Wéinst psychologeschem Harcèlement vun hire Mataarbechter war d'Monica Semedo déi lescht Woch vum President vum Europaparlament sanktionéiert ginn.

Wéinst psychologeschem Harcèlement vun hiren 3 jonke Mataarbechter war d'Monica Semedo déi lescht Woch vum President vum Europaparlament sanktionéiert ginn.

De Rapport iwwert de Mobbing vun den 3 Mataarbechter war eng 100 Säiten déck – am Raum stinn ëffentlech Beleidegungen a stänneg Pressioun – Faiten, fir déi sech d’DP-EU-Deputéiert an engem Communiqué entschëllegt hat. Trotz enger Partie RTL-Nofroen gouf et soss kee Statement vun der Madamm Semedo zu de Reprochen an der Sanktioun.

E Comité des sages vun der DP soll decidéieren, ob d'Monica Semedo ka Member vun der Demokratescher Partei bleiwen. Dat wäert de Bureau exécutif dem Comité directeur vun der Partei proposéieren, wéi e Méindeg de Mëtten decidéiert gouf.

An engem Videomessage soen d'Parteipresidentin Corinne Cahen, déi bis ewell nach net ëffentlech Stellung zu der Affär geholl hat, an de Generalsekretär Claude Lamberty, datt Mobbing fir d'DP inakzeptabel wier. Et hätt een awer wëllen a Rou an deenen zoustännege Gremien driwwer schwätzen. De Claude Lamberty hat d'lescht Woch nach gesot, datt d'Affär no der Entschëllegung vun der Europadeputéierter elo emol zou wier.

Fir d'DP wier et inakzeptabel, datt déi 3 Mataarbechter vun der Monica Semedo esou ënner Drock gesat goufen, datt si demissionéiert hunn, seet d'Corinne Cahen am Video, deen e Méindeg de Mëtteg publizéiert gouf.

Gewaart gëtt lo, datt dës Woch den DP-Comité directeur beienee kënnt, dee sengersäits e Wäiserot wäert ernennen, fir an der Causa Semedo ze tranchéieren.

Schreiwes vun der DP

Nodeems de Bureau exécutif vun der Demokratescher Partei d'Madamm Semedo haut ugehéiert huet, ass en zu dëser Konklusioun komm:

- de Bureau exécutif proposéiert dem Comité directeur, e Comité des sages anzeberuffen, esou wéi eis Statutten dat virgesinn. Dëse Comité des sages soll driwwer beroden, wat fir eng Konsequenzen d'Decisioun am Europaparlament op d'Memberschaft vun der Madamm Semedo an der DP huet

- de Bureau exécutif an d'Madamm Semedo si sech eens ginn, datt si bis dohinner net méi u Parteigremien deelhëlt

- d'Demokratesch Partei distanzéiert sech nach eng Kéier formell vu Mobbing an all aner Form vun Harcèlement

An engem Videomessage deen Dir hei erofluede kënnt, ginn d'Parteipresidentin Corinne Cahen an de Generalsekretär Claude Lamberty weider Detailer.