En neie Member kënnt an der ID-Famill bäi.

Elektro-Passat

D’Vertrieder an der gehuewener Mëttelklass sinn nawell rare geséint – VW traut sech elo mam neien ID.7 an d’Revéier vun Tesla Model 3 a Polestar 2. Zil ass de Client, dee vill fiert, dofir soll déi grouss Elektro-Limo och maximal 621 Kilometer packen. Eng kleng Revolutioun erwaart de Chauffer bannenan: den ID.7 kënnt als éischten mat Augmented-Reality-Headup-Display.

Renovéiert

No zwee an en halleft Joer ass et un der Zäit, de Käermodell vun der ID-Gamm z’aktualiséieren. Den ID.3 kritt e liicht geännerten Design, verbessert Matièren a méi modern Assistenzsystemer. Zeideg fir een Update war och de klengen SUV T-Cross. Fir de Bestseller stoung e méi héichwäertege Banneraum, e klengen optesche Facelift an nei technesch Features um Programm. Fit gemaach gouf och den Touareg. E Koup Hightech-Features krut en an dësem Kader spendéiert, ënnert anerem nei IQ.Light HD-Matrix-Luuchten an een neit Fuerwierk.