Op enger Pressekonferenz e Sonndeg de Moien ass den Direkter vun den Operatiounen, den Thierry Fehr, op d'Detailer vun enger Maniff an der Stad agaangen.

Politesch Reaktiounen op Maniff / Rep. Claudia Kollwelter

Den Operativ vun der Police muss adaptéiert ginn, nodeems et e Samschdeg zu Demonstratiounen a Vandalismus virum Premierminister sengem Doheem koum. Dat sot de Minister fir d'bannenzeg Sécherheet Henri Kox e Sonnddeg de Moien am RTL-Interview am Journal.

"Wichteg bei hirer ganzer operativer Ëmsetzung war de Mënsch, dass de Mënsch an de Schutz komm ass an dofir ass jo och d'Corinne Cahen vun der Police opgefuerdert ginn fir mat ze goen, fir wierklech de mënschleche Schutz virun alles ze stellen, mee et ass net ze toleréieren, dass se virun den Haiser demonstréieren an do wäerte mer och den Operativ mussen upassen.”

Et wier e gréissere Policedispositif e Samschdeg am Asaz gewiescht an et hätt een op eenzel Zenarie reagéiert. Esou huet den Thierry Fehr, den Direkter vun den Operatioune vun der Police hiren Asaz an der Stad beschriwwen.

Op enger Pressekonferenz e Sonndeg de Moie gouf betount, datt d’Manifestatioun net ugefrot war, mee via sozial Medien en Opruff gemaach gouf, sech um Glacis zesummen ze fannen. Doduerch, datt et keng klassesch Manifestatioun war, déi ugefrot gouf, hätt een och net wéi gewinnt en Uspriechpartner vu Säite vun den Organisateure gehat. D’Police wier net driwwer informéiert gewiescht, wéi de Programm vun där Maniff géif oflafen. Et wier awer eng Risikoaschätzung am Virfeld gemaach ginn an d’Manifestatioun wier als seriö ageschat, esou den Thierry Fehr.

"Wat och bedéngt, datt mer e fir Lëtzebuerger Verhältnisser relativ konsequente Polizeidispositif en place haten, wou och Renfort aus dem ganze Land aus aneren Unitéite mat dobäi war, deen zousätzlech bei déi Patrulle bäikomm ass, vun der Regioun Lëtzebuerg. Dat heescht et ass an deem Sënn ganz kloer och scho sou ageschat ginn.”

Am Ufank wieren eng 2.000 Leit versammelt gewiescht, ma et wieren ëmmer nees Gruppen dobäikomm an et hätt een am Moment misse reagéieren.

Fir Lëtzebuerger Verhältnisser wier en groussen Dispositif vu Beamten en place gesat ginn. En Deel vun de Manifestanten hätt Grenzen iwwerschratt an dat wier net acceptabel, huet den Thierry Fehr vun der Police nach ënnerstrach. Et hätt ee bis elo keng confirméiert Informatiounen iwwert d'Bedeelegunge vu radikale Gruppen un der Demonstratioun, ma dat wier awer eng Piste op där ee géing enquêtéieren.

De Minister vun der bannenzeger Sécherheet Henri Kox huet ervirgestrach, datt kenger Persoun eppes geschitt ass.

"Dat ass elo scho mol en éischt Zil, dat mer ereecht hunn, dat wierklech keen zu Schued komm ass. Zweetens ass awer déi Hetz, deen Opruff op Hetz, deels richteg Nazismus a wat alles gewise ginn ass, do sinn eis Enquêteure ganz intensiv um schaffen. An do wäer en ausféierleche Rapport un d'Justizautoritéite weider goen, déi dann hir néideg Konsequenzen doraus zéien. Et kann net toleréiert ginn, datt hei Vergläicher gezu gi mat Zäiten, déi déi schwäerzte vun der ganzer Weltgeschicht waren an dofir wäert alles dru gesat ginn, fir hei déi néideg Leit dann och zu Rechenschaft ze zéien.”

D‘CSV-Fraktioun invitéiert iwwerdeems de Policeminister Henri Kox, fir sech zu den Incidente vun e Samschdeg virun der Chamber ze äusseren. Den Minister vun der bannzegter Sécherheet hätt selwer de Sonndeg de Moien op der Pressekonferenz dovunner geschwat, dass e groussen Debat am Parlament misst gefouert ginn. D‘CSV invitéiert den Henri Kox, fir dat dësen Dënschdeg, de 7. Dezember, ze maachen, sou steet et de Sonndeg de Mëtteg an engem Schreiwes vun der CSV-Fraktioun un de Chamberpresident Fernand Etgen.