En Dënschdeg de Moie war den CSV-Deputéierten a Buergermeeschter vu Käerjeng eisen Invité vun der Redaktioun.

D'Informatiounspolitik vun der Regierung steet schaarf an der Kritik, dat am Zesummenhang mat de Corona-Clusteren a 4 Alters- a Fleegeheemer op d'mannst. Den CSV-Deputéierten a Buergermeeschter vu Käerjeng, de Michel Wolter, sot en Dënschdeg de Moien hei op RTL: „Ech maache just eng Scholdzouweisung zu dësem Moment: Dat ass un d'Ministesch (d'Familljeministesch Corinne Cahen, nvdr), déi manifestement an deene leschte Wochen der Ëffentlechkeet net dat gesot huet, wat se a mengen Aen hätt misse soen".

Dem Michel Wolter no wier d'Regierung eréischt mat der Wourecht erausgeréckelt, nodeems Buergermeeschteren a Journaliste Recherchë gemaach hätten. D'Corinne Cahen hätt am Ufank vum Cluster am Lauterbann keng, respektiv falsch Zuele genannt, sou de Michel Wolter. Wéinst där Ontransparenz hätten d'Leit „extreem Angscht", sou de Michel Wolter.

Bannent 3 Woche sinn dem Michel Wolter sengen Zuelen no 40 Mënschen an 3 Haiser um oder mam Covid gestuerwen, dorënner 24 eleng am Heem „Um Lauterbann" op Käerjenger Territoire. Hie kéint, sou de Michel Wolter, Telefonsnoriichte ginn, Leit uginn, déi kéinte bestätegen, „datt d'Leit sech zur Fënster wëllen erausgeheien, datt d'Leit net méi wëlle liewen".

Bis zu 60% vum Personal wier dann och net geimpft, mee awer och Leit, déi vu bausse kommen ewéi zum Beispill d'Botzpersonal. Den CSV-Deputéierte fuerdert dowéinst eng Impfflicht fir dee Secteur, mee awer och eng „national Strategie fir d'Altersheemer".

Donieft huet hie widderholl, d'CSV wéilt eng onofhängeg Etüd, fir erauszefannen, ewéi et zu dëse Virus-Clusteren an den Haiser konnt kommen, mee och eng national Strategie fir d'Altersheemer. Dat wier wichteg am Intressi vun der Gestioun vun den Haiser selwer, awer och fir den Ëmgang mam Virus allgemeng. Dem Michel Wolter no kéint een nämlech net einfach soen, datt wann de Virus bis an engem Heem ass, d'Leit dann ebe stierwen.

D'„Wasserstandsmeldung" bei enger Partei „onwesentlech"

Zur aktueller Situatioun an der CSV wollt de fréiere Parteipresident (2004-2009) sech net äusseren. Hien huet aus engem Message zitéiert, deen hie vun enger Persoun krut, deen e Familljemember am Altersheem verluer huet. „Et wier gutt, wann och mir an eisem Ëmgang mateneen et fäerdeg géinge bréngen, dat Wesentlecht vum Onwesentleche vuneneen ze trennen", sou de Michel Wolter. Dat Wesentlecht wier d'Zukunft vum Land an d'Wuelbefanne vun de Leit an net „d'Waasserstandsmeldung iwwert iergend eng Partei". D'Situatioun an der CSV wier och méi komplex ewéi datt ee kéint an 30 Sekonnen drop äntweren.

Invité vun der Redaktioun: Michel Wolter

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.