E Samschdeg war de Staatsminister eisen Invité vun der Emissioun "Background am Gespréich".

Background mam Xavier Bettel

"D'Schoule missten esou laang et geet opbleiwen." Dat sot de Premier Xavier Bettel e Samschdeg de Mëtteg an eiser Emissioun Background am Gespréich. D'Zuele wiere beonrouegend, ma dowéinst wier de Regierungsrot fir e Samschdeg de Mëtten och aberuff ginn. Den Austausch mat allen Acteure wier wichteg, fir iwwer eventuell Mesuren ze diskutéieren. Et misst een awer och festhalen, dass d'Altersmoyenne vun de positiv geteste Leit den Ament méi niddereg wier, wéi nach am Mäerz.

D'Altersmoyenne vun de Residente war am Ufank vun der Pandemie bei 47, Enn September wier d'Moyenne awer bei Mëtt 30.

Och d'Occupatioun vun de Better an de Spideeler wier eng aner, wéi am Fréijoer. Et kéint een déi héich Zuele vun haut also net mat deene vum Mäerz vergläichen.

Zwou Plazen am Land, an der Stad an zu Esch, si fäerdeg Strukture fir Covid-Patiente kënnen opzehuelen, nieft de Spideeler. 295 Respirateure wieren den Ament disponibel.

Elo wier et awer un der Zäit, sech op déi verschidden Zenarie virzebereeden. Déi héich Neiinfektioune géinge weisen, dass d'Disziplin géing noloossen. Ma d'Pandemie kéint awer nëmmen zesummen iwwerwonne ginn, wa jidderee responsabel handelt.

Am Regierungsrot e Samschdeg den Owend wéilt ee fir d'éischt de Point vun der Situatioun maachen, wéi eng Restriktioune kommen, wollt de Premier an eiser Emissioun awer net soen. Op engem Pressebriefing e Samschdeg den Owend wäert et weider Informatioune ginn. Wéi scho gesot sollen d'Schoulen op jiddwer Fall esou laang op bleiwen, wéi nëmme méiglech. Am Fréijoer war d'Decisioun, d'Schoulen zouzemaachen, jo eng vun den éischte Moossnamen, déi getraff goufen.

E komplette Lockdown soll mat alle Mëttele verhënnert ginn. "Dat ass dat Lescht, wat ech als Premier wéilt maachen".

De Staatsminister appelléiert dann erëm un d'Solidaritéit, déi sech virun allem am Ufank vun der Pandemie gewisen hat. Dës Solidaritéit misste mir och elo nees un den Dag leeën. Et sollt ee kee stigmatiséieren, betount de Premier. Ma et hätt sech awer erausgestallt, dass virun allem déi sozial Kontakter am private Beräich zu der Verbreedung vum Virus bäidroen.

An den Nopeschlänner gesäit een den Ament jo eng ganz Partie nei Mesuren, wéi Restauranten zoumaachen oder eng Ausgangsspär. Zu Lëtzebuerg wéilt ee virun allem probéieren, eng Linn bäizehalen an d'Mesuren net all puer Wochen ze änneren. Och eng Maskeflicht dobausse wier fir de Premier net onbedéngt néideg. Hei sollt een un déi eege Responsabilitéit appelléieren.

Hoffnung op e Vaccin am Dezember

De Premier Xavier Bettel huet nach emol vun der EU-Kommissioun confirméiert kritt, datt et Hoffnunge gëtt, datt et am Dezember en éischte Vaccin kéint ginn.

Am Ufank wieren dat kleng Quantitéiten an et misst mat deene Vulnerabelen ugefaange ginn. Hie géing sech och impfe loossen, awer réischt wann et u senger Alterskategorie wier, sou de Staatsminister.

Et misst allgemeng sécher gestallt sinn, datt en Impfstoff all d’Garantien erfëllt.

Et géing een der Kommissioun vertrauen, datt de Vaccin richteg verdeelt gëtt. Hei soll dann och d'Solidaritéit spillen. E kéint een elo weisen, dass Europa zesummeschafft an zesummenhält.

Budget 2021

Zum Budget huet et vum Premier geheescht, dass et wichteg wier, och elo an dëse méi schwéieren Zäiten d'Investissementer héich ze halen, fir dass d'Wirtschaft weider rullt. "Et kascht, wat et kascht", huet de Premier e Samschdeg de Mëtteg betount 7 Méint nom Ufank vun der Pandemie. Mir hätten haut eng aner Situatioun, wa mir net esou gehandelt hätten.

"Ech hu léiwer eng Schold haut, wéi keng Wirtschaft muer", esou de Xavier Bettel. Och eng Krisesteier wéilt een dowéinst net onbedéngt aféieren. De Chômage partiel gouf jo weider verlängert, ma hei präziséiert de Premier awer, dass méi cibléiert soll ausbezuelt ginn. Et sollt een elo do investéieren, wou et néideg ass, fir dass et net an Zukunft nach méi deier gëtt.

Och d'Logementsproblematik misst een ugoen, esou de Premier. Eng konkret Léisung wier awer nach net a Siicht. Et misst een, fir e Resultat ze fannen, op jiddwer Fall mat de Gemengen zesummeschaffen. D'Präisser um fräie Marché ze reguléieren, wier awer net direkt méiglech.

Zu der Ierfschaftssteier huet de Premier nach betount, um Koalitiounsaccord wëlle festzehalen.

Monarchie

Ech stinn zur Monarchie a mat der Reform gëtt se gestäerkt, sot um Enn vun der Emissioun nach de Premier.

Per Arrêté grand-ducal gouf jo virun enger Woch nom Waringo-Rapport déi nei Maison du Grand-Duc geschafen. D'CSV hat kritiséiert, datt dat per Arrêté geschitt ass, net a Form vun engem Gesetz a laanscht d'Chamber an de Staatsrot.

De Xavier Bettel sot sech ganz iwwerrascht iwwert déi Kritik, well schonn de 14. Juli hätt hien an enger Kommissiounssëtzung annoncéiert dat per Arrêté wëllen ze maachen. Hien hätt och keng Bedenken, datt et net verfassungskonform wär. An hien hätt d'Chamber informéiert iwwer dat, wat e wëlles hat. Dat hätt en net misse maachen.

D'Reform wär néideg fir eng modern an transparent Monarchie ze kréien a wär am Accord mam Groussherzog duerchgezu ginn.

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.