Am Kloertext goung et e Mëttwoch den Owend ëm d'Ried zur Lag vun der Natioun vum Premier Xavier Bettel. Et hu Vertrieder vun de 7 Parteien diskutéiert.

"Ass et legitim sech an dësen Zäiten op de Koalitiounsaccord zeréck ze zéien?"

Dat war eng vun de Froen, ëm déi et e Mëttwoch den Owend an der Emissioun Kloertext goung. Ronderëm den Dësch souze Vetrieder vun deene 7 Parteien, déi an der Chamber sinn an et goung, een Dag nom Etat de la nation, natierlech ëm d'Ried vum Staatsminister.

"Et bleift bei deem wat ofgemaach ass" sot de Fernand Kartheiser, de President vum ADR Grupp an der Chamber, wéi et ëm de Koalitiounsprogramm goung. Dat wier vläicht legitim, mä politesch gesinn wier et falsch:

"An där Kris an där mer sinn, déi ass jo awer fundamental, misst ee vill méi Flexibilitéit kënne weisen an dat ass dat, wat dës Regierung net kann, si fiert weider, well se keng Accorden ënnert sech fënnt an dofir sinn se net capabel sech op déi nei Situatioun anzestellen."

Och fir d'Martine Hansen, d'Fraktiounscheffin vun der CSV, ass ee vun de Problemer, datt Blo-Rout-Gréng Diskussiounen ënnert sech hätten, dofir géif et eng Blockad, déi misst séier geléist ginn, fir datt et géif viru goen.
De Koalitiounsaccord wier heiansdo eng Excuse, wann et d'Majoritéit arrangéiert, virun allem géif en och dann dohinner gehale ginn, wann sech d'Regierung mat onpopuläre Fuerderunge konfrontéiert gesäit, seet de Sven Clement vun de Piraten.
D'Majoritéit géif net op d'Gravitéit vun der Situatioun reagéieren, esou säi Reproche.

"Et konnt keen e Koalitiounsprogramm schreiwen ronderëm dës Kris, mä wann ee gesäit, datt eng Kris do ass, muss ee vläicht säi Plang änneren. Da muss ee soen 'mir si vläicht elo bëssen Abseits vum Kurs'. Anstatt ze soen, 'mir benotzen dee selwechte Plang fir zeréck ze kommen', muss ee sech vläicht en neie Plang ginn."

De liberale Fraktiounschef Gilles Baum konnt der Oppositioun an hire Kriticken natierlech net Recht ginn.

"E Koalitiounsaccord, dat ass jo net iergendee Stéck Pabeier, dat een ënnerschreift. E Koalitiounsaccord, dat ass eppes wat een anhält, dat ass e Programm, deen ee wëll ëmsetzen an Zäit vu 5 Joer a mir sinn elo am zweete Joer fäerdeg, dat heescht mir hunn nach 3 Joer virun eis."

Eng Moossnam, déi am Koalitiounsaccord ugekënnegt war an déi den 1. Januar jo och kënnt ass d'CO2 Steier, déi ënnert anerem déi Gréng Fraktiounscheffin Josée Lorsché verdeedegt huet. Si schwätzt och léiwer vun engem Präis deen ee muss bezuelen.

"Kee Mënsch iergert sech, wann den Offall entsuergt gëtt an e muss dofir bezuelen. Dat hei ass e Präis deen ee bezilt fir d'Verschmotzung vun der Ëmwelt."

Wat déi aktuell Kris betrëfft, war et dem Gilles Baum wichteg z'ënnersträichen, datt d'Regierung d'Leit net géif am Reen stoe loossen. Ënnert anerem géif jo d'Deelzäitaarbecht verlängert ginn. Och wann een elo nach net kéint soen fir wéi laang.
Eng wichteg Moossnam huet och de Georges Engel, de Fraktiounschef vun der LSAP ënnerstrach.

"Dat muss weider goen, dat soll net den éischte Januar einfach ophalen. Dee Chômage partiel huet ëmmerhin 160.000 Salariéën quasi d'Liewe gerett, well se weider eng Paie kritt hunn."

D'Martine Hansen, d'Fraktiounscheffin vun der CSV huet bedauert, datt nach net méi Detailer gewosst sinn. D'Betriber bréichte Planungssécherheet.

"Ech denken d'Betriber mussen einfach wëssen wéi laang dat virugefouert gëtt. Mir hunn elo eng Annonce, datt dat nom 31ten Dezember viru gefouert gëtt, dat wëssen d'Betriber elo, et ass och gesot ginn, déi do Mesure gi weidergefouert, mer wëssen och do net wéi laang a mer wëssen och net u wéi eng Konditioune se gebonne sinn."

Op d'Fro, ob den Etat de la nation, e Kompromëss tëschent deenen Dräi war, oder ob en besonnesch d'Handschrëft vun enger Partei hat, hat den David Wagner vun déi Lénk eng kloer Äntwert.

"Et ass d'Partei vum Premier Minister, déi sech duerchgesat huet, well et ass eng liberal Politik, déi hei gedriwwe gëtt, et ass eng liberal Regierung an et freet ee sech firwat d'LSAP an déi Gréng iwwerhaapt an dëser Regierung sinn."

D'Industriepolitik, de Logement an d'Santé ware weider Elementer ëm déi et am Kloertext goung.

Et hu matdiskutéiert:

Gilles Baum

Fraktiounschef DP

Gilles Baum (DP) /

Josée Lorsché

Fraktiounscheffin déi Gréng

Josée Lorsché (Déi Gréng) /

Georges Engel

Fraktiounschef LSAP

Goerges Engel (LSAP) /

Martine Hansen

Fraktiounscheffin CSV

Martin Hansen (SCV) /

Fernand Kartheiser

Deputéierten ADR

Fernand Kartheiser (ADR) /

Sven Clement

Deputéierte Piraten

Sven Clement (Piraten) /

David Wagner

Deputéierten déi Lénk

David Wagner (Déi Lénk) /

De Kloertext leeft am Prinzip all zweeten Donneschdeg um 20 Auer op RTL Télé Lëtzebuerg - direkt nom Journal. Op RTL.lu an iwwert d'App streame mir de ganze Programm vun RTL Télé Lëtzebuerg. Dir kënnt de Kloertext also och am Livestream suivéieren an dono am Replay nach eemol kucken oder consultéieren, respektiv kommentéieren. (Et kann awer e bëssen daueren, bis d'Emissioun no der Diffusioun komplett fir den Internet konvertéiert ass. Merci fir Äert Versteesdemech.)