Am Kloertext gouf de Bilan vun 20 Joer Grand-Duc Henri gezunn awer och d'Fro opgeworf, wéi eng Monarchie een fir d'21-Jorhonnert wëll hunn.

Wat sinn d’Konsequenze vum Warringo Rapport? Dat war eng vun de Froen am Kloertext. Invité war ënnert anerem de Jean-Jacques Kasel, dee 5 Joer als Hofmarschall um Haff geschafft huet a selwer versicht hat, e Rapport an d’Weeër ze leeden, deen awer ni public gemaach gouf. De Jean-Jacques Kasel huet dofir d'Wichtegkeet vum Warringo Rapport ervir gehuewen.

De Rapport ass fir mech 100 Prozent richteg. Ech hunn näischt do ofzezéien. De Besoin war och deemools schonn do, wou ech X Modernisatioune virgeholl hat, fir gewësse Saachen an déi jëtzeg Zäit z'adaptéieren. D'Problemer, déi de Jeannot Warringo identifizéiert huet, goufen et scho sou virun 20 Joer.

Ënnert anerem stoung den Haff jo déi lescht Joren an der Kritik wéinst dem Va-et-vient vum Personal. Dat wier dem fréieren Hofmarschall no awer och schonn a senger Zäit gewiescht. An och d'Reprochen, datt et e Klima vun Angscht géif ginn, huet de Jean-Jacques Kasel am Kloertext confirméiert.

Wéi eng Monarchie fir 21. Joerhonnert?

Fir den Luc Heuschling, Droitsproffesser op der Uni Lëtzebuerg, kann ee sécherlech der Grand-Duchesse hire Style als Patron kritiséieren. Hie fënnt et allerdéngs absurd, datt argumentéiert gëtt, datt Si net an der Verfassung virgesi wier a keng Roll hätt. A sengen Ae missten aner Punkten am Virdergrond vun den Diskussioune stoen:

Wa mer wierklech modern wieren, hätte mer eng ganz aner Diskussioun, nämlech déi, wéi ee Rôle de Conjoint vun engem Staatschef soll hunn. Soll Si just Blummen empfänken an Zeremonien opmaachen, oder dierf Si och selwer eppes denken, eng politesch Meenung hunn, vläicht och kontrovers Meenungen hunn? Mä da musse mer eis och d'Fro stëllen: wéi modern si mir?

Dem LSAP-Politiker an Expert a Verfassungsfroen Alex Bodry no ginn et an där Diskussioun awer Bedenken:

Eise Verfassungssystem ass op de Prinzip opgebaut, datt de Staatschef irresponsabel ass. D'Membere vu senger Famill awer net. Dat heescht, se sinn enger voller politescher, zivilrechtlecher an strofrechtlecher Responsabilitéit ausgesat. All Ausso, déi se ouni Netz maachen, kënne se mat där Responsabilitéit confrontéiert ginn. Ech wëll net an e System erakommen, wou lénks a riets e Member vun der groussherzoglecher Famill politesch Aussoe maachen. Se kënne politesch Meenungen hunn, mä se hunn déi, mengen ech, zréckzehalen, well se domat den Troun och mat engagéieren.

An den Ae vum Marc Baum, Deputéierte vun déi Lénk a Member vun der Kommissioun "Institutiounen a Verfassungsreform", ginn et nach vill Onkloerheeten.

Wa se Missiounen hätt, wat wieren déi dann? Dat ass guer net kloer! Wat kloer ass, dat ass, dat et e Staatschef gëtt, deen eng symbolesch Muecht huet, dat hate mer op alle Fall geduecht. An d'Roll vun der Madamm vum Staatschef ass guer net definéiert. Et kann ee sech och froen, wisou dat muss eng Madamm sinn? Wisou et iwwerhaapt eng Persoun muss sinn? Kann de Staatschef kee Célibataire sinn? Dat ass guer net definéiert. An ech mengen, datt et gutt Grënn ginn, firwat dat net definéiert ass.

Datt Konsequenze vum Waringo Rapport gezu ginn, hunn d'Invitéeën all begréisst. An den Ae vum Marc Baum, an och vum CSV-Deputéierten Leon Gloden, missten d'Changementer awer net iwwert e groussherzoglechen Arrêté, mä villméi iwwer Gesetz gereegelt ginn. E Freideg soll den Arrêté iwwregens am Regierungsrot ofgeseent ginn.

Et hu matdiskutéiert:

Jean-Jacques Kasel

Vun 2002-2007 Hofmarschall a Chef de Cabinet vum Grand-Duc
Fréiere Riichter um europäesche Geriichtshaff

Alex Bodry

Expert a Verfassungsfroen
LSAP-Politiker

Luc Heuschling

Droitsprofesser Uni.lu
Expert a Verfassungsfroen

Marc Baum

Deputéierten déi Lenk
Member Kommissioun “Institutiounen & Verfassungsreform”

Léon Gloden

CSV-Deputéierten
Vizepresident Kommissioun “Institutiounen & Verfassungsreform”

De Kloertext leeft am Prinzip all zweeten Donneschdeg um 20 Auer op RTL Télé Lëtzebuerg - direkt nom Journal. Op RTL.lu an iwwert d'App streame mir de ganze Programm vun RTL Télé Lëtzebuerg. Dir kënnt de Kloertext also och am Livestream suivéieren an dono am Replay nach eemol kucken oder consultéieren, respektiv kommentéieren. (Et kann awer e bëssen daueren, bis d'Emissioun no der Diffusioun komplett fir den Internet konvertéiert ass. Merci fir Äert Versteesdemech.)