Den Dirk Nowitzki wäert seng NBA-Karriär no dëser Saison un de Nol hänken. Dat huet de mëttlerweil 40 Joer-jonken Däitschen annoncéiert.

En huet dat an enger emotionaler Ried, no sengem leschte Heemmatch mat den Dallas Mavericks matgedeelt. Déi Partie hunn den Nowitzki a Co 120 op 109 géint d'Phoenix Suns gewonnen.

Dallas huet et dës Saison net an d’Play-Offs gepackt.

Den Nowitzki selwer ass mëttlerweil awer de 6.-beschte Scorer an der Geschicht vun der NBA.

A sengem leschte Match virun den eegene Fans huet den Dirk Nowitzki e weidere Rekord opgestallt. Mat sengen 30 Punkte géint d'Phoenix Suns ass hien elo den eelsten NBA-Spiller vun allen Zäiten, deem méi wéi 30 Punkten an engem Match gelonge sinn. Hie léist keen anere wéi de Michael Jordan of. Hien hat mat 40 Joer wuel nach eng Kéier 43 Punkte markéiert, ma hie war an deem Match e puer Méint méi jonk wéi den Däitschen.

Nach eng Legend geet #3

Nieft dem Dirk Nowitzki huet nach e weidere Star "Äddi" gesot, dat a Persoun vum Dwyane Wade, vun de Miami Heat. Hien huet och säi leschten Heemmatch fir seng Ekipp gespillt a sech vu senge Fans feiere gelooss. Am leschten Heemmatch gouf et zwar eng 122-99 Victoire géint d'Philadelphia 76ers, zu där de Wade och 30 Punkte bäigesteiert huet, an awer hunn d'Miami Heat d'Qualifikatioun fir d'Playoffs verpasst.