"Mir sti virun enger komplizéierter Situatioun, d'Regierung ass sech dees bewosst", esou den Energieminister Claude Turmes.

Esou reagéiert den Energieminister Claude Turmes am Interview mat RTL op d'Annonce, datt de Stroum vum Januar un däitlech méi deier gëtt. Enovos huet vun enger Hausse vu 35 Prozent geschwat. Mir hunn nogefrot ob a wéi d'Regierung hëlleft.

Bis et eng definitiv Äntwert op déi Fro gëtt, muss ee sech nach e bësse gedëllegen.

Den Energieminister Claude Turmes: "Mir hunn den 2. September e Regierungsrot. Do ass dat um Ordre du Jour an den 8. September wäert ech zesummen mat enger Rei Ministeren net nëmmen eppes zu de Präisser soen, mä och zu der Spuercampagne. Mir wäerten den 2. September kucken wat mer kënnen de Leit awer och de Betriber an Aussiicht stellen fir hinnen entgéintzekommen."

De Claude Turmes kéint sech zum Beispill eng änlech Moossnam virstellen, wéi beim Gas wou d'Regierung d'Netzkäschten aktuell iwwerhëlt.

Claude Turmes: "Beim Gas war dat eng Gréisstenuerdnung vu 500 Euro um Joer. Dat heescht, dat ass eng substantiell Hëllef an et ass jo och esou, mir hu jo och aner Hëllefen respektiv Indextranchen. Dat heescht mir haten zwou Indextranchen, mir hunn den Ament de Crédit d'impôt an da steet den Ament jo och nach am Raum, ob eng nächst Indextranche virum Enn vum Joer oder ugangs d'nächst Joer."

Et misst een dat alles zesumme kucken, seet den Energieminister Claude Turmes, zesumme mam Statec.

Deen Ament géif een da gesinn, ob nach eng extra Hëllef néideg wier, oder ob déi aktuell Hëllefe géifen duergoen.

De Premier Xavier Bettel hat jo d'lescht Woch schonn annoncéiert, datt d'Regierung de Statec gefrot huet, fir seng Berechnunge fir Ufank September z'aktualiséieren, an datt op Basis vun deene Berechnungen eng Tripartite aberuff gëtt.

Hausse bei de Stroumpräisser

Et sinn net nëmmen d'Gaspräisser, déi ëm 80 Prozent an d'Luucht ginn, mä vum nächste Joer u gëtt och de Stroum méi deier. Et ass fir vill Stéit eng weider Hiobsbotschaft: Beim Stroum muss ee mat enger Hausse vun ongeféier 35 Prozent rechnen.

Stroumpräis geet erop / Rep. Dany Rasqué

Déi 35 Prozent dierfte pro Stot an der Moyenne 300 Euro d'Joer ausmaachen, seet de Claude Simon, dee bei Enovos responsabel ass fir d'Vente vun Energie. Hien explizéiert, datt dës Hausse mam méi deiere Gas zesummenhänkt. "De Stroum gëtt eben och zu engem Deel mat Gas produzéiert. De Gaspräis ass, wéi mer scho virdru soten, extrem an d'Luucht gaangen, dat huet dann och en Impakt op de Stroumpräis."

De Wanter iwwer gëllt et, net just Masutt a Gas ze spueren, mä och mam Stroum muss ee méi lues maachen. Et ass och net gewosst, ob et mat der Hausse vu 35 Prozent gedoen ass. Déi betreffen nämlech just d'Energie u sech. De Präis vum Stroum setzt sech awer aus méi Elementer zesummen.

"Mir schwätzen elo hei iwwert d'Energie, Dir hutt awer och nach Elementer wéi d'Netznotzungsentgeld an esou virun. Ob do elo eng Variatioun kënnt oder net, dat kann ech Iech net soen."

Eng vun de Léisunge sinn déi alternativ Energien, heescht et ëmmer erëm. Kuerzfristeg kënnen déi awer och net genuch kompenséieren. "Mir schwätze vun der Photovoltaik. Dir hutt natierlech d'Situatioun, Photovoltaik hutt Dir am Dag, hutt Dir am Summer. Et ginn Zäiten, do hutt Dir keng Photovoltaik, do musst der anescht Stroum produzéieren. Dir hutt Wandkraaft, wou vill drop geschafft gëtt, Waasserkraaft. Waasserkraaft natierlech an deem aktuelle Kontext mat der Dréchent ass dann och erëm méi e komplizéierte Sujet. Do gëtt wierklech drop geschafft a mëttelfristeg iwwert déi nächst Jore kann een dovunner ausgoen, datt een do wierklech vill erreecht."

Kuerzfristeg kann de Konsument sech dovunner awer och näischt kafen, well deen huet souwisou schonn e Lach am Portmonni.