Warscheinlech waart jiddereen op deen neien ID. Buzz, VW weist um Festival als Trouschtpräis awer mol deen neie Multivan.

Nostalgesch

De Star vum leschte Joer ID.4 léisst fir de Festival 22 eng al bekannte Bezeechnung nees opliewen: den ID.4 GTX weit eng nei Mark an. GTX steet vun elo u fir d’Topversioun, am Fall vum ID.4 mat 2 Motoren, Allrad a sportlechem Design. 299 PS an eng maximal Autonomie vun 480 km gi versprach.

En anere Buschtaf huet bei VW och schonn Traditioun: Golf R, Tiguan R an Arteon R sti virun allem fir eppes: héich Motorleeschtung, individuellen Design a sportlech Fuereegenschaften. Am Fall vum Golf ass déi nei Spëtzt mat 320 PS markéiert, de stäerkste Serie-Golf ass domat a 4,7 Sekonnen op 100. Den Tiguan R iwwerhëlt de selwechten Turbo-4-Zylinder an ass mat 4,9 Sekonne bal esou séier. Bei him suergt en neien Allradundriff fir méi Fuerdynamik. De grousse Brudder Arteon R ass och alles anescht wéi lues, bei 290 fir d’Limousine respektiv 270 km/Stonn fir de Shooting Brake ass Schluss.

Neie Pep

De klenge Polo ass zeideg fir ee Facelift. An deen huet et a sech; ënnert anerem en neien digitale Cockpit bannen an, nieft den übleche Retouchen, elo serieméisseg LED-Pharen baussen. Natierlech däerf och d’Topversioun Polo GTI net feelen. Nei Assistenzsystemer, LED-Matrixluuchten a virun allem de staarken Turbobensinner mat 207 PS sinn typesch fir déi sportlech Topversioun. Opgewäert gouf och den Tiguan Allspace. D’Laangversioun vum Tiguan krut vill nei Technik fir Confort a Sécherheet, wéi och een iwwerschafften Design.

Première

Fir d’éischt um Festival ze gesinn ass deen neien Taigo. Mat him bréngt VW deen éischten SUV-Coupé am Segment vun de klengen Autoen. A wéi et sech gehéiert mat der beléifter héijer Sëtzpositioun, dem Offroad-Look a moderner Connectivity. Bis zu der Weltpremière vum ID. Buzz am Februar bleift den neie Multivan T7 d’schwäizer Messer an der Nutzfahrzeuge-Gamme. Am Kär bleift en sech trei, kritt awer méi Confort a Sécherheet, ee komplett neie Banneraum an, als Première, Hybrid-Undriw.