No der Defaite am Allersmatch huet missen eng Victoire géint d'Belsch fir d'FLH-Formatioun eraussprangen. Um Enn spillt Lëtzebuerg awer just 27:27-Gläich. 

Resumé EM-Qualifikatioun am Handball

No der 26:32-Defaite am Allersmatch an der Coque ass et e Samschdeg den Owend zu Hasselt fir d'FLH-Formatioun drëms gaangen, sech nach fir déi nächst Ronn an der EM-Qualifikatioun ze qualifizéieren. Um Enn sollt dorausser awer näischt ginn, well ee sech mat engem 27:27 géint d'Belsch huet missen zefridde ginn.

Lëtzebuerg ass allerdéngs net gutt an de Match komm a louch no gutt 7 Minutte mat 5:8 am Réckstand. Dono ass et awer besser gelaf an d'Rout Léiwe sinn op 8:9 erukomm. An der Suite hu sech béid Ekippen an der Defense näischt geschenkt an de Match ass ëmmer méi serréiert ginn. Goler sinn net méi vill gefall, béid Attacken hu sech géint d'Defense vum Géigner schwéier gedoen, Léisungen ze fannen, sou dass et mat engem 13:13-Gläich an d'Paus gaangen ass.

D'Spiller vum Härennationaltrainer Nikola Malesevic sinn immens konzentréiert aus der Paus komm an esou huet de Score no ronn 45 Minutten 21:18 fir Lëtzebuerg ugewisen. Aus Lëtzebuerger Siicht ass et dono awer leider net méi esou weidergaangen. D'Belsch ass zeréckkomm, huet de Match nees ausgeglach a louch tëschenzäitlech nees mat 25:23 2 Goler am Avantage. D'Hoffnung war dohin, mee de Match ass ëmmerhin net verluer gaangen an esou spillen Dan Scheid a Co. um Enn 27:27 géint d'Belsch gläich.

Lëtzebuerg hätt de Retourmatch misse mat +7 Goler gewannen, fir den Ticket an déi nächste Ronn an der Qualifikatioun fir d'EM ze léisen.