An eiser Serie iwwert d’Lëtzebuerger Sportler a Corona-Zäite kucke mir déi Kéier op e Lëtzebuerger Extremsportler.

Iwwer 1.000 Kilometer mam Vëlo mat 16.000 Héichtemeter. Dat ass de Menü, wann een als Ultravëlossportler wëll Weltmeeschter ginn. D’lescht Joer huet de Ralph Diseviscourt dës Stréck am séiersten hannerun sech bruecht, fir sech dëse Prestige-Titel ze sécheren. Dëst Joer gëtt wéinst dem Coronavirus kee WM-Titel verdeelt an och soss sinn, wéi an anere Sportaarten och, all Courssen den Ament ofgesot.

Dem Ralph Diseviscourt säin Alldag als Sportler besteet den Ament nëmmen aus Training. Och den Ultrasport gouf vun der Corona-Pandemie getraff. An dës Period sollt och dem Dizzy säi grousst Zil vun dësem Joer falen, wat och gläichzäiteg säin Highlight vu senger Karriär hätt solle sinn.

"Ech sollt nämlech den 23. Juni op Nationalfeierdag un den Depart goe vum Trans-Siberian-Extreme. Dat ass, wann een esou wëll, déi längsten Etappecourse vun der Welt. Eng Course iwwer 9.100 Kilometer, opgedeelt op 15 Etappen. Eppes méi wéi 600 Kilometer an der Moyenne pro Etapp an déi längsten Etapp huet 1.300 Kilometer." sot de Ralph Diseviscourt.

Enttäuscht ass den Dizzy schonn, dass dës Course ofgesot gouf, mä et ass verständlech. Den Ament géifen et aner Prioritéite ginn, mä positiv wier, dass hie weiderhin trainéiere kéint. 800-900 Kilometer d’Woch stinn den Ament um Dagesmenü. E positiven Impakt huet déi Kris awer och an dat huet mat sengem WM-Titel ze dinn, deen den Extremsportler beim Glocknerman an Éisträich gewonnen huet.

"Dësen Titel kann ech fir e weidert Joer behalen, doduerch, dass déi Course ofgesot an op 2021 verluecht gouf. Dat ass fir mech perséinlech e positiven Effekt vun der ganzer Kris."

Zanter 20 Joer schafft de Ralph Diseviscourt als Bankemployé. Den Ament deels vun doheem, deels um Büro. Fir op d‘Aarbechtsplaz gëtt de Vëlo geholl an als zousätzlechen Training genotzt. An Zäite vu Covid-19 fält déi deeglech Routine awer ewech an doduerch ass et net einfach, fir den Trainingsrhythmus bäizebehalen.

"Et ass méi schwéier, fir sech moies ze beweegen an aus dem Bett ze kommen, fir säin Training ze maachen, well een de Wee mam Vëlo net op d’Aarbecht mécht. De Moment, wou ech heiheem sinn, da probéieren ech, moies meng Ronn, mä déi Motivatioun, wann e weess, et muss een elo op de Büro a wann een dat da ka mam Vëlo maachen. Deen Drock ass net méi do an da fält och emol déi eng oder aner Trainingssortie aus."

Och d'Dizzy-Challenge, déi éischt Ultra-Course hei am Land mat 500 Kilometer duerch d'Ländchen mat 9.000 Héichtemeter sollt am Juni gestart ginn. Déi gëtt awer elo am September organiséiert.

D'Serie "Sportler a Corona-Zäiten am Replay" am Replay