Nodeems am Februar de President an de Vizepresident vum ACL Sport zeréckgetruede sinn, ass et elo um Tour vum Directeur sportif Andy Mathekowitsch.

Ugangs Februar huet d'Lëtzebuerger Automobilsportfederatioun matgedeelt, dass souwuel de President Marc Joseph, grad ewéi de Vizepresident Norbert Hartz zeréckgetruede wieren. An deem Communiqué war och ze liesen, dass den Andy Mathekowitsch a senger Funktioun als Directeur sportif dofir suerge soll, dass den Automobilsport zu Lëtzebuerg weider entwéckelt soll ginn.

Elo am Mee ass et dann awer d'Nouvelle, dass den Andy Mathekowitsch, Employé beim ACL, gekënnegt huet. Nodeems RTL dat e Méindeg de Mëtteg gemellt huet, huet den ACL Sport um Dënschdeg de Moien an engem Pressecommuniqué déi Informatioun bestätegt.

Den Yves Wagner, President vum ACL, betount am Communiqué, dass een dem Andy Mathekowitsch Merci seet, fir dat wat en a bal 10 Joer fir de Lëtzebuerger Automobilsport geleescht huet.

Nei ass dann d'Informatioun, dass och schonn en Nofollger fonnt gouf, fir den Andy Mathekowitsch ze ersetzen, dat a Persoun vum Florian Brouir. Hien ass elo scho Coordinateur vum Volet e-Sport beim ACL, a soll dann och elo d'Coordinatioun vum ACL Sport iwwerhuelen. Dobäi zielt hien op d'Ënnerstëtzung vun de Leit aus dem Automobilclub, an do besonnesch op d'Erfarung vu Leit wéi Yves Wagner oder Lucien Franck.

Vill Departe beim ACL Sport

Zanter Ufank Februar bis elo am Mee si 5 vun 8 Leit net méi mat am Directoire vum ACL Sport: Marc Joseph, Norbert Hartz, Guy Pauly, Donny Wagner an Andy Mathekowitsch.

Am Februar gouf en neien Directoire um Site vum ACL Sport proposéiert, deen awer bis haut net vum Conseil d'administration vum ACL ofgeseent gouf, obwuel et schonn op d'mannst 2 Sitzunge gouf. Och op Nofro hin, krute mer bis haut keng Stellungnam, wien Kandidat fir de Presidenteposte wier.

President N.N.


 Memberen
HENRY Vania (Responsable Communication et Marketing de l'ACL)
HUSS Shannon (Coordination et adjoint du Directeur sportif)
JUCHEM Jean-Claude (Directeur général de l'ACL)
MAAS Frank (Responsable du Diagnostic Center de l'ACL et pilote automobile)
MATHEKOWITSCH Andy (Directeur sportif)
RECHT Fabien (Gérant piste de karting à Mondercange)
SCHWIRTZ Henri (Karting et photos/médias)
UEBERECKEN Jean-Marc (Juriste et pilote automobile)

Laut deem proposéierten Directoire, wieren da 6 vun 8 Leit beim ACL ugestallt (mam Andy Mathekowitsch), a just nach 2 Persoune wieren extern (Henri Schwirtz a Jean-Marc Ueberecken).

Op Nofro hin hat et an enger Versammlung de 27. Abrëll vum Andy Mathekowitsch geheescht, dat wier e Schratt a Richtung méi Professionalitéit, well déi Persoune sech ebe wärend hirer Aarbechtszäit ëm déi verschidden Dossiere këmmere kéinten. Virdru bestoung den Directoire haaptsächlech aus externe Memberen, déi dat an hirer Fräizäit hu musse maachen. Dat hat zur Folleg, dass Decisiounen an Ännerungen an de Reglementer z.B. dacks laang gedauert hunn.

Elo wou dann och den Directeur sportif gekënnegt huet, steet d'Automobilsportfederatioun net nëmmen ouni President a Vizepresident do, ma och ouni déi Persoun, déi an de leschte Méint a Joren esou opgebaut gouf, dass se d'Geschécker vum Automobilsport zu Lëtzebuerg sollt leeden.

Den Här Mathekowitsch war den Uspriechpartner fir déi Lizenzéiert, fir d'Organisateuren, d'Pressevertrieder an och dee Mann, deen am stännege Kontakt mat der FIA stoung, fir dofir ze suergen, dass een um Niveau vun de Reglementer ëmmer um leschte Stand ass.

Nom Communiqué vum Dënschdeg de Moien ass dann elo gewosst, dass de Florian Brouir déi Funktioune soll iwwerhuelen. Hie soll elo nach vum Andy Mathekowitsch ugeléiert ginn, éier dee bei engem neie Patron eng nei Etapp a sengem Beruffsliewen attackéiert.

Um Méindeg war den Andy Mathekowitsch weder via Telefon, nach via Mail fir eng Stellungnam ze erreechen.