Um 23. Spilldag an der 2. Divisioun a Portugal huet Casa Pia auswäerts 1:1 bei der zweeter Ekipp vum FC Porto gespillt.

An der 2. Divisioun a Portugal huet Casa Pia e Méindeg am Nomëtteg beim FC Porto B 1:1 gläich gespillt. D'Ekipp steet mat 30 Punkten am Mëttelfeld vun der Tabell. De Marvin Martins gouf bei Casa Pia an der 88. Minutt agewiesselt.

Sonndeg

Um Sonndeg de Mëtteg hat Dynamo Kiew Besuch vu Minaj. D'Ekipp vum Gerson Rodrigues ass senger Favoritteroll gerecht ginn a ka sech no 90 Minutte mat 3:0 duerchsetzen. De Lëtzebuerger ass an der 64. Minutt agewiesselt ginn. An der 89. Minutt krut Kiew een Eelefmeter, deen de Besiedin laanscht geschoss huet. 2 Minutte méi spéit huet den Arbitter nees een Eelefmeter fir Kiew gepaff. Dëst d'Kéier ass de Lëtzebuerger Nationalspiller Rodrigues ugetrueden an huet de Ball an de Filet gesat. Dynamo Kiew bleift domat op der 1. Plaz an der ukrainescher Premier League, 4 Punkte viru Shakhtar Donetsk.

Den Enes Mahmutovic stoung bei der klorer 0:4-Néierlag géint Sorja Luhansk net am Kader vu Lviv.

An der 1. Liga an der Belsch huet iwwerdeems de Laurant Jans mam Standard Léck 0:1 de Kierzere gezu géint Mouscron. De Kapitän vun der Nationalekipp souz op der Bänk éier de Verdeedeger an der 78. Minutt op den Terrain geschéckt gouf.

Samschdeg

Bei der 7:0-Victoire vu Sheriff Tiraspol géint Dinamo-Auto konnt de Lëtzebuerger Nationalspiller Sebastien Thill den tëschenzäitleche 5:0 schéissen an huet zwee Goler virbereet. Mat dëser klorer Victoire bleift d'Ekipp vum Thill weiderhi kloer un der Spëtzt vum moldawesche Championnat, dëst mat nëmmen enger Defaite a 24 Matcher.

An der Ukrain huet Worskla Poltawa mam Oli Thill 1:0 géint Mariupol gewonnen. D'Lokalekipp huet de Match no 2 roude Kaarte mat 9 Léit missen zu Enn spillen. Den Oli Thill stoung 90 Minutten um Terrain.

An der 2. däitscher Bundesliga hat Karlsruhe mam FC St. Pauli d'Ekipp vun de leschte Wochen op Besuch. Um Enn gouf et ee 0:0-Remis, woumat Karlsruhe de Sprong a Richtung Opstigsplazen verpasst hat. Den Dirk Carlson war iwwerdeems verletzungsbedéngt weiderhin net am Kader.

An der 3. Liga an Däitschland hat de Maurice Deville a Saarbrécken de KFC Uerdingen op Besuch. Beim 2:2-Remis gouf de Lëtzebuerger an der 72. Minutt bei Stand vun 2:1 zu Gonschte vu Saarbrécken agewiesselt. Domat verpasst den Deville a säi Club eng wichteg Victoire fir d'Zil vum Opstig.

An der 1. Liga an der Belsch verléiert Waasland-Beveren iwwerdeems mat 1:2 géint Beershot. Den Danel Sinani souz déi 90 Minutten op der Bänk a koum net zum Asaz.

Freideg

An der däitscher Bundesliga huet sech Mainz missen auswäerts mat engem 0:0 géint Schalke zefridde ginn. De Leandro Barreiro stoung bei de Mainzer an der Startformatioun a gouf an der 89. Minutt ausgewiesselt. De Lëtzebuerger Nationalspiller hat an der 37. Minutt eng gutt Chance, fir säin zweete Gol an der Bundesliga ze schéissen. No enger Flank vum Costa huet hien allerdéngs dat ronnt Lieder knapp laanscht de Gol gesat.

Am hollännesche Championnat huet Sparta Rotterdam zu Emmen 1:1 gläich gespillt. D'Gäscht hunn an der Nospillzäit eréischt den 1:1 kasséiert, dat no engem Eelefmeter. De Mica Pinto stoung Rotterdam op Grond vun enger Blessur net zur Verfügung. No 24 Matcher hu Pinto a Co 24 Punkten um Kont.

A Portugal huet de Vincent Thill de Championnatsmatch vun Nacional Funchal bei Pacos de Ferreira wéinst enger Blessur verpasst. Funchal huet sech misse mat 1:2 geschloe ginn an huet domadder och wichteg Punkten an der Lutte géint den Ofstig leie gelooss. An 22 Matcher huet e bis ewell just 21 Punkte gesammelt an ass nëmmen dräi Punkte vun den Ofstigsplazen ewech.

An der zweeter Divisioun an der Belsch gouf et eng Victoire fir den Anthony Moris a seng Coequipieren. Royale Union St. Gilloise huet mat 3:1 zu Lierse gewonnen. Mat 56 Punkten aus 22 Matcher bleift ee souverän un der Tabellespëtzt.