D'Familljeministesch hätt hir Responsabilitéit net geholl, dat géing de Rapport confirméieren a si misst elo Konsequenzen zéien, sou de Michel Wolter.

Méintelaang keng Recommandatiounen un d'Haiser, onprezis Messagen, bei deenen den Auteur onkloer war, kee Kriseplang nom Summer 2020. Fir d'Oppositioun an der Chamber confirméiert de Waringo-Rapport iwwert d'Alters- a Fleegeheemer, datt d'Familljeministesch Corinne Cahen hir Aarbecht net gemaach huet. Si hunn en Dënschdeg de Mëtteg geschlossen hir Demissioun gefuerdert.

Fir déi 4 Oppositiounsparteien ass kloer: D'Familljeministesch huet hir Responsabilitéit net iwwerholl.

Mir kommen zur Conclusioun, datt op Grond vun den Obligatioune vun den Artikele 6 an 9 vum AFST-Gesetz d'Familljeministesch hir Aarbecht an eiser Aen net sou gemaach huet, wéi se dem Geescht an dem Buschtaf vum Gesetz hätt misse maachen, kritiséiert den CSV-Deputéierte Michel Wolter.

Fir de Fred Keup vun der ADR war da kloer, datt d'Regierung a Persona vun der Ministesch Cahen net dat gemaach huet, wat se ugangs versprach hat. D'Regierung ass ugetrueden an huet gesot, déi vulnerabelst Leit misste geschützt ginn, dat wier Prioritéit. Dat ass awer hei net anstänneg geschitt. An d'Madamm Cahen huet dofir déi politesch Responsabilitéit.

Myriam Cechetti vun déi Lénk gesäit hei e Problem tëscht de Koalitiounspartner DP an LSAP. Déi Divergenz op där Fro tëschent Santé a Famill, tëschent DP an LSAP, huet schlussendlech dozou gefouert, datt d'Responsabilitéit einfach un d'Haiser weider gi gouf.


Kritik vum Pirat Sven Clement gouf et, well d'Corinne Cahen wärend der Kris quasi verschwonne war. D'Familljeministesch war wärend dëser Kris bis elo sou onpresent, datt souguer d'Fro am Rapport opgeworf gëtt, ob een net misst iwwert eng nei Opdeelung vun de Ressorten nodenken an der Santé einfach direkt dee ganze Beräich vun de Soine fir eeler Leit iwwerginn.

D'Familljeministesch hätt d'Vertraue vun der Oppositioun net méi. Den CSV-Deputéierte Michel Wolter huet eng deementspriechend Motioun am Numm vun der CSV, der ADR, de Piraten an déi Lénk deposéiert.

Fir op all déi Erausfuerderungen anzegoen, brauche mer e staarke Minister. An dat Vertrauen hu mir, och a besonnesch nom Rapport vum Här Waringo net méi an d'Madamm Cahen. Si huet d'Vertrauen net an der Politik an ech mengen, datt se et och net huet an den Haiser. An ech mengen, datt dat däitlech aus dem Rapport vum Här Waringo erausgeet. D'Spëtze vun deene 4 Oppositiounsfraktiounen hu sech gëschter an haut concertéiert, si hu sech op eng gemeinsam Positioun gëeenegt, dat nodeems jiddwereen dat mat senge Leit diskutéiert huet. A fir och do mat der Legendenbildung ee fir allemol opzehéieren well ech soen, dass ech a kengem vun deene Gespréicher gëschter an haut dobäi war. Ech hunn awer den Optrag kritt, si hu mech gebieden, am Numm vun deene véier Fraktiounen, a well mir als CSV nun eemol déi stäerkste Fraktioun hei sinn, eng Motioun ze deposéieren, déi d'Madamm Minister opfuerdert, hir politesch Responsabilitéit ze huelen an dem Grand-Duc hir Demissioun ze froen.

D'Gesondheetsministesch Paulette Lenert huet op d'Motioun reagéiert: Wann d'Corinne Cahen misst goen, da misst déi ganz Regierung goen. D’Familljeministesch Corinne Cahen wollt an der Chamber net op d’Fuerderung vun der Oppositioun no hirer Demissioun reagéieren. Si huet dat dunn en Dënschdeg den Owend op enger Pressekonferenz gemaach.

D'Motioun gouf mat 31 Nee-Stëmmen ofgeleent. 29 Deputéiert waren dofir.

