2:1 ka sech den Thill mat senger Ekipp géint Olexandrija duerchsetzen. An Holland huet de Laurent Jans mat Rotterdam 1:1-Gläich géint Groningen gespillt.

Am ukrainesche Championnat ass et um Sonndeg den Owend eng 2:1-Victoire fir Worskla Poltawa ginn. Den Olivier Thill krut viru Schluss eng Giel Kaart gewisen, éier hien an der Nospillzäit ausgewiesselt ginn ass. Säin Brudder Vincent Thill stoung net am Kader vu Poltawa.

Iwwerdeems huet de Maxime Chanot am New-Yorker-Derby géint Red Bull mat 0:1 de Kierzere gezunn. Den Defenseur stoung de ganze Match um Terrain a krut an der 34. Minutt déi Giel Kaart vum Arbitter gewisen.

An der Ligue 1 a Frankräich ass et fir Troyes eng iwwerraschend 1:0-Victoire géint Nice ginn. Ouni de Gerson Rodrigues, dee wéinst enger Giel-Speer gespaart war, huet de Balde an der 4. Minutt den entscheedende Gol markéiert.

De Laurent Jans stoung beim 1:1-Gläichspill mat senger Ekipp Sparta Rotterdam géint Groningen 90 Minutten um Terrain. Den Ausgläich an der 33. Minutt duerch de Smeets huet de Lëtzebuerger virbereet. Iwwerdeems war de Mica Pinto bei Rotterdam net am Kader. Sparta ass Zweetleschten a bleift op enger Ofstigsplaz.

A Griicheland ass de Vahid Selimovic bei der 2:1-Victoire vu Kreta géint Panetolikos an der 74. Minutt fir de Pasalidis agewiesselt ginn.

De Lars Gerson ass beim 1:1-Gläich vu Brann Bergen géint Stabaek net zum Asaz komm. De Lëtzebuerger souz bei der Lokalekipp 90 Minutten iwwer op der Bänk.

Samschdeg

Erzgebirge Aue muss an der 2. däitscher Bundesliga weider op déi éischt Victoire vun der Saison waarden. Am Match géint säin Ex-Club  gouf den Dirk Carlson e Samschdeg no 61 Minutte beim Stand vun 0:1 ausgewiesselt. Siwe Minutte viru Schluss konnt Aue zwar an Iwwerzuel nach verkierzen, ma um Enn stoung zu Karlsruhe eng 1:2-Defaite.

De Maurice Deville stoung bei der 3:2-Victoire vu sengem Veräin net am Kader. Am Match géint den Hallescher FC gouf et fir den 1. FC Saarbrécken dräi wichteg Punkten, mat deene si an der 3. Liga de Sprong op déi zweet Plaz gepackt hunn.

Fir den Danel Sinani sinn et mam Huddersfield dräi Punkte géint Hull City ginn. Bei der 2:0-Victoire stoung hie vun Ufank un um Terrain a gouf no 64 Minutten ausgewiesselt.

D'Union Saint-Gilloise weist sech mam Anthony Moris an der Belsch weiderhin an Top-Form. Duerch eng 4:2-Victoire géint den RFC Seraing steet d'Ekipp vu Bréissel emol fir eng Nuecht un der Tabellespëtzt.

Fir de Leandro Barreiro gouf et um 8. Spilldag an der Bundesliga mam 1. FSV Mainz 05 eng 1:3-Defaite zu Dortmund.

Sheriff Tiraspol huet ouni de Sébastien Thill mat 4:0 géint Sf. Gheorghe gewonnen. De Lëtzebuerger souz de ganze Match op der Bänk.

De Christopher Martins ass beim 1:1 tëschent Young Boys Bern an dem FC Luzern an der 39. Minutt mat Giel-Rout vum Terrain geflunn. Bern konnt an der Nospillzäit duerch den Ngamaleu ausgläichen.

An der portugisescher Coupe huet sech Vilafranquense, d'Ekipp vum Eric Veiga, mat 3:2 no Verlängerung géint de Real SC duerchgesat.

An der Ukrain huet Lviv mat 1:4 géint Dynamo Kiew de Kierzere gezunn. Den Enes Mahmutovic stoung wéinst enger Blessur net am Kader.

De Marvin Martins war beim 2:2-Remis vun Austria Wien géint Admira Wacker wéinst enger Blessur net am Kader.