Leipzig bleift no 2:0-Victoire Tabelleleader, och Dortmund bleift duerch ee Gol vum Reus weider uewen an der Tabell dobäi.

Um Samschdeg stoung an der däitscher Bundesliga de 4. Spilldag um Programm.

Um Enn konnte sech de Leader vu Leipzig géint kämpferesch Augsburger duerchsetzen an och de BVB séchert sech 3 Punkten. Mainz, bei deenen de Leandro Barreiro 90 Minutten op der Bänk souz, bleift iwwerdeems weider ouni Punkt.

Klickt hei fir op d'Resultater vun de Championnater an Italien, Frankräich, Spuenien an England ze kommen.

4. Spilldag vun der Futtball-Bundesliga

Bielefeld 1:4 Bayern München
0:1 Müller (8'), 0:2 Lewandowski (26'), 0:3 Lewandowski (45'+1), 0:4 Müller (51'), 1:4 Doan (58')

Beim Duell tëscht dem Opsteiger an dem Triple-Gewënner war et de Favorit aus München, deen de Match vun Ufank un dominéiere konnt. Sou war et och verdéngt, dass de Müller an der 8. Minutt d'Féierung markéiere konnt. Bayern war kloer den Här am Haus a sou konnt de Lewandowski de Ball nach zwee Mol am Filet ënnerbréngen. Bei sengem zweete Gol koum d'Virlag vum Müller, deen domat ee Rekord vun 150 Virlagen an der Bundesliga um Kont huet.
Dëse Müller konnt nom Téi fir d'Entscheedung suergen. Dem Doan war nach ee Gol fir Bielefeld gelongen an den Tolisso krut an der 76. Spillminutt nach déi rout Kaart wéinst Noutbrems, un der Victoire fir Bayern sollt dat awer näischt méi änneren.

Hoffenheim 0:1 Dortmund

0:1 Reus (76')

Esouwuel d'Gäscht aus Dortmund ewéi och d'Haushäre wollte mat enger Victoire weider wichteg Punkte sammelen, fir weider vir mat dobäi ze bleiwen. Béid Formatiounen hunn dann och probéiert offensive Fussball ze weisen a sech Chancen erausgespillt. Déi beschte Geleeënheet hat de Meunier, deem säi Kappball no engem Corner op d'Lat gaange war.

Nom Säitewiessel war et weiderhin een Duell op Aenhéicht. No der Awiesslung vum Haaland a vum Reus no gutt enger Stonn sollt de BVB dann awer méi geféierlech ginn. An der 76. Minutt war et dann och dëse Duo, dee fir d'Féierung suerge konnt. Den Haaland konnt fräi op de Baumann lafen an hat an der Mëtt de Reus gesinn, deen de Ball an den eidele Gol schéisse konnt a soumat 3 wichteg Punkte fir seng Faarwe séchere konnt.

Augsburg 0:2 Leipzig
0:1 Angelino (45'), 0:2 Poulsen (66')

D'Iwwerraschungsekipp aus Augsburg, déi virum Spilldag scho 7 Punkten aus 3 Matcher um Kont haten, haten de Leader aus Leipzig op Besuch. An der éischter Hallschent war Leipzig beméit, fir d'Heft an d'Hand ze huelen, ma d'Defense vun Augsburg stoung disziplinéiert an hat net vill Chancen zougelooss. Kuerz virun der Paus konnten d'Gäscht sech dann awer belounen. Den Dani Olmo konnt sech am Strofraum géint 3 Defenseure behaapten an hat an der Mëtt den Angelino fonnt, deen de Ball just nach misst iwwert d'Linn drécken.

Nom Téi war Leipzig weider méi um Ball, ma Augsburg huet weider gutt dogéint gehalen. Nodeems de Poulsen an der 66. Minutt agewiesselt gouf, konnt de Stiermer mat senger éischter Aktioun op 2:0 stellen. No enger Virlag vum Olmo hat de Poulsen et direkt probéiert a konnt de Ball mat engem präzise Schoss am Wénkel ënnerbréngen. Soumat séchert sech Leipzig no enger staarker 2. Hallschent verdéngt d'Victoire.

Mainz 0:1 Leverkusen
0:1 Alario (30')

Mainz bleift och nom 4. Spilldag weiderhin ouni Punktegewënn. D'Ekipp vum Lëtzebuerger Leandro Barreiro, deen net an de Asaz koum, steet soumat weiderhin op enger direkter Ofstigsplaz.

Freiburg 1:1 Bremen
1:0 Lienhart (15'), 1:1 Füllkrug (25', Eelefmeter)

Hertha BSC 0:2 Stuttgart
0:1 Kempf (9'), 0:2 Castro (68')

Mönchengladbach 1:1 Wolfsburg
1:0 Hofmann (78' Eelefmeter), 1:1 Weghorst (85')

Klickt hei, fir op d'Säit mat all de Resultater ze kommen.