Corinne Cahen wëll an Zukunft Ethikcomité fir all ethesch Froe consultéieren

D'Corinne Cahen huet an der Chamber Stellung zum Waringo-Rapport iwwert d’Krisegestioun an den Alters- a Fleegeheemer geholl. An Zukunft soll en Ethikcomité an allen ethesche Froen, déi d’Awunner an dëse Strukture concernéieren, kënne consultéiert ginn an net just, wéi bis ewell virgesinn, a Froen iwwert d’Liewenssënn. D’Evaluatioun vun der Qualitéit vun de Strukture soll uniformiséiert ginn. Et soll e Mediateure fir dee Secteure kommen an et soll eng permanent Kommissioun agefouert ginn, déi der Regierung Recommandatioune mécht.

Mir ware vill um Terrain, och wann net ëmmer alles dokumentéiert gouf, sot hirersäits d'Gesondheetsministesch Paulette Lenert. An der Kris hätt een dat Administratiivt zréckgeschrauft. D'Kommunikatioun hätt awer sécherlech nach kéinte besser sinn. Um Fall vun Nidderkuer hätt een awer och gesinn, datt et grouss Ënnerscheeder tëschent de Strukture ginn an datt Renovatiounen elo misste prioriséiert ginn. Si géing iwwerdeems regrettéieren, datt d'mental Gesondheet, besonnesch vum Personal un der Front, an de leschte Méint ze kuerz komm wier, sou d'Paulette Lenert.

Cahen: Verschidde Saachen hätten natierlech kënne besser gemaach ginn (RTL-Interview um Méindeg)

D'DP-Familljeministesch Corinne Cahen huet am RTL-Interview op de Waringo-Rapport iwwert d'Infektiounsketten an Alters- a Fleegeheemer reagéiert.

Verschidde Saachen hätten natierlech kënne besser gemaach ginn, am Allgemenge seet de Rapport awer, datt ganz gutt geschafft ginn ass, sou d'Corinne Cahen um Bord vum Bilan Parlamentaire vun der DP e Méindeg.

Op de Constat hin, datt de Familljeministère tëscht Juni a Februar keng nei Recommandatiounen un d'Alters-a Fleegeheemer erausginn huet, sot d'Corinne Cahen, datt déi al Recommandatiounen awer an där Period weider gülteg waren. An där Zäit wier de Ministère awer weider mat de Famillen a mat de Strukturen a Kontakt gewiescht. Et wier och richteg, datt verschidde Recommandatioune fir eenzel Haiser schwiereg z'interpretéiere waren, huet d'Corinne Cahen zouginn, mä dat géing och dorunner leien, datt d'Haiser all verschidde sinn. Am Altersheem zu Nidderkuer zum Beispill ginn et 60 Zëmmeren ouni Toilette a wéi hätt een do sollen d'Leit confinéieren, huet d'Ministesch gefrot. Donieft hätt een am Ufank vun der Kris net alles iwwert de Virus gewosst.

De Rapport géing awer och Usätz gi fir d'Zukunft an d'Familljeministesch wëll nach virum Summer Amendementer zur Reform vum sougenannten ASFT-Gesetz presentéieren. Dat Gesetz reegelt d'Relatioun tëscht dem Staat an den Organisatiounen am sozialen, familiären an therapeutesche Beräich. D'Zil vun der Reform wier et, manner op d'Quantitéit ze setzen a méi op d'Qualitéit an ëmmer den Equiliber ze fannen tëscht dem Schutz virum Virus an awer och vun der Fräiheet, sou d'Corinne Cahen.

1958 Infektiounen an Alters- a Fleegeheemer, 345 Doudesfäll

"Am Ganzen hu mer 113 Cluster festgestallt, an deenen Haiser, wat enger Moyenne entsprécht vun 1,6 Cluster pro Haus. D'Gréisst vun de Cluster war ëm déi 27,7 Fäll an dovunner waren ongeféier 2/3 Bewunner an 1/3 Personal. D'Duerchschnëttsdauer vun engem Cluster war ongeféier e Mount", sou de Joël Mossong, Epidemiolog an der Santésdirektioun.

Dobäi wier a 54 Prozent vun de Fäll e Resident fir d'éischt positiv getest ginn an a 40 Prozent vun de Fäll e Member vum Personal.