De Verdikt vun den RTL.lu-User ass kloer: Honoréiert ginn 2019 engersäits sportlech Leeschtungen an anerersäits den Asaz fir Matmënschen an Nout.

Jenny Warling a Remy Eiffes, esou heeschen d'Lëtzebuergerin an de Lëtzebuerger vum Joer. Iwwer 2.300 Leit hunn op RTL.lu ofgestëmmt an hir Perséinlechkeete vum vergaangene Joer gewielt.

Den Éierentitel "Lëtzebuergerin vum Joer 2019" geet un d'Jenny Warling. Si war mat dëser Begrënnung nominéiert ginn:

"Well d'Jenny als Europameeschter eis Faarwen no baussen op héchstem Niveau vertrueden huet, wéi keen anert 2019. Dës Leeschtung ass et derwärt als Lëtzebuergerin vum Joer ze ginn."

RTL

© Didier Weber

E Portrait vum Jenny Warling
Den Éierentitel "Lëtzebuergerin vum Joer 2019" geet un d'Jenny Warling.

Den Éierentitel "Lëtzebuerger vum Joer 2019" ass fir de Remy Eiffes. Hie war nominéiert gi well:

"De Remy Eiffes gouf fir säin Asaz fir seng Matmënsche virgeschloen. Hien huet säin eegent Liewen bei der Explosioun um Waldhaff riskéiert, fir no senge Komeroden ze kucken an éischt Hëllef ze leeschten."

Den Adjudant-Major vun der Lëtzebuerger Arméi freet sech iwwer de Präis, ma wëll d'Auszeechnung dem CGDIS weiderginn, well hien hätt just seng Aarbecht gemaach an d'Leit vun de Rettungsdéngschter wieren déi, deenen ee misst Merci soen, fir hire dagdeegleche Courage an Asaz.

RTL

© Domingos Oliveira

E Portrait vum Remy Eiffes
Den Éierentitel "Lëtzebuerger vum Joer 2019" ass fir de Remy Eiffes.

RTL felicitéiert dem Nicole Dax an dem Josée Jaerling ganz häerzlech. Gläichzäiteg soe mir och allen Utilisateure Merci, déi entweder e Kandidat proposéiert hunn an/oder duerno fir een ofgestëmmt hunn.

Wat ass den Top 5 2019?

Top 5 vun den Dammen

1 Jenny Warling

2 Sophie Mousel

3 Grande-Duchesse Maria Teresa

4 Ana Pinto

5 Zohra Barthelemy

Top 5 vun den Hären

1 Remy Eiffes

2 Grand-Duc Jean

3 Jean-Claude Juncker

4 Frank Pirrotte

5 Bob Bertemes

Wéi konnt ee matmaachen?

Iwwer 2.300 Leit hu bei der Wiel vun der Lëtzebuergerin an dem Lëtzebuerger vum Joer matgemaach, domat bleift d'Ofstëmmung populär, och wa si net no statistesch-wëssenschaftleche Krittären duerchgefouert gouf an héchstens representativ fir d'Utilisateure vun RTL.lu ass.

Wie krut bis elo den Titel "Lëtzebuergerin" a "Lëtzebuerger vum Joer"?

2018: Gwen Daufeld (Aarbecht mat Demenzkranken) a Jeff Herr (Wonschkutsch)
2017:
Martine Kohl (Street Angels) an André Bichel (Polizist)
2016
: Nathalie Scheer (ALS-Patientin) a Marcel Steffen (Polizist)
2015
: Yasmine Grisius (Polizistin, posthume Präis) a Jean Asselborn (Ausseminister)
2014: Noémie Siebenaller a Camille Arend (zweemol e posthume Präis, well déi 2 Mataarbechter vun "Le soleil dans la main" ware bei engem Fligeraccident an Afrika ëm d'Liewe komm)
2013: Sylvie Conter (Riichterin) a Gaston Vogel (Affekot)
2012: Eliane Leger (Infirmière) a Romain Hilbes (Buschauffer a Liewensretter)
2011: Xavier Bettel (Stater Buergermeeschter)
2010: Andy Schleck (Vëlosfuerer)
2009: Andy Schleck (Vëlosfuerer)
2008: Jean-Claude Juncker (Premier)

Eréischt zanter 2012 ginn d'Lëtzebuergerin an de Lëtzebuerger vum Joer an zwou getrennten Ofstëmmunge gesicht. An zanterhier acceptéiere mir och keng Kandidature méi vu Leit, déi de Präis ewell kruten.

Hei geet et bei d'Artikelen aus dem leschten Joerzéngt

RTL-News: Lëtzebuergerin a Lëtzebuerger vum Joer 2018: Gwen Daufeld a Jeff Herr gewielt an ausgezeechent
https://www.rtl.lu/news/national/a/1285691.html

RTL-News: Lëtzebuerger vum Joer 2017: Martine Kohl vun de Street Angels a Polizist André Bichel
/news/national/1112774.html

RTL-News: Lëtzebuerger vum Joer 2016: ALS-Patientin Nathalie Scheer a Polizist Marcel Steffen
/news/national//990806.html

RTL-NEWS: Lëtzebuerger vum Joer 2015: Polizistin Yasmine Grisius an Ausseminister Jean Asselborn
/news/national//749533.html

RTL-NEWS: Lëtzebuerger vum Joer 2014: Noémie Siebenaller a Camille Arend gewielt
/lifestyle/people//595450.html

RTL-NEWS: Lëtzebuerger vum Joer 2013: Sylvie Conter a Gaston Vogel sinn d'Lëtzebuerger vum Joer
/lifestyle/people/498429.html

RTL-NEWS: Lëtzebuerger vum Joer 2012: Eng Infirmière an e Buschauffer - Eliane Leger a Romain Hilbes
/news/national/371125.html

RTL-NEWS: Xavier Bettel heescht de "Lëtzebuerger vum Joer 2011"
/news/national/177199.html

RTL-NEWS: De "Lëtzebuerger vum Joer 2010" heescht Andy Schleck!
/news/national/90553.html

RTL-NEWS: RTL.LU: Andy Schleck heescht de Lëtzebuerger vum Joer 2009
/news/national/54111.html

RTL-NEWS: RTL.LU: De Jean-Claude Juncker ass de Lëtzebuerger vum Joer 2008
/news/national/3758.html

- - - - -

Klengen Appell un eis Commentateuren:

Dat Neit Joer ass jo nach ganz frësch, dofir sech net direkt ewell bei der éischter Nouvelle 2020 d'Käpp aschloen, ma w.e.g. mat e bësse Respekt a Sensibilitéit op de Vott reagéieren - och wann ee vläicht aus iergendengem Grond selwer enttäuscht ass ... Natierlech dierf een eppes gutt oder schlecht fannen, ma d'User hu proposéiert an decidéiert, jidderee konnt do matmaachen ... Merci fir Är Kooperatioun an Är Contributioun, datt den Debat friddlech bleift.

An: ALL GUDDES FIR 2020 :-)

RTL

- - - - - - - -