Fir all déi Schüler, déi am Juli de Cycle 4.2 mat Succès ofgeschloss hunn, ass d’Schoulvakanz elo och eriwwer.

Um Donneschdeg war Schoulrentrée fir déi dausende 7ième-Schüler uechtert d’Land. Fir si fänkt domat eng nei Etapp an hirer Schoulkarriär un. Elo si si net méi déi eelst, mee déi jéngst am neie Schoulgebai. Se hu méi verschidden Enseignanten a vill nei Matschüler, déi se elo no an no wäerte besser kenneléieren.

RTL war en Donneschdeg de Moie fréi mat der Kamera am Maacher Lycée ënnerwee, wou ronn 190 nei Schüler, zesumme mat hiren Elteren, vun der Direktioun begréisst goufen. Si kruten um éischte Schouldag nach wichteg Informatiounen mat op de Wee an haten d’Geleeënheet, sech mat hirem neien Ëmfeld vertraut ze maachen.

„Méi no bei Iech“, dat ass de Motto vum Maacher Lycée. Et géif een op eng gutt Betreiung vun de Schüler setzen. Et wier wichteg, dass jidderee sech am Gebai wuelfillt, sot de Gilles Estgen, den Direkter vum Maacher Lycée.

Frou wier een op alle Fall elo schonn, datt dat neit Schouljoer kéint ufänken ouni dauerhaft d’Masken unzehalen. Am Secondaire ginn d’Schüler jo gefrot sech zweemol d’Woch selwer op de Coronavirus testen ze loossen. Emol an der Klass an emol doheem.

Um Mëttwoch scho waren eng Rei méi eeler Schüler fir e puer Stonnen zréck an de Lycée, dat fir en Noexamen ze schreiwen. Alles an allem si fir dëst Schouljoer méi wéi 1.000 Schüler am Maacher Lycée ageschriwwen.

Op der Uni Lëtzebuerg war um Donneschdeg dann och "Welcome Day", wou nei Studenten d’Méiglechkeet kréien, de Campus ze entdecken an hiert neit Ëmfeld erkläert kréien.

D’Liewen an d’Studéieren op der Uni ass jo och dëst Joer weiderhi ferme duerch d’Covid-Pandemie markéiert.