Am Prozess ëm d'Affär Lausduer, wou am Abrëll 2018 zwee Policeween anenee geknuppt waren, gouf um Donneschdeg d'Urteel gesprach.

D'Urteel huet bei allen zwee Ugeklote fir Erliichterung gesuergt.

D'Ambiance am Geriichtssall war zimmlech geléist. Dem ugeklote Polizist huet een d'Erliichterung nom Fräisproch ugesinn, hien huet gekrasch. Seng Affekotin Trixie Lanners confirméiert: "Dat ass e ganz wichtegen Dag fir mäi Client, nodeems hie fënnef Joer laang um Pranger stoung. Hien ass net Schold um Doud vu sengem beschte Kolleeg, an och net dodrun, dass eng Fra schwéier handicapéiert ass. Dat ass e ganz grousse Steen, deen him do vum Häerz fält."

Den ugekloten ziville Chauffer krut eng Geldstrof vun 1.000€ an e Fuerverbuet vun 18 Méint op Sursis, dobäi en Deel vun de Fraisen, ronn 5000 Euro.

Fir de Me Baulisch, deen de Chauffer vertrëtt, e besonnent Urteel. Dat kéint ee mat rouegem Gewëssen unhuelen. Allerdéngs géing hien de Staat usichen, well säi Client deemools agespaart gouf. Dat hätt bei enger Contraventioun, déi an dësem Fall virlouch, net hätten dierfe geschéien, erkläert den Affekot.

Déi deemoleg Bäifuererin vun dem Verstuerwenen leit bis haut ënnert de Suite vum Accident, si ass schwéier handicapéiert. Hier zivil Uspréch goufen an dësem Prozess verworf.

Wat war geschitt?

Am Abrëll 2018 war et zu engem schwéieren Accident um Lausduer komm, wéi zwee Policeween d'Poursuite vun engem Chauffer opgeholl haten, dee virun enger Alkoholkontroll op der Wemperhaart geflücht war. Wéinst engem Malentendu huet den éischte Policewon op der Héicht vum Lausduer matzen an der Strooss d'Kéier gemaach. De Polizist an der Camionnette konnt net méi auswäichen an ass mat voller Vitesse an den Auto gerannt.

De Polizist am Auto war direkt dout, seng Bäifuererin schwéier blesséiert.