E Samschdeg war den LCGB-Nationalpresident eisen Invité an der Emissioun Background am Gespréich um Radio.

Invité an der Emissioun "Background am Gespréich" war am Kader vum 100. Anniversaire vum Chrëschtleche Gewerkschaftsbond LCGB de Gewerkschaftspresident Patrick Dury.

Background am Gespréich: Patrick Dury

De Patrick Dury huet, als een deen aus der Stolindustrie kënnt, den en Donneschdeg verstuerwene Joseph Kinsch am Ufank vun der Emissioun als "exzellente Manager" geéiert. E Manager mat och enger grousser sozialer Oder. Mat him hätt d'Siderurgie kéinte restrukturéiert ginn, ouni datt een entlooss gi wier. De Joseph Kinsch wier e "Beispill fir d'ganzt Patronat" well en erkannt hätt, datt d'Mataarbechter e wäertvolle Bestand vun engem Betrib wieren, no deenen ee kucke misst.

Joseph Kinsch war Manager mat sozialer Oder

De President vum LCGB sot sech zefridden, datt ee bei der leschter Tripartite en Accord fonnt hätt, dee vun alle Gewerkschaften gedroe gëtt. Nawell wier den LCGB weider iwwerzeegt, datt den Accord am Mäerz d'Strooss gehalen huet. Et wier sécher net gutt gewiescht, datt den OGBL dat Ofkommes net mat gedroen huet, mä et hätt ee sech awer ëmmerhin net "ëffentlech accuséiert a gestridden", wéi Verschiddener vläicht gemengt hätt.

Et wier een den Ament an der schlëmmster Kris zanter dem leschte Krich, an dat direkt no enger Pandemie. Wéi laang den aktuellen Tripartite-Accord gëllt, kéint een an dësen imprevisibelen Zäiten net soen. E wier richteg zu dësem Ament a wann et méi schlëmm gëtt, dann hätt een "eng clause de rendez-vous" sech nees ënner Sozialpartner un en Dësch ze setzen. Et misst een op dat reagéieren, wéi d'Saach sech entwéckelt. D'Suen, déi d'Regierung an de Grapp geholl huet, wieren an éischter Linn geduecht gewiescht, fir de Leit ganz séier bei hiren Energierechnungen ze hëllefen an d'Inflatioun ze drécken, sou de Patrick Dury. D'Kritik, den Accord wier net cibléiert genuch, huet de Gewerkschaftler e Samschdeg de Mëtteg an deem Mooss net gëlle gelooss. Mat der Hausse vum Mindestloun an der Energieprimm an dem Credit d'impôt wier net näischt geschitt, wat op déi ënnescht Akommes gemënzt ass. Déijéineg déi kritiséieren, datt d'Hëllef mat der Strenz verdeelt gouf, misste mol soen, wat si anescht gemaach hätten.

Kritik um Tripartite-Accord

Bei de Steiere begréisst den LCGB-President déi annoncéiert Hausse vum Steierkredit fir Elengerzéier. Nach hält d'Gewerkschaft awer un hirer Fuerderung fest, d'Steiertabell misst un d'Inflatioun ugepasst ginn. Fir dat ganzt ze finanzéieren, kéint een och duerchaus eppes um Spëtzesteiersaz maachen. De Patrick Dury huet am Background nach emol widderholl, datt e gestaffelten Index mam LCGB net a Fro kënnt. Sozialpolitik géif een net iwwert den Index mä iwwert d'Steiere maachen. Den Index wier nach ëmmer de "Garant vum soziale Fridden".

Datt Betriber wéi eng ArcelorMittal hei am Land weider investéieren, duerfir misst d'Politik och déi néideg Konditioune schafen. Eng "Katastroph" nennt de Patrick Dury de Fait, datt Google sech wuel net mat sengem Datazenter zu Biissen néier wëll loossen. Dat géif sech och an eng ganz Rei vun Invester areien, déi net komm sinn. Stéchwuert Fage.

Google kënnt wuel awer net

Och wann den LCGB historesch der CSV ganz no stoung an op der chrëschtlecher Sozialléier baséiert, wier et haut kloer, sou de Patrick Dury, datt Gewerkschaftsaarbecht net mat Parteipolitik kompatibel ass. An deem Sënn wier et nach ëmmer richteg, datt kee Gewerkschaftsmandataire e politescht Amt iwwerhëlt. De Patrick Dury selwer wëll wéi annoncéiert bis 2025 un der Spëtzt vum LCGB bleiwen. Op där Plaz kéint hien dat Bescht fir d'Leit maachen an hie géif sech och net op enger anerer Plaz gesinn. Eng weider Kandidatur 2025 huet hien net ausgeschloss.

Fir d'Walen d'nächst Joer wëll den LCGB keng Walrecommandatioun rausginn. Fir méi no u senge Memberen ze sinn, wëll den LCGB d’nächst Joer eng App lancéieren. Déi nächst Sozialwalen awer wäerte weider just op Pabeier sinn.

Stéchwuert Aarbechtszäitverkierzung: Do seet sech d'Gewerkschaft net zefridden, mat deem wat bis elo um Dësch läit. De Ministère huet bis elo just eng Etüd an Optrag ginn. Den LCGB wier zu all Ament prett, fir iwwert eng allgemeng Aarbechtszäitreduktioun ze verhandelen.

Debatt ëm d'Aarbechtszäit

Wichteg wier donieft, datt am Beräich Aarbecht, d'Recht op Deconnectioun an d'Aarbechtsrecht ageschriwwe gëtt, an datt déi sougenannte "Plattform-Aarbecht" méi kloer gereegelt gëtt. Do misst op alle Fall nach virun de Wale mam Aarbechtsminister geschwat ginn.

Wat d'Luxair betrëfft, sot de Parick Dury, et wieren antëscht eng ganz Rei Léisungen um Dësch. De Sozialdialog wier relancéiert. Elo bräicht een éischt konkret Resultater. Den LCGB setzt hei seng Hoffnung och op de Mediateur Robert Biever, dee jo agesat gouf, fir tëscht de verschiddene Säiten ze verhandelen.

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an um RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.