Am September hat dat éischt Gebuertshaus hei am Land seng Dieren opgemaach, ma vun elo un dierfe hei keng Gebuerte méi duerchgefouert ginn.

Dat huet d'Gesondheetsministesch Paulette Lenert elo decidéiert, well et kee gesetzleche Kader dofir géif ginn. Zu Lëtzebuerg ass et zwar erlaabt, ausserhalb vun engem Spidol z'accouchéieren an d'CNS rembourséiert d'Fraise fir eng Hiewan pro Gebuert. Dem Ministère no gëllt dat awer just op Hausgebuerten.

Am Oktober gouf d'Ministesch an der Chamber op dës nei Offer opmierksam gemaach, wouropshin d'Santé sech de Centre de périnatalité ugekuckt huet. Elo dann d'Decisioun: d'Vir- an Nosuerg dierfen hei gemaach ginn, ma d'Gebuerte selwer net, bis e legale Kader do ass. Doru soll elo geschafft ginn.

"Dat ass och den Avis, deen ech kritt hu vum Conseil supérieur des professions de santé, dass am Moment déi gesetzlech Basis e Gebuertshaus net hiergëtt", esou d'Ministesch Paulette Lenert. "Et gëtt selbstverständlech d'Gebuert doheem, wann eng Fra de Choix mécht, fir doheem hiert Kand op d'Welt ze setzen, ka sech begleede loossen duerch eng Hiewan. Mä fir e richtegt Gebuertshaus als Service unzebidden, dat ass eppes dat eiser Interpretatioun no zu dësem Zäitpunkt de Maternitéë virbehalen ass. Mir hunn awer do ganz konstruktiv Gespréicher. Ech weess, dass vill Interessi do ass, net just vun deenen hei Leit, mä och aner Hiewanne si schonn op ons duerkomm, fir sech ze renseignéieren, a mir schaffen dodrun, fir d'Leit beieneen ze bréngen, fir e Kader ze setzen, fir dat ze reegelen."

Extrait Paulette Lenert

D'Hiewanne vu Bartreng hätten et besser fonnt, wa si weider esou kéinte schaffen, bis d'Gesetz do ass. Op d'mannst fir déi Fraen, déi wäit vun enger Maternité wunnen, sou d'Danielle Haag.

"Zum Beispill hu mer elo an där Woch tëschent Chrëschtdag an Neijoerschdag eng Fra um Termin, déi vu Veianen ass, déi eigentlech geduecht war, fir hei z'accouchéieren, wou mer dann elo effektiv bei d'Fra heem op Veianen musse fueren, fir hir déi Méiglechkeet ze ginn. Do ass dann natierlech d'Fro, ass et elo méi securiséiert bei der Fra zu Veianen oder hei vill méi no beim CHL. Mir hu gefrot, wéi laang e Samu géing brauche vu Bartreng an de CHL, dat si genee 4 Kilometer. D'Äntwert, déi vum CGDIS koum, war, si schécken d'Ambulanz vu Beetebuerg a wann déi net disponibel ass, schécke se déi vun Diddeleng, a mir missten ongeféier mat 40 Minutte rechnen, bis mer eng Ambulanz hätten. Wou mir och erstaunt waren, mä do froen ech mech dann, wéi laang mer se mussen am Viraus ruffen oder wéi mer eis mussen organiséieren, fir op Veianen ze kréien."

Extrait Danielle Haag

Zanter September wieren eng 40 Puppelcher am Gebuertshaus zu Bartreng op d'Welt komm, esou d'Danielle Haag. Um Donneschdeg de Moien koum vum Gebuertshaus d'Präzisioun, datt déi Kanner net zanter September 2022 bei hinnen op d'Welt koumen, mä datt bis ewell dëst Joer 3 Kanner zu Bartreng am Zenter op d'Welt koumen an eng 30 an de leschten 12 Méint doheem, also net an engem Spidol.

CGDIS reagéiert: Aussoe vu Madamm Haag entspriechen net der Realitéit

De CGDIS wiert sech géint Kritik vun der Hiewan Danielle Haag, datt et géif bis zu 40 Minutten daueren, bis eng Ambulanz disponibel wier.

Et wier net esou, datt bei enger Urgence zu Bartreng d'Ekippe vun Diddeleng oder Beetebuerg géifen an den Asaz kommen. Ma, éischter eng Ambulanz vu Mamer, aus der Stad oder eng déi am CHL am Transit oder grad an der Géigend wier.

Doduerch wier d'Zäit, tëscht Noutruff an Arrivée vun der Ambulanz, natierlech vill méi kuerz, wéi dat, wat d'Danielle Haag am Interview sot. Sou heescht et vun de Rettungsdéngschter.

Hei d'Schreiwes:

De CGDIS verfüügt iwwer 25 Asazzenteren mat Ambulanzen a kann och Gefierer déi ënnerwee sinn per GPS orten an wann néideg redirigéieren.

Esou dat am Fall vun enger Urgence zu Bartreng aner Asazzenteren wéi Beetebuerg oder Diddeleeng virdrun alertéiert géife ginn zB: Mamer, Lëtzebuerg oder eng Ambulanz déi grad am CHL am Transit wier.

D’Zäitpsann tëschent den Uruff um CSU-112 an d’Arrivée vun der Ambulanz sur Place géif sécherlech vill méi kuerz sinn wei dat wat an der Reportage behaapt gëtt.

Wat de SAMU ubelaangt, ginn et 5 Basen am Land, dorënner 2 an der Stad Lëtzebuerg (CNIS an ofwiesselend am Spidol vun Déngscht) esou dat och hei den Delai d’Arrivée wäit ënner 40 Minutten géif ausfalen.

Ech erënneren drun dat de CGDIS am Kader vum Plan National d’Orgnisation des Secours (PNOS) fir d’Zukunft viséiert a 15 Minutten iwwerall am Land nom Geschéien vun enger Urgence sur Place ze sinn.