Am Kader vum WeltKannerDag war de Kannerdokter Dr. Pauly e Freideg de Moien eisen Invité vun der Redaktioun.

De Jonken hei am Land geet et elo an der Pandemie ganz verschidden. De Pediater Fernand Pauly gesäit als Dokter Kanner, déi verkëmmeren, well se Angscht hunn, Jonker, déi sech net méi wëlle midd maache beim Léieren, well se keng Perspektiven hunn. Oder déi gesondheetlech oder mental Problemer hunn, well hir Gewunnechten net méi do sinn. De Kannerdokter war e Freideg de Moien eisen Invité vun der Redaktioun. Vill Kanner hätte keen Halt méi, well se déi Aktivitéiten, déi se soss hunn an engem Veräin oder der Musek hu missen opginn.

D'Situatioun wär deels erschreckend, seet den Dr. Pauly.

D'Kanner sëtze méi virum Bildschierm wéi soss. Ob dat sech nach emol ännert, weess hien net, gëtt en éierlech zou. Kanner wären awer ganz upassungsfäeg, et misst een hinnen eng Chance ginn. Hie wär awer ganz besuergt, wann e gesäit, datt vill Kanner mam Sport opgehalen hunn an deels 5 bis 10 Kiloen zougeholl hunn zanter Februar. Et misst ee kucken, fir Sport dobaussen ze maachen, ouni sech zum Beispill de Vestiaires-Geforen auszesetzen.

Nächste Summer misst ee Sport a Kultur onbedéngt relancéieren, fir datt Kanner nees aner Perspektive kréien, wéi déi vum Ecran!

Medezinesch wär de Covid natierlech net de gréisste Problemer fir d'Kanner, ouni wëllen ze banaliséieren. 0 bis 3 Covid-Patienten hätt een an der Moyenne an der Kannerklinik. Déi aner 60 hätten dacks vill méi eescht Problemer wéi d'Covid-Patienten. Sou gesi wär et keng gesondheetlech Suerg, mä et wär awer eng. Mental huet déi ganz Situatioun grouss Auswierkungen.

Wann d'Schoulen nees missten zougoen, wär dat guer net gutt fir déi Jonk. De Mask an der Schoul... De Kannerdokter mengt net, datt dat de Kanner schued, mä et géif hinne sécher op de Geescht goen. Déi Jonk géife sech dru gewinnen.

Mä et dierft ee sech och näischt virmaachen. Déi Jonk kéint een net reglementéieren. Vill Leit hätte vergiess, datt och si eng Kéier jonk waren. Déi Jonk géife wëssen, datt si net vill riskéieren. Et misst een d'Jugend solidariséieren. Si verstoen dinn, wéi si kënnen hëllefen. Déi Jonk méi mat abannen. Et misst ee mat der Spießermentalitéit ophalen. Jidderee vun eis wär gefuerdert. Et soll een de Virus bekämpfen, Perspektiven an net Schëlleger sichen, fënnt den Dr. Fernand Pauly.

Invité vun der Redaktioun: Dr. Fernand Pauly

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.