De Premier Xavier Bettel huet sech en Dënschdeg de Mëtteg a senger Regierungsdeklaratioun an der Chamber iwwer d'Faite vum leschte Samschdeg geäussert.

Intoleranz, Haass a Gewalt hunn zu Lëtzebuerg keng Plaz. Et wäre Grenzen iwwerschratt ginn. Zeene wéi e leschte Samschdeg ginn net méi acceptéiert, sot en Dënschdeg an der Chamber - am Numm vun der Regierung - de Premier Xavier Bettel. Hien huet eng Deklaratioun gemaach, dat no de Virfäll bei enger net ugemellter Corona-Demonstratioun de Weekend.

"Mir acceptéieren net, datt d‘Gëlle Fra beschmotzt gëtt an datt den Holocaust verharmloost gëtt. Mir acceptéieren net, datt an der Stad randaléiert gëtt a Chrëschtmäert gestiermt ginn. Mir acceptéieren net, datt Leit agresséiert ginn a sech doheem net méi sécher fillen. Mir acceptéieren net, datt Journalisten un hirer Aarbecht gehënnert ginn."

Et géing ëm d‘Fundament vun eisem Rechtsstaat, sou de Staatsminister Xavier Bettel. Et géing een net all d‘Manifestanten an en Dëppe geheien. Et hätt ee mat enger Minoritéit ze dinn an et géing ee sech net intimidéiere loossen, sou de Premier.

Politeschen Discours huet sech ëmmer méi opgeheizt

Zesumme mat Police a Parquet wier ee sech eens, datt all Illegalitéit streng nom Gesetz misst sanktionéiert ginn. Den ëffentleche Raum dierft kee rechtsfräie Raum ginn, sou de Xavier Bettel. All Form vu Gewalt misst ënnerbonne ginn.

"Gewalt muss ënnerbonne ginn"

Et géif och mat alle legale Mëttele kontrolléiert ginn, och mat Identitéitskontrollen. Fir den nächste Weekend sinn direkt dräi Demonstratioune geplangt. Vum nächste Weekend u soll dowéinst och e Perimeter gëllen, an deem eng Manifestatioun däerf organiséiert ginn. Wee sech doraus beweegt, wier an der Illegalitéit.

Neie Perimeter

D'Demokratie géif net virun engem gewaltbereeten, minoritäre Grupp an d'Knéie goen. De Premier huet derzou opgeruff, zesummen als Gesellschaft géint Polariséierung a Radikaliséierung virzegoen.

En Aktiounsplang soll kommen, huet de Premier annoncéiert. E kéim villäicht e bëssen ze spéit fir déi aktuell Situatioun. Mä et wär ni ze spéit, et besser ze maachen.

Aner Reaktiounen aus der Chamber

Datt et eng Minoritéit vun de Manifestante war, déi de Weekend gewaltbereet waren, gouf en Dënschdeg an der Chamber ëmmer erëm betount. Donieft ass awer vun den Deputéierten och kloer dozou opgeruff ginn, net op Manifestatioune matzegoen, fir déi schonn am Viraus zu Haass a Gewalt opgeruff gëtt.

"Fräiheet ass kee Fräischäin, fir op Gewalt zeréckzegräifen, och net fir Leit, déi net averstane si mat de Mesuren", rifft d'Martine Hansen dozou op, sech vun de Gewaltdoten ze distanzéieren. D'Regierung hätt et verpasst, fir eng transparent Informatiouns-Campagne ze maachen, elo eng Impf-Woch wier einfach ze spéit, sou nach d'CSV-Deputéierte Martine Hansen. Ma och dëst géing op kenger Weis d'Virgoe vun de Leit e Samschden entschëllegen.

RTL

© Domingos Oliveira / RTL

Wéi d'Martine Hansen huet och den DP-Deputéierte Gilles Baum erënnert, dass ee net jiddereen an een Dëppen dierft geheien. Ma Leit, déi zu Haass opruffen an opstëppelen, missten och hir Responsabilitéit huelen, ass mat Bléck op den Deputéierte vun der ADR Roy Reding ze héiere gewiescht. De Gilles Baum huet dowéinst eng imminent Demissioun vum ADR-Deputéierte gefuerdert. Dës Fuerderung koum och vum LSAP-Deputéierte Georges Engel, deen och d'Virgoe vun der Police bemängelt huet.

Et wier gewosst gewiescht, dass et kéint zu Gewalt kommen, esou de Georges Engel. D'Police-Strategie wier awer un hir Limitte komm, well mat Deseskalatioun wier een net wäit komm. Dobäi hätt d'Police scho bei anere Maniffen hei am Land bewisen, dass ganz aner Dispositiffe kënnen opgestallt ginn. Déi Gréng Deputéiert Josée Lorsché begréisst an deem Kader och, dass d'Police fir déi nächst Manifestatioune méi en héijen Dispositif wëll zur Verfügung stellen.

RTL

© Domingos Oliveira / RTL

Ma wat geschitt ass, hätt een awer kënne virausgesinn, esou d'Nathalie Oberweis vun Déi Lénk, well ee scho méi laang eng gewësse Spannung konnt bemierken.

An et wier elo un der Zäit ze kucken, vu wou deen Nährbuedem hierkënnt. Et misst ee verstoen, wisou d'Mesuren zum Deel net acceptéiert ginn, wisou den Dialog gefeelt huet. "Wat geschitt ass, ass net vum Himmel gefall, mä an de leschte Méint gewuess", esou d'Nathalie Oberweis weider.

D'Deputéiert vun Déi Lénk huet awer betount, dass verstoen net gläichzesetzen ass mat excuséieren. Ma Déi Lénk géingen awer scho méi laang virun enger Spléckung vun der Gesellschaft warnen. D'Spannunge wiere virun allem mat de méi strenge Mesurë gewuess an et hätt een dobäi nëmmen nogekuckt. Verschidden Aussoe vu politescher Säit hätten an deem Prozess Ueleg an d'Feier geschott. Aussoen, wéi déi dass de net-geimpfte Leit d'Liewe soll méi schwéier gemaach ginn, wier e Beispill fir esou ee Fall. Pauschal Beschëllegunge bréngen dem Nathalie Oberweis no näischt. Ausserdeem wier et wichteg, dass d'Corona-Politik op medezinescher Basis fundéiert an net op enger politescher.

Donieft huet déi Lénk Deputéiert awer däitlech kritiséiert, dass den Deputéierte vun der ADR dozou bäigedroen hätt, d'Leit opzestëppelen, woufir hien elo seng Responsabilitéit misst huelen.

RTL

© Domingos Oliveira / RTL

Den ADR-Deputéierte Fernand Kartheiser huet sech vun den Aussoe vum Partei-Kolleeg Roy Reding an de Soziale Medien net kloer distanzéiert, ma awer gesot, dass et him just dorëms géing goen, dass d'Leit selwer sollen entscheeden, ob si wëlle geimpft ginn oder net.

Ausserdeem huet sech de Fernand Kartheiser, genee wéi déi aner Deputéiert, kloer géint Gewalt ausgeschwat an denoncéiert, wat de Samschde geschitt wier. "Jo zur Demokratie an Nee zur Gewalt eent eis an der Chamber", esou den ADR-Deputéierten. Seng Partei wier géint eng eesäiteg Scholdzouweisung. Et wier net an der Rei, dass Net-Geimpfte Leit beschëllegt ginn, well jiddereen usech de Virus ka weider verbreeden. "Mir sinn all mat Deel vun der Léisung", huet den ADR-Deputéierten dozou gesot. D'Leit solle mat Respekt behandelt ginn, da géing een och keng Radikaliséierung provozéieren.

RTL

© Domingos Oliveira / RTL

„Jiddereen huet d'Recht seng Meenung ze soen an ze demonstréieren, mee dat bréngt och Flichte mat sech“, huet zum Schluss da nach de Sven Clement vun der Piratepartei betount. Hien huet dann och dozou opgeruff, sech kloer ze distanzéieren, wann een op enger Demonstratioun ass an dann anerer ufänke Gewalt unzewenden oder den onpassende Verglach mam Holocaust maachen. Dat wier nämlech absolut net ze toleréieren.