminister, deen e Freideg wéi gesot och an d'Kommissioun komm war, wär mat de Konklusiounen, déi bis dato gezu goufen, zefridden: „Fir de Rescht misst dir hien da froen, wat hien dozou seet.“

E Freideg allzäit näischt, well de Premier Xavier Bettel huet, nodeems hien d'Reunioun kuerz virun deenen anere verlooss huet, léif gewénkt, mä keng Ausso gemaach.

Dem Martine Hansen no hëlt een de Sujet ganz seriö: „...well d'Sécherheet hei vun de Leit eis wierklech um Häerz läit. Ähnlech gesäit dat natierlech och de Premier, an dofir ass en och de Mëtteg [Freideg] direkt komm.“

Et géif een hoffen, e Freideg Léisungen ze fannen, an déi dann och op den Dësch ze leeën, sou d'Kommissiounspresidentin.

Am Reportage vum 6. November goung et ëm eng 3 Säite laang Lëscht vun ca. 80 Mataarbechter vum Geheimdéngscht, déi e Staatsbeamten, dee bei de Srel wollt schaffe goen, erstelle konnt. Hien hat de Geheimdéngscht an d'Politik heiriwwer an d'Bild gesat, ma d'Reaktiounen dorop waren opgereegt-nervös, respektiv zimmlech inexistent.