Am Kloertext hu mir all d'Parteien aus der Chamber gefrot, ob d'Regierung hir Verantwortung iwwerhëlt, wat hinne gefeelt huet a wat hir eege Propose sinn.

Wéi geschlosse geet d'Regierung an d'Waljoer? Dat ass eng vun de Froen iwwert déi en Donneschdeg am Kloertext diskutéiert gouf, wou déi national Aktualitéit vun dëser Woch am Mëttelpunkt stoung: Den Etat de la nation an d'Presentatioun vum Budget.

D'Akzenter déi am Budget gesat goufen, weise fir d'Piraten, datt d'LSAP sech net géint Blo a Gréng konnt duerchsetzen. De Blo a Grénge Cover vum Dokument ass fir de Sven Clement e weidert, wann och méi subtilt Zeechen. Och d'Fraktiounscheffin vun der CSV, d'Martine Hansen, zweiwelt um gudde Klima tëscht de Koalitionären.

"Dat grousst Walverspriechen, fir eng Steierreform ze maachen, ass einfach vum Dësch. Awer net bei en alleguer. D'LSAP ass do éischter op eiser Linn, datt mer elo nach direkt Entlaaschtunge brauche fir d'Leit, mä vun deenen aneren zwou Parteien héieren ech do näischt méi. Dat war awer hiert Walverspriechen, esou datt ech mer ka virstellen, datt do zimmlech Diskussiounen tëschent deenen 3 sinn."

26 Mol sot de Premier a senger Ried "Mir iwwerhuele Verantwortung". "Aarmut" ass dogéint e Wuert, dat d'Myriam Cecchetti vun déi Lénk vermësst huet.

"Hutt der och gezielt, wéi dacks en dat Wuert "Aarmut" an de Mond geholl huet? Iwwerhaapt net! Dat muss fir d'LSAP, déi sech eng sozial Partei nennt, awer och zimmlech e Schlag an d'Gesiicht sinn. Datt d'Aarmut, wou de Statec jo seet, datt iwwer 18 Prozent vun de Leit hei am Land an Aarmut liewen, wou all véiert Kand an Aarmut lieft, datt dat iwwerhaapt net thematiséiert gouf. Esou wéi wann een et net seet, dann hu mer keng Aarmut am Land."

Dat wollt de Fraktiounschef vun der LSAP, den Yves Cruchten, net esou stoe loossen.

"Wat maache mer dann dat ganzt Joer schonn? Um Energiedësch? Op der éischter Tripartite? Op der zweeter Tripartite? Do wëlle mer de Leit hir Kafkraaft erhalen, mir wëllen d'Inflatioun bremsen, fir datt se eben net an d'Aarmut ofrëtschen an dat kascht eis ganz ganz vill Suen."

Och de liberale  Fraktiounschef Gilles Baum verdeedegt d'Regierungspolitik.

"Et ass nach ni esou eng sozial Politik hei zu Lëtzebuerg gemaach ginn wéi déi lescht 9 Joer ënner dëser Koalitioun."

"Dann ass et Lëtzebuerg scho laang ganz schlecht gaangen, wann dat dat Bescht ass, wat Lëtzebuerg ze bidden huet", kontert de Sven Clement Piraten.

Och mat hirer Logementspolitik konnt d'Regierung net bei der Oppositioun punkten, fir d'Fraktiounspresidentin vun déi Gréng ass se awer e Paradigmewiessel.

D'Josée Lorsché huet drun erënnert, datt de Staat 220 Milliounen Euro d'Joer an abordabele Wunnraum investéiert an ënnersträicht, datt an Zukunft méi muss op d'Locatioun gesat ginn.

Och d'Gesondheetspolitik gouf vun der Oppositioun kritiséiert. De Fernand Kartheiser vun der ADR seet iwwer d'Problemer wier Jorelaang just diskutéiert ginn, mä et wier net reagéiert ginn.

De Fraktiounschef vun der LSAP, seet hien hätt heiansdo d'Impressioun, datt géif gemaach ginn, wéi wa mer e Gesondheetssystem aus engem Drëtt-Welt-Land hätten, mä dat wier absolut net wouer.

Eis Invitéen:

Gilles Baum
DP-Fraktiounspresident

RTL

Josée Lorsché
Fraktiounspresidentin vun déi Gréng

RTL

Yves Cruchten
LSAP-Fraktiounspresident

RTL

Martine Hansen
CSV-Fraktiounspresidentin

RTL

Fernand Kartheiser
ADR

RTL

Myriam Cecchetti
Déi Lénk

RTL

Sven Clement
Piraten

RTL

Kloertext leeft am Prinzip all zweeten Donneschdeg um 20 Auer op RTL Télé Lëtzebuerg - direkt nom Journal. Op RTL.lu an iwwert d'App streame mir de ganze Programm vun RTL Télé Lëtzebuerg. Dir kënnt de Kloertext also och am Livestream suivéieren an dono am Replay an am RTL Play nach eemol kucken oder consultéieren, respektiv kommentéieren. (Et kann awer e bëssen daueren, bis d'Emissioun no der Diffusioun komplett fir den Internet konvertéiert ass. Merci fir Äert Versteesdemech.)