E Samschdeg war d'Suite vum 18. Spilldag an der Bundesliga, wou et ënnert anerem eng 4:1-Victoire vu Leipzig géint Mainz gouf.

Op Säite vu Mainz krut den Hack schonns an der 20. Minutt déi rout Kaart gewisen, esou datt Leipzig an Iwwerzuel de Match diktéiere konnt. De Silva huet d'Lokalekipp dann och an der 21. Minutt vum Punkt aus a Féierung bruecht. De Szoboszlai, den Nkunku an eng zweete Kéier de Silva hunn déi weider Golder fir Leipzig markéiert. De Lee hat den Éieregol fir Mainz geschoss. De Lëtzebuerger Nationalspiller Leandro Barreiro war an der 64. Minutt agewiesselt ginn.

Iwwer dräi Punkte konnt sech de BVB zu Frankfurt freeën. An enger verréckter Schlussphas konnt Dortmund nach aus engem 0:2 een 3:2 maachen. D'Ekipp vum Rose kann deemno vun der Bayern-Néierlag profitéieren an de Réckstand op den däitsche Rekordchampion verkierzen. Frankfurt louch fréi am Match duerch zwee Goler vum Borre (15', 24') mat 2:0 a Féierung. Laang huet et duerno no enger Victoire fir d'Lokalekipp ausgesinn, ma d'Ekipp vum Rose konnt an de leschte Minutten de Match nach dréinen. Den Hazard hat an der 71. Minutt duerch den 1:2 déi Schwaarz-Giel erubruecht. An der 87. Minutt huet de Bellingham ausgeglach a du war et den Dahoud, deen an der 89. Minutt nach den 3:2 geschoss huet.

Kee Gewënner gouf et am Match tëscht Leverkusen an Union Berlin. Nodeems de Schick d'Heemekipp mat 1:0 a Féierung bruecht hat, war et de Prömel, deen an der 45. an an der 49. Minutt fir Union getraff huet. De Jonathan Tah huet an der 84. Minutt nach esou just d'Néierlag verhënnert.

Freiburg huet iwwerdeems eng 2:0-Féierung géint Bielefeld verspillt. Den Haberer an de Jeong haten d'Ekipp aus dem Breisgau an Avantage bruecht. Den Okugawa an de Lasme hu fir Bielefeld getraff an esou ee Punkt geséchert.

D'TSG Hoffenheim wënnt iwwerdeems mat 3:1 géint Augsburg. Nodeems de Gregoritsch Augsburg fréi a Féierung bruecht huet, konnt Hoffenheim de komplette Match iwwer iwwerzeegen an um Enn duerch zwee Goler vum Bebou an engem vum Raum gewannen.

Tëscht Fürth a Stuttgart gouf et en 0:0.

Weider Resultater vum internationale Futtball fannt Dir hei.

D'Tabell am Iwwerbléck