E Mëttwoch de Moie war den Direkter vum Prisong um Uerschterhaff eisen Invité vun der Redaktioun.

Um Uerschterhaff bei Suessem gëtt e Mëttwoch den neie Prisong fir männlech Untersuchungshäftlingen offiziell ageweit, dat ënnert anerem a Presenz vum Grand-Duc Henri. Et ass Plaz fir bis zu 400 Persounen. Obwuel d'Planifikatioun fir den Uerschterhaff virun 11 Joer ugefaangen huet, wier de Prisong um neiste Stand vun engem moderne Strofvollzuch, sou den Direkter Jeff Schmit e Mëttwoch de Moie bei eis op der Antenn. D'Sécherheetstechnik wier am Laf vun der Zäit permanent wärend dem Projet adaptéiert ginn.

Well Untersuchungshäftlinge nach net condamnéiert sinn, wier et wichteg si vu Verurteelten ze trennen. Dat géif och den internationalen Normen entspriechen. Bis elo waren d'Untersuchungshäftlinge mat de Prisonéier zu Schraasseg ënnerbruecht an hunn traditionell d'Hallschent vun der Populatioun am Prisong ausgemaach. Mat der Ouverture vum Uerschterhaff gëtt fir den dacks voll ausgelaaschte Prisong zu Schraasseg elo och méi Plaz geschaf. An den nächste Joren soll de vereelzte Prisong och ëmgebaut a moderniséiert ginn.

Untersuchungshäftlinge gi progressiv bis Februar/Mäerz transferéiert

All männlech Persoun, déi zu Lëtzebuerg festgeholl gëtt, kënnt vun der nächster Woch, also vum 5. Dezember un, op den Uerschterhaff. An och déi aktuell Untersuchungshäftlinge vu Schraasseg kommen dohinner. Dat geschitt awer progressiv. Den Transfert gëtt iwwert e puer Wochen organiséiert a soll bis Februar/Mäerz ofgeschloss sinn. Vun deem Moment u géifen dann alleguerten déi männlech Untersuchungshäftlinge just nach op den Uerschterhaff kommen, sou de Jeff Schmit. Et wier wichteg progressiv virzegoen, well nach weider Tester lafen - elo ënner reelle Konditioune mat Prisonéier. Et géif ee réischt vun der nächster Woch u gesinn, ob alles sou klappt, wéi ee sech dat virgeholl huet. 2 vun de 4 Hafthaiser bleiwen dowéinst och nach zou. A wann nach Adaptatiounen néideg wieren, da géifen déi och gemaach ginn.

Vill Kamerae spuere Personal an

Wat de Rekrutement ugeet, do hätt een dat néideg Personal grosso modo fonnt, dat deels och zu Schraasseg forméiert gouf. Nieft den 230 Giischtercher wäerten eng 140 Leit administratiivt Personal am neie Prisong schaffen. Dobäi kommen Externer, wéi medezinescht a schoulescht Personal. Duerch déi ganz vill Kameraen, déi am Prisongsgebai installéiert goufen, hätt een awer och Personal agespuert.

Uerschterhaff ass als neie Prisong adaptéiert un de moderne Strofvollzuch

Den Uerschterhaff, dat si lauter kleng Unitéite mat bis zu 12 Leit pro Block. D'Untersuchungshäftlingen um Uerschterhaff hu méi Fräiheeten, fir sech ze beweegen an ze beschäftegen, ewéi déi zu Schraasseg, huet den Direkter vum Prisong erkläert. Et si pro Dag 2-3 Stonnen Haffgang geplangt, deen anescht wéi zu Schraasseg net vu Gardienen, mä vu Kameraen iwwerwaacht ass. Klassesch Schaffateliere wéi am Prisong sinn net virgesinn.

Well een net wéisst, wéi laang Untersuchungshäftlingen am Prisong bleiwen, kéint een net richteg plangen. Untersuchungshäftlinge géifen an enger grousser Inconnu liewen. Wéi de Jeff Schmitt erkläert huet. D'Untersuchungshaft kéint tëscht e puer Deeg bis zu 3-4 Joer variéieren.

Um Uerschterhaff ass och ee Fligel fir d'Justiz virgesinn, wou potentiell Geriichtsprozesser organiséiert kéinte ginn. D'Distanz vum Prisong op d'Geriichter an d'Stad respektiv op Dikrech gesäit den Direkter net direkt als Problem. Vu Schraasseg aus misst een och säi Wee fueren an et hätt een u sech iwwerall Trafic.

Invité vun der Redaktioun: Jeff Schmit

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.