Nodeems et keen C- E- oder S-Klass Coupé méi gëtt, start Mercedes nees nei an dëser Kategorie.

C + E = CLE

Coupé’en hu bei Mercedes ëmmer eng Roll gespillt, dofir goufen C- an E-Klass elo zesummegeluecht. Resultat ass deen neien CLE Coupé. Op 4m85 bitt hien méi Plaz wéi de Coupé vun der Virgänger-C-Klass, den Design passt sech dobäi der aktueller Linn un a betount déi typesch Coupé-Proportiounen. D’Motorisatiounen iwwerhëlt den CLE haaptsächlech vun der C-Klass, et gëtt awer och e Sechszylinder ugebueden.

Nei lancéiert

D’E-Klass start mat der Baurei 214 an eng nei Generatioun. Limousine an T-Modell sinn zwar nëmmen e bësse gewuess, den Design huet awer e bësse méi geännert an orientéiert sech un de groussen Elektro-Bridder EQE an EQS. Un deenen inspiréieren sech och nei Equipementer wéi den MBUX Superscreen, eng beliichte Kalander an aner nei Features. Just ee Facelift gouf et dogéint bei den Elektromodeller EQA an EQB. Bausse goufen et just liicht Retouchen, ënnert dem Blech ginn et nei Equipementer wéi ënnert anerem elo Dolby Atmos oder een neit Steierrad.

Exklusiv

Den neien AMG GT Coupé mécht um Festival säin éischten Optrëtt an ass domat de Bonbon vun der Editioun 2024. Déi zweet Generatioun koppelt nees héich Fuerleeschtunge mat Confort a kritt deen neie voll variabelen Allradundriw esou wéi eng aktiv Aerodynamik, Wankstabiliséierung an eng Steierung un der hënneschter Achs.