Um Samschdeg stoungen de Laurent Jans an de Leandro Barreiro an der 1. däitscher Bundesliga alle béid iwwer 90 Minutten um Terrain.

Sonndeg

Apollon Limassol huet an der First Division um 19. Spilldag 0:1 géint Paralimni verluer. De Vahid Selimovic stoung net am Kader.

An der 3. Liga an Däitschland war de Jeff Saibene mat Ingolstadt op Besuch bei de Würzburger Kickers. Obwuel dem Lëtzebuerger seng Spiller no 5 Minutte mat 1:0 a Féierung louchen, musse si sech um Enn mat 1:3 geschloe ginn. Ingolstadt huet no 23. Spilldeeg elo 3 Punkte Retard op de Leader Duisburg.

Samschdeg

An der 1. däitscher Bundesliga stoung souwuel de Laurent Jans bei Paderborn wéi och de Leandro Barreiro bei Mainz wärend dem ganze Match um Terrain. De Laurent Jans a Paderborn spillen 1:1 géint Schalke an de Leandro Barreiro wënnt mat Mainz mat 3:1 géint Hertha Berlin duerch 3 Goler vum Quaison. Paderborn bleift trotz allem op der leschter Plaz a Mainz verschaaft sech e bësse Loft an huet als 15. 4 Punkte Virsprong op déi 16. Plaz.

An der éischter Schwäizer Divisioun wënnt Young Boys Bern knapps mat 1:0 géint Sion. De Christopher Martins stoung de ganze Match iwwer um Terrain a krut an der 41. Minutt eng giel Kaart. An der Tabell steet Bern mat engem Match méi op der éischter Plaz viru St. Gallen.

An der 3. däitscher Divisioun koum et zum Match tëscht Waldhof Mannheim an 1860 München. De Maurice Deville gouf an der 76. Minutt agewiesselt an de Match ass mat 1:1 op en Enn gaangen nodeems de Bouziane an der 62. Minutt den 1:1 schéisse konnt. An der Tabell steet Mannheim op der gudder 4. Plaz.

An der 2. däitscher Bundesliga verléiert den Dirk Carlson mat Karlsruhe mat 0:2 zu Hamburg duerch 2 Goler vum Hinterseer. De Lëtzebuerg stoung déi 90 Minutten als Lénksverteideger um Terrain. An der Tabell bedeit dëst dat Karlsruhe op déi 17. an domadder 2. lescht Plaz erofgerutscht ass.

An der zweeter Belscher Liga stounge beim 0:0 vu Virton géint St. Gilloise den Anthony Moris an den Dave Turpel déi 90 Minutten um Terrain an den Aurelien Joachim gouf an der 73. Minutt agewiesselt. De Kevin Malget dogéint souz de ganze Match iwwer op der Bänk.

Weider Fotoe fannt dir um Internetsite op pressphoto.rtl.lu.

Freideg

An der tierkescher Süper Lig huet de Gerson Rodrigues e Freideg den Owend och a sengem zweete Match fir Ankaragücü eng gutt Leeschtung gewisen. De Lëtzebuerger Nationalspiller huet de Gol vum Orgill an der 66. Minutt preparéiert. No 90 Minutt sollt dat den eenzege Gol bleiwen, sou datt Angaragücü auswäerts mat 1:0 géint Yeni Malatyaspor gewonnen huet. De Rodrigues gouf an der 88. Minutt ausgewiesselt.

An der Ligue 2 a Frankräich dierft de Vincent Thill e Freideg den Owend gemëschte Gefiller gehat hunn. Freeë konnt sech de Lëtzebuerger Nationalspiller, datt hien nees am Kader vun Orléans stoung an och e puer Minutten ze spille kritt huet. De Vincent Thill war zanter Ufank Dezember net méi vum Trainer zeréckbehale ginn. Net esou gutt war awer d'Resultat. Orléans huet beim FC Chamois Niortais, engem direkte Géigner am Ofstigskampf, mat 0:2 de Kierzere gezunn, do konnt och de Vincent Thill, deen an der 80. Minutt agewiesselt gouf, näischt änneren. Orléans bleift op der leschter Plaz an huet 5 Punkte Retard op eng Relegatiounsplaz an der 6 op eng Net-Ofstigsplaz.

An der Eerste Divisie an Holland huet den Enes Mahmutovic mat Maastricht auswäerts 1:2 géint SC Cambuur-Leeuwarden de Kierzere gezunn. De Lëtzebuerger Nationalspiller stoung déi 90 Minutten iwwer um Terrain.

An der Ligue 1 a Frankräich konnt sech de Gérard Lopez iwwert eng Victoire vu Lille freeën. Mat 2:0 huet ee sech zu Angers behaapt.

Iwwerdeems soll den Tim Hall RTL-Informatiounen no kuerz virun engem Wiessel vum ukrainesche Championnat an dat polnescht Championnat gestanen hunn. Um Enn ass awer näischt dorausser ginn.