Feeën an Hexen, Engelcher an Dämonen, Zauberer a Monsteren. Eng gutt Fantasy Geschicht entféiert een an eng aner Welt an däer Magie net ëmmer gutt ass.

Als eng vun de wéinege Fantasy-Serien, déi net op engem Buch baséiert, spillt “Carnival Row” an enger Welt, an där Feeën an aner mythesch Wiesen am Krich si mat de Mënschen, déi an hir Gebidder afalen. D‘Vignette Stonemoss, eng Zaldotin vun de Feeën, flücht an de “Burgue”, eng neutral Zon, a fënnt do eng Aarbechtsplaz als Mod an engem räiche mënschleche Stot.

Wéi si eng Kéier an d’”Carnival Row” geet, de Flüchtlingsquartier vum „Burgue“, erzielt hir gutt Frëndin Tourmaline hir, dat de Philo, hir grouss Léift, net wéi si gemengt hat, am Krich gestuerwen ass, mä nach lieft. Hie schafft als Detektiv fir d’Police am “Burgue”, wou en am Gaang ass, eng Serie vu Morden opzeklären.

Den Universum vun der Serie ass mat vill Léift zum Detail gemaach an d’Kostümer an d’Spezialeffekter sinn en opulenten Hannergrond fir eng Geschicht, déi anengems Libesgeschicht, Krimi an politesch Intrige ass.

D’Parallellen zu der Flüchtlingskris sinn heiansdo e bëssen deck opgedroen, den Orlando Bloom spillt säi Philo e bëssen dréchen, iwwerdeems d’Cara Delevigne heiansdo ze vill iwwerdreift, mä am grousse ganzen sinn d’Personnagen interessant genuch, fir ee bis un d’Enn vun den aacht Episoden dobäizehalen.

Carnival Row ass disponibel op Amazon.

D'Deeler aus "Fantasy Serien"

D'Deeler aus "Weiblech Actionhelden"

D'Deeler aus "Romantesch Serien"

D'Deeler aus "Serien aus der gudder aler Zäit

D'Deeler aus "Serië fir e Marathon"

D'Deeler aus "Serien aus anere Kulturen"