E Mëttwoch de Moie war de Weibëschof a Generalvikar eisen Invité vun der Redaktioun.

Et géing d'Méiglechkeet ginn, am ale Wort-Gebai d'Leit aus dem Foyer Ulysse ënner ze bréngen. Dat wier aktuell nach net confirméiert, ma d'Bereetschaft vum Bistum fir déi Léisung wier do, esou de Weibëschof a Generalvikar Leo Wagener als eisen Invité vun der Redaktioun.

Eng 45 Leit, déi kee feste Wunnsëtz hunn, kënnen nämlech zwee Joer laang, an deenen de Foyer renovéiert gëtt, net do eran. Am ale Wort-Gebai zu Gaasperech, dat der Kierch gehéiert, sinn aktuell ukrainesch Refugiéen ënnerbruecht, ma ee Stack wier nach fräi, esou nach de Leo Wagener. De Marc Crochet, Generaldirekter vun der Caritas confirméiert op Nofro, dass aktuell Gespréicher lafen. Et missten awer nach eng Partie formell Froe gekläert ginn. Ma allgemeng géing d'Léisung awer villverspriechend ausgesinn.

Griewerseenung bleift Traditioun

Donieft war op Allerséilen och de kathoulesche Feierdag en Thema am Interview. Bei der Griewerseenung op Allerhellegen hätt ee gemierkt, dass nach ëmmer vill Leit un der Traditioun festhalen an op deem Dag op de Kierfecht ginn. Wat d'Bëschkierfechter ugeet, esou hätt ee virun allem eng saisonal Nofro bemierkt, esou de Leo Wagener. Virun allem am Wanter géing d'Demande staark ofhuelen. Et misst een och bedenken, dass et fir vill eeler Leit dacks net esou einfach ass d'Graf vun engem Léifsten am Bësch ze besichen.

Et wier dann och éischter e Phänomen, dat een haaptsächlech ronderëm d'Stad gesäit an am Éislek vill manner verbreet ass. Et wieren awer och Efforte gemaach ginn, esou de Generalvikar a Weibëschof Leo Wagener, fir Kierfechter esou ze erweideren, dass all Reliounsgemeinschaft kann hir Doudeg do begruewen. Do géing och an der Zukunft méi opgepasst ginn, fir dass de Kierfecht eng Plaz ass, déi och d'Gesellschaft spigelt.

Zu der Privat-Audienz vum Premierminister Xavier Bettel beim Poopst Franziskus de leschte Samschdeg sot de Leo Wagener, dass hien den Inhalt vun deem Gespréich net matgedeelt krut. Dat bréicht de Premier och net ze maachen. De Generalvikar mengt, dass et éischter eng frëndschaftlech Renconter gewiescht wier.

Roll vun der Fra an Ëmgang mat der LGBTQ-Communautéit

Frae wieren an der kathoulescher Kierch zwar besonnesch aktiv, hätten awer d'Gefill wann et zu den Decisioune kënnt, net wierklech kënne matzeschwätzen. Fraen hätten d'Gefill net wouergeholl ze ginn. Dat ass bei enger Ëmfro erauskomm, déi weltwäit lancéiert gouf.

Fir de Wandel an der Gesellschaft kënne festzehalen hat de Poopst 2021 nämlech eng Synode an d'Liewe geruff. Bei der Ëmfro hunn och zu Lëtzebuerg bal 4.600 Leit matgemaach, dorënner och vill Jonker. Donieft war och den Ëmgang mat gläichgeschlechtleche Koppelen, mee och mat gescheete Leit en Thema.

Allgemeng hätt een duerch dës weltwäit Ëmfro gemierkt, wat d'Leit beschäftegt, et wier eng Bestandsopnam, Resultater géingen dorausser nach net ervir goen, dat géing an de nächsten zwee Joer kommen. Do wéilt een dann awer zum Beispill och kucken, wéi d'Visibilitéit vun der Fra an hir Bedeitung besser kann ënnerstrach ginn. No der Ëmfro gëtt de Prozess weidergefouert an d'Prioritéite ginn erausgeschielt. Déi nächst Etapp wier déi, d'Theme festzeleeën, déi bei de nächsten zwou Synode vun de Bëscheef behandelt ginn.

Invité vun der Redaktioun: Leo Wagener

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.