En Dënschdeg de Moie war de President vun der Copas eisen Invité vun der Redaktioun.

Mir waren net méi wéi frou, wéi endlech am Gesetz eng Testflicht am Fleegesecteur agefouert gouf an en Impftaux vu ronn 60 Prozent beim Personal interpelléiert eis natierlech, sou de Marc Fischbach. De President vun der Copas, dem Daachverband, wou bal all d’Alters- a Fleegeheemer dra sinn, war en Dënschdeg de Moien eisen Invité vun der Redaktioun. Hien huet de Rapport vum Jeannot Waringo a senger Ekipp iwwer d’Covid-Gestioun an den Alters- a Fleegeheemer kommentéiert.

Zanter dem Juni muss sech d’Personal an den Altersheemer jo 3 Mol d’Woch teste loossen, wa se net geimpft oder no enger Infektioun nees gesond sinn. D’Copas begréisst dat, an dat géif och generell gutt funktionéieren. Hie wéisst vu kengem Fall, wou et grouss Problemer gouf.

Frankräich féiert jo eng Impfflicht fir d’Fleegepersonal an. De Marc Fischbach nennt dat eng couragéiert Haltung vum President Macron, déi hie versteet. Hei am Land géif ee méi op Iwwerzeegungsaarbecht setzen. Eng Impfflicht an den Haiser hätt duerch déi obligatoresch Tester, déi agefouert goufen, och vill un Aktualitéit verluer, fënnt de Copas-President.

De Rapport vum Jeannot Waringo nennt de Marc Fischbach objektiv an ausgeglach, eng Aarbecht, déi mat vill Suergfalt opgestallt gouf. Hien hätt sech genee dat Resultat erwaart, wat elo erauskomm ass, nämlech, datt keng grouss Feeler festgestallt goufen an den Haiser.

Als Copas wier een u sech Demandeur gewiescht, fir Recommandatiounen, déi och Fräiraum an Autonomie loossen, fir entspriechend de Configuratiounen vun den Haiser, déi Decisiounen ze huelen, déi noutwenneg waren.

D’Diskussioun, wat hätt misse gemaach ginn, fir net op den héije Chiffer vun 345 Doudegen an den Alter- a Fleegeheemer ze kommen, wier ganz schwiereg, well ee bis haut nach ëmmer net wéisst, wéi vill Leit um Covid a wéi vill Leit mam Covid gestuerwe sinn, sou de Marc Fischbach. D’Leit an den Heemer wäre ganz vulnerabel. All Joer géif een Drëttel vun de Residente stierwen. Dofir sollt een déi Diskussioun objektiv féieren.

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.