Fans a Sammler hu sech besonnesch am Joer 2022 d’Fangere geleckt, direkt 2 GT RS-Modeller koumen do op de Marché.

All Regëster gezunn
Liichtbau, en agilt Fuerwierk, eng opwänneg Aerodynamik an dee richtege Sound – dat alles péckt Porsche an den neien Top-718er, de GT4 RS. 500 PS an nëmme 1415 Kilo, do ass Fuerspaass garantéiert. Och vu bausse gëtt sech den Top-Cayman mam grousse Flillek, de Spoileren an de Felgen direkt ze erkennen. Direkt aus dem Motorsport kënnt och de grousse Brudder GT3 RS. Dee vum Competitiouns-Brudder GT3 R ofgeleeten Top-911er iwwerhëlt zum Beispill de Killsystem esouwéi Elementer vun der Aerodynamik, déi sech deelweis och verstellen an upasse loossen. De 4-Liter-Sechser-Boxer hellt aus héighen Toure 525 PS.

911 an allen Deklinatiounen
Beim 911 Carrera T steet T fir Touring, wat bei Porsche sportlechen Equipement a puristescht Fuererliewnes bedeit. Dofir goufen dann och e puer Kilo Gewiicht gespuert. Op 2500 Exemplaire gouf den 911 Dakar limitéiert. E soll un déi éischt Victoire bei der Rallye Paris-Dakar vun 1984 a gläichzäiteg och un d’Gebuertsstonn vum Allradundriw bei Porsche erënneren. Fir déi néideg Capacitéiten am Terrain léisst sech d’Fuerwierk em 50 Millimeter unhiewen. Och e Sammlerstéck aus der Heritage Design Strategie an op 1250 Stéck begrenzt ass den 911 Sport Classic. Hien erënnert un de Stil vun de 60er a fréie 70er Joren, dëst besonnesch mam typeschen “Entenbürzel” an dem exklusive groe Lack. 50 Joer Porsche Design, dat muss gefeiert ginn. Den 911 Targa 4 GTS Edition 50 Jahre Porsche Design erënnert mat ville klengen Detailer un d’Design-Ikonen aus Zuffenhausen. Et muss een sech awer bäimaachen, nëmme 750 gi gebaut.

Taycan am prakteschen
Kombi héiert en net gär, soe mer éischter, den Taycan Sport Turismo ass, grad wéi säi Panamera-Brudder, een “Allrounder”. Interessant ass logescherweis d’Mall mat méi grousser Ëffnung an engem Volume vu 446 Liter.