Ee vun de gréisste Bauhäre vu Lëtzebuerg war e Samschdeg an der Emissioun Background am Gespréich.

„Mir maache sécherlech keng Abusen". Dat huet de Marc Giorgetti e Samschdeg de Mëtteg hei op RTL deklaréiert am Zesummenhang mat de Fonds d'investissement spécialiés, d'SICAV-FIS. Déi Fonge sti rezent am Mëttelpunkt vun der Kritik iwwert Steierongerechtegkeet, well ee mat esou Fonge ka laanscht Steieren op d'Plusvalue kommen. De Marc Giorgetti, dee selwer esou ee Fong huet ("Cluster"), zesumme mat Partner wéi d'Assurancëgesellschaft Lalux, huet déi Kritik awer relativiséiert.

Jo, d'Plusvaluen an engem Immobiliëfong ginn net besteiert. Allerdéngs „déi Leit, déi et (e Bien) erabréngen, déi komme mat engem besteierte Bien an de Fong", sou de Bauhär. Donieft kéint ee mat engem Fong Fraisen a Prêten net ofsetzen, wéi eng Firma dat kann.

De Bauhär huet och betount, datt wann ee méi wéi 10% vun de Parten an esou engem Fong huet, een zu 45% besteiert gëtt, wann een eppes eraushëlt. „An dat ass bei eis de Fall, dat heescht, wa mir eppes aus dem Fong huele fir eppes Aneschtes, Privates ze kafen, da bezuele mir déi Steieren", sou de Marc Giorgetti. Hien huet awer confirméiert, datt ënnert dem Stréch ee Sicav-Fis „eng besser Affär" ass.

Problemer am Logement

Am Zesummenhang mat de sozialen Ongerechtegkeeten huet de Marc Giorgetti d’Fro opgeworf: "Kloen mer net bëssen op engem héijen Niveau?". Am Grand-Duché hätt een en héije Mindestloun, iwwert deen ee sech misst bewosst sinn. De Logement wier effektiv deier, huet de Marc Giorgetti zouginn, virum allem fir déi Jonk géif et richteg schwéier ginn eng Wunneng ze fannen. Fir d’Hausse vun de Präisser huet hien notamment Investisseuren aus dem Ausland verantwortlech gemaach. De "Rush" aus dem Ausland wier "relativ hefteg".

Eng Limitéierung vun de Präisser op 2% d’Joer, sou wéi d‘CSJ se proposéiert wier schwiereg, sou de Marc Giorgetti, well d’Bauentreprisen indexéiert Salairë musse bezuelen an d’Bauen doduerch méi deier gëtt. Als Léisung proposéiert de Marc Giorgetti eng "méi dicht Bebauung". Hie plädéiert dofir, datt ee bei gewësse Projeten amplaz 10, 20% Wunnengen à coût modéré imposéiert, à condition awer, datt d’Keefer vun den Terrainen "en bonne connaissance de cause" wieren.

An der Stad gehéiert - laut Liser - Zweedrëttel vum Bauland enger 11 Gesellschaften an 11 privat Leit. De Marc Giorgetti huet sech géint Virwërf vu Spekulatioun gewiert. De Bauhär sot "wann d'Geneemegung waarm ass, da leeft bei eis schonn de Bagger!" Hien hätt 1.600 Bauaarbechter ze beschäftegen. Ob net awer aner Groussbesëtzer Terrain bewosst zeréckhalen, fir datt de Wäert weider klëmmt, dat wéisst hien net. "Ech kann net vun deen anere Leit hire Biene schwätzen, deen ech net kennen", sou de Marc Giorgetti. De Bauhär huet awer näischt géint eng Steier op Terrain am Bauperimeter, deen net bebaut gëtt.

Background mam Marc Giorgetti

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.