1.100 Interventioune an annerhallwem Joer, dorënner 150 Mol d'Police geruff
Op der Stater Gare ass also elo op en Neits eng grouss Diskussioun ronderëm déi privat Patrullen am Gaangen.
Zu Déifferdeng goufen där Sécherheetsbeamte scho virun annerhallwem Joer engagéiert, wat deemools am Summer 2019 zimmlech ënnergaange war. De Pierre Jans huet mam Déifferdenger Schäfferot iwwer d'Erfarunge mat private Patrullen an hirer Stad geschwat.
Déifferdeng hätt een Haaptproblem gehat, een Hotspot, wann ee sou wëll. De CSV-Schäffe Robert Mangen schwätzt vum Parking am Agang vun Déifferdeng. Vun do aus féieren Trapen erof an en Tunnel. Alternativ gëtt et e Lift. Da kann een ënnert de Gleiser op déi aner Säit trëppelen. A Richtung Park Gerlach. De Robert Mangen, dee fir d'Sécherheet zu Déifferdeng zoustänneg ass, erkläert: "Et ass eng relativ donkel Plaz, relativ ageengt. Dat ass fir d'Leit net esou sympathesch, fir dann eleng duerch den Tunnel ze goen. Dofir hu mir ons entscheet, fir do e bëssen ze hëllefen. Elo si Leit do, déi eventuell mat hinnen duerch den Tunnel kënne goen."
Zanter annerhallwem Joer maachen elo owes zwee Sécherheetsbeamte vun enger privater Firma hiren Tour duerch Déifferdeng. Déi gréng Buergermeeschtesch Christiane Rausch schwätzt vun engem gefillter Onsécherheet bei engem Deel vun den Awunner, mee net nëmmen dovun: "Mir hu vill Flächen. Mir hunn am Zentrum e Park a vill Parke ronderëm. Mir hu Schoule mat Häff an do ass ganz vill futti gemaach ginn. Et ass haaptsächlech fir dee Vandalismus ze ënnerbannen."
An änlech wéi op der Stater Gare wär zu Déifferdeng och d'Drogekriminalitéit e Problem, wann och a méi engem klenge Stil: ''Et geet och net drëm, deen ze niéieren. En ass do."
Déi privat Patrullen hunn an deene leschten 18 Méint méi gemaach, wéi just ze spadséieren. Ronn 1.100 Mol ware si intervenéiert. Iwwer 650 Mol wären dat awer just Klengegkeete gewiescht, rapportéiert de Robert Mangen. 350 Mol wären Drogen an Alkohol am Spill gewiescht. 150 Mol hunn d'Beamten d'Police misse ruffen. D'Sécherheetsbeamte géifen hei zu Déifferdeng net koordinéiert mat der Police zesummeschaffen. A si hätten hire Kompetenzberäich ënnert dem Stréch och respektéiert, seet den zoustännege CSV-Schäffen: "Mir hunn awer elo u sech relativ gutt Erfarunge gemaach. Si si relativ dezent. Et si mol heiansdo Incidenten, déi virkommen. Si hu sech awer relativ zeréckgehalen. Do kann een net kloen."
An als Client hätt ee jo eng Kontroll driwwer, esou de Robert Mangen. Allerdéngs hofft den Déifferdenger Schäfferot, dass d'Police verstäerkt gëtt. D'Privat Sécherheetsbeamte goufen als eng Iwwergangsléisung engagéiert. Virun annerhallwem Joer.
Syvicol besuergt
De Syvivol ass "besuergt" iwwert d'Polemik, déi iwwert den Engagement vun enger privater Security-Firma an der Stad entstanen ass.
PDF: Prise de position vum Syvicol
De Syndicat vun de Gemenge weist sech positiv agestallt, vun esou Engagementer, och wann dat keng Léisung à long terme géif duerstellen.
Domat stäipt de Syvivol der Stater Gemeng de Réck an ënnersträicht, dass et eng "moralesch Flicht" vun de gewielte Gemengevertrieder wier, fir géint d'Onsécherheetsgefill vun de Bierger eppes entgéint ze setzen.
Den Emile Eicher erkläert d'Normalitéit vum Asaz vu private Sécherheetsagenten a verbënnt dëst mat engem Appell. D'Police an hirem Rôle muss kënne weiderschaffen. Ganz dacks ass et awer esou, datt net genuch Beamte sur place wieren. Do misst d'Regierung hëllefen.
De Syvicol seet sech allemol prett, fir dem Minister Kox ze hëllefen no Léisungen ze sichen, wat de Probleem vun der Onsécherheet an de Gemengen ugeet. Allemol missten d'Security-Beamten encadréiert ginn - eng Formatioun, déi och GDL Security vun der Police offréiert gi war, mee dunn annuléiert gouf.
