E Sonndeg ass de Ball fir d'leschte Kéier an der 2. Bundesliga gerullt. Och an England an an Italien gouf Futtball gespillt.

Den Hamburger Traditiounsveräin HSV konnt och an dëser Saison de Sprong an déi 1. Bundesliga net packen. No duerchwuessene Leeschtungen an de leschten 3 Matcher hunn déi Norddäitsch hir Chancen ëm eng Plaz ënnert den éischten 3 verspillt. Doheem géint den SV Sandhausen huet ee missen eng extreem batter 1:5-Néierlag astiechen. Um Enn koum déi 4. Positioun an der Schlusstabell vun der 2. Bundesliga eraus.

An der Relegatioun kënnt et deemno net zu dem Derby tëscht Werder Bremen (1. Bundesliga) an Hamburg. D'Plaz 3 konnt sech nämlech den 1. FC Heidenheim sécheren. Den nächsten Donneschdeg a Méindeg spille si an der Relegatioun Hin- a Réckmatch géint d'Werderaner. Als 2. Opsteiger, nieft Bielefeld als Tabellenéischten, steet de VfB Stuttgart fest.

De Karslruher SC, de Club vum Lëtzebuerger Dirk Carlson, ass iwwerdeems op der Tabelleplaz 15 gelant an huet domat den direkte Verbleif an der 2. Bundesliga kënne feieren. Den 1. FC Nürnberg op der 16. Positioun muss an d'Relegatioun.

An der 1/4-Finall vum FA Cup konnt sech den FC Arsenal bei Sheffield United behaapten. An der Nospillzäit huet de Ceballos den decisive Gol géint den Underdog vu Sheffield markéiert. Een anere Londoner Club, nämlech den FC Chelsea, huet och den Ticket fir den nächsten Tour geléist. D'Blues konnte sech duerch e Gol vum Barkley eng Plaz ënnert de leschte 4 sécheren. Och d'Skyblues vu Man. City sinn hirer Favoritteroll gerecht ginn. D'Ekipp vum Trainer Guardiola konnt ouni gréisser Schwieregkeeten no engem 2:0-Erfolleg an den nächsten Tour anzéien.

De Gol vum Ross Barkley goung de Blues duer, fir an d'1/2-Finall vum FA Cup anzezéien. / © AFP

Den AC Milan huet an der Serie A géint den AS Roum mat 2:0 gewonnen. No enger 1. Hallschecht ouni Goler konnten d'Rossoneri hir Iwwerleeënheet nom Säitewiessel mat 2 Goler an een Erfolleg ëmmënzen. An den Owespartien hunn d'Favoritten näischt ubrenne gelooss. Atalanta Bergamo grad wéi och den SSC Napoli, déi jo nach allebéid an der Kinneksklass vertruede sinn, hunn e Sonndegowend hir Hausaufgabe gemaach a mat 3:2 respektiv 3:1 de vollen Asaz kritt.

Huet den 1:0 fir d'Rossoneri geschoss: den Ante Rebic. / © AFP

2. Bundesliga an Däitschland

E puer Matcher erausgepickt:

Arminia Bielefeld - 1. FC Heidenheim 3:0
1:0 Kleindienst - Selbstgol (14'), 2:0 Volgsammer (17'), 3:0 Clauss (54')

Hamburger SV - SV Sandhausen 1:5
0:1 van Drongelen - Selbstgol (13'), 0:2, 1:3 Behrens (21', 84'), 1:2 Hunt (62'), 1:4 Engels (89'), 1:5 Diekmeier (90'+3)

Holstein Kiel - 1. FC Nürnberg 1:1
0:1 Erras (3'), 1:1 Lauberbarch (67')

Greuther Fürth - Karlsruher SC 1:2
1:0 Keita-Ruel (2'), 1:1 Kother (21'), 1:2 Hofmann (61')

VfB Stuttgart - SV Darmstadt 1:3
0:1 Dursun (32'), 1:1 Gomez (42'), 1:2 Bader (54'), 1:3 Kempe (89')

FA Cup an England

Sheffield United - Arsenal 1:2
0:1 Pépé (25'), 1:1 McGoldrick (87'), 1:2 Ceballos (90'+1)

Leicester City - Chelsea 0:1
0:1 Barkley (63')

Newcastle United - Manchester City 0:2
0:1 De Bruyne (37'), 0:2 Sterling (68')

Am engleschen FA Cup stinn d’Halleffinallen zanter e Sonndeg den Owend fest. Den 18. Juli spillt Arsenal géint Manchester City a Manchester United géint Chelsea.

Serie A an Italien

AC Milan - AS Roma 2:0
1:0 Rebic (76'), 2:0 Çalhanoğlu (89')

Napoli - Spal 3:1
1:0 Mertens (4'), 1:1 Petagna (29'), 2:1 Callejon (36'), 3:1 Younes (78')

Udinese - Atalanta Bergamo 2:3
0:1, 2:3 Zapata (9', 87'), 1:1 Lasagna (31'), 1:2, 1:3 Muriel (71', 79')