E Samschdeg well konnt de Lars Gerson mam Leader Norrköping 4:2 géint Östersunds gewannen.

Sonndeg

Den Dirk Carlson huet als Opsteiger mam Karlsruher SC de Verbleif an der 2. Bundesliga in extremis gepackt. De KSC konnt sech auswäerts no engem Réckstand nach 2:1 zu Fürth behaapten, gläichzäiteg huet de Konkurrent Nürnberg zu Kiel beim 1:1 Punkte leie gelooss. De Lëtzebuerger Nationalspiller souz e Sonndeg allerdéngs déi ganz 90 Minutten iwwer op der Bänk.

Samschdeg

Mat Norrköping wënnt de Lars Gerson a Schweden mat 4:2 zu Östersunds. De Lëtzebuerger stoung de ganze Match als Lénksverdeedeger um Terrain. Mat 4 Victoiren aus den éischte 4 Matcher steet Norrköping op der 1. Plaz.

An der 3. däitscher Bundesliga koum Mannheim, bei deenen de Maurice Deville net am Kader stoung, net iwwert en 0:0 géint Preussen Münster eraus. Domadder gëtt en Opstig fir Mannheim ëmmer méi onwarscheinlech. Se leien elo op der 8. Plaz, mä allerdéngs just 3 Punkten hannert enger Relegatiounsplaz. Wëll Bayern München II sécher op enger vun den éischten 3 Plaze lant a well si awer net opsteige dierfen, geet et duer, op déi 4. Plaz ze kommen.

An der Bundesliga stoung de Laurent Jans mat Paderborn déi ganz 90 Minutten um Terrain, mä verléiert knapps mat 2:3 zu Frankfurt. De Leandro Barreiro koum bei der 0:1-Néierlag vu Mainz zu Leverkusen net zum Asaz.

A Russland spillt UFA 0:0 géint Spartak Moskau. Den Olivier Thill stoung net am Kader. An der Tabell steet UFA op der 7. Plaz.