An den Véierelsfinallen vun de Playoffs am Titelgrupp wënnt Steesel mat 93:68 géint Hueschtert a Walfer klappt Ettelbréck däitlech mat 94:48.

Um Mëttwoch koum et bei den Dammen zu den zwou Véierelsfinallen vun de Playoffs am Titelgrupp. Opgrond vun der momentaner Situatioun gouf dës Véierelsfinall a just engem Match entscheet. Am éischte Match vum Owend konnt sech Steesel iwwerraschend däitlech géint de Gréngewald mat 93:68 duerchsetzen. An der zweeter Véierelsfinall wënnt Walfer kloer mat 94:48 géint Ettelbréck a stinn domadder an der Halleffinall.

An den Halleffinallen trëfft Steesel elo op den T71 Diddeleng an d'Résidence Walfer kritt et mat de Musel-Pikes ze dinn. Dës Matcher ginn am Modus "Best-of-3" gespillt an déi éischt Matcher ginn e Samschdeg gespillt.

Bei den Hären stoung um Mëttwoch de 19. Spilldag um Programm an do konnt sech ënner anerem de Basket Esch géint Contern duerchsetzen.

Véierelsfinallen vun de Playoffs

Gréngewald Hueschtert - Amicale Steesel 68:93 (19:14, 20:28, 6:24, 23:27)

Nodeems sech Steesel am leschte Match vun der Saison géint de Basket Esch fir d'Playoffs qualifizéiere konnt, haten se elo direkt nees e Match an deem et ëm alles oder näischt gaangen ass. Et war awer de Gréngewald déi besser an de Match fonnt haten an den éischte Véierel mat 19:14 ofgeschloss hunn. Am zweete Véierel huet Steesel dann awer gewisen dat si zurecht an de Playoffs stinn, hunn de Match gedréint a si mat enger knapper Avance vun 42:39 an d'Paus gaangen. No der Paus ass bei den Hueschterter dann guer näischt méi zesumme gelaf a konnte just 6 Punkte markéieren. Domadder hat sech Steesel eng Féierung vun 21 Punkten opgebaut an hunn dës och am leschte Véierel net méi hierginn.

Résidence Walfer - Etzella Ettelbréck 94:48 (29:11, 25:19, 18:10, 22:8)

Déi Walfer hunn an der Véierelsfinall näischt ubrenne gelooss a mat Hëllef vun enger konzentréierter Leeschtung däitlech géint Ettelbréck gewonnen. Schonn no den éischten 10 Minutten hat Walfer e Virsprong vun 18 Punkten op déi Ettelbrécker. Och am zweete Véierel konnten déi Ettelbrécker de Réckstand net verréngeren sou dat et mat engem 54:30 an d'Paus gaangen ass. No der Paus ass et nämmlecht weider gaangen an d'Heemekipp huet säi Virsprong ëmmer weider ausgebaut. Sou gewannen se dann och kloer an ouni Problemer mat 94:48.