Zombie Shows (1)Fear the Walking Dead (Amazon)

RTL Lëtzebuerg

Wéi et schéngt, war am Mäerz e “Zombie Response Team” op der Schwedescher Grenz ugehale ginn.

Update: 11.05.2020 09:51

Vill Leit schéngen dat Gefill ze hunn, datt d’Coronavirus-Pandemie en Zeeche fir d’Enn vun der Welt, wéi mir se kennen, ass. Mä kann een dat wierklech mat enger Post-Apokalyptescher Zombie-Welt vergläichen?

D’Madison Clark, eng Jugendpsychologin an engem Lycée, an hire Frënd, den Travis Manawa, hu scho genuch ze dinn mam Madison hirem drogesüchtege Jong, hirem Meedchen, dat mécht wat et wëll, an dem Travis sengem Bouf, dee no der Scheedung vun sengen Elteren näischt mat sengem Papp wëll ze dinn hunn, wéi d’Noriichten op der Tëlee ufänken richteg onheemlech ze ginn.

D’Leit stierwen un engem neiaartege Virus a stinn duerno als Zombien erëm op. Wéi d’Zivilisatioun lues a lues verschwënnt, muss d’Famill léieren, zesummenzehalen, fir ze iwwerliewen. Alleguer passe se sech un déi nei Welt un an entdecken dobäi ongeaanten Talenter, iwwerdeems se léieren, datt se sech nëmmen op sech an hir Famill kënne verloossen.

“Fear the Walking Dead” ass e Spin-off vun “The Walking Dead”, déi u sech besser bekannt ass. Als Virgeschicht geduecht, verlafen déi zwou Serien an der Tëschenzäit parallel, woubäi “Fear the Walking Dead” haaptsächlech op der Amerikanescher Westküst, a Kalifornien an a Mexico, spillt. Dobäi konzentréiert d’Geschicht sech op eng Famill, déi alles mécht, fir zesummenzebleiwen. Allerdéngs ass et hei grad wéi an “The Walking Dead”: et sinn net d’Zombien, déi geféierlech sinn, mä déi aner Leit.

Fear the Walking Dead ass disponibel op Amazon Prime mat fënnef Staffelen.