De Lëtzebuerger Nationalspiller gouf no 30 Minutte vun engem Géigespiller um Kapp getraff a koum fir eng Kontroll an d'Spidol.

Sonndeg

An der 2. Bundesliga huet Karlsruhe mam Dirk Carlson géint Osnabrück a leschter Minutt nach den 1:1-Ausgläich kasséiert. De Lëtzebuerger Nationalspiller gouf no 30 Minutte vun engem Géigespiller um Kapp getraff. De Carlson konnt duerno net méi weiderspille a koum fir eng Kontroll an d'Klinik.

An der 3. Liga: huet Waldhof Mannheim duerch e Gol an der Nospillzäit 1:1 géint Carl Zeiss Jena gläichgespillt. De Maurice Deville souz bei Mannheim 90 Minutten op der Bänk.

An der 2. Divisioun an Holland huet sech Maastricht mam Enes Mahmutovic 3:0 géint Eagles duerchgesat. De Lëtzebuerger huet duerchgespillt.

An der Ligue 2 a Frankräich kritt de Vincent Thill een neien Trainer.

Bei der 2:0 Victoire vum Excelsior Virton géint Lokeren ware mam Anthony Moris, Kevin Malget an Dave Turpel dräi Lëtzebuerger iwwer 90 Minutten an der zweeter belscher Divisioun am Asaz.

An der schwäizerescher Super League ass de Christopher Martins no 78 Minutten ausgewiesselt ginn. Young Boys Bern muss sech zum Schluss mat 1:2 géint Lugano geschloe ginn.

Samschdeg

An der tierkescher Süper Lig konnt de Gerson Rodrigues mat Ankaragücü mat 2:1 géint Fenerbahçe Istanbul gewannen a sech weiderhi wichteg Punkte fir de Maintien sécheren. De Lëtzebuerger konnt den 2:0 fir seng Faarwe markéieren, dëst duerch ee stramme Schoss aus ronn 16 Meter.

An der drëtter däitscher Bundesliga verléiert den Tabellenzweeten Ingolstadt mat hirem Trainer Jeff Saibene duerch ee spéide Gol vum Evina mat 0:1 géint de KFC Uerdingen a léist esou wichteg Punkten an der Course ëm den Opstig leien.

An der First Divison op Zypern huet Apollon Limassol auswäerts mat 1:4 géint Apoel Nikosia verluer. De Lëtzebuerger Vahid Selimovic souz 90 Minutten op der Bänk.

Freideg

An der Ligue 2 a Frankräich stoung de Vincent Thill e Freideg den Owend net am Kader vun der US Orléans. D'Ekipp vum Lëtzebuerger Nationalspiller huet sech misse mat 0:3 géint Ajaccio geschloe ginn. Fir Orléans ass et déi 4. Néierlag noeneen an de Réckstand op d'Net-Ofstigsplaze gëtt ëmmer méi grouss. Als Tabelleleschten huet een e Retard vun 8 Punkten op de 17. FC Paris an der 6 op den FC Chamois Niortais a Le Mans FC op de Plazen 18 an 19